Read Lezgi New Testament – ЦӀийи Икьрар Ягья 17 Bible Online

Ягья 17 - Lezgi New Testament – ЦӀийи Икьрар bible

Ягья 17

¹Исади, и гафарилай кьулухъ кьил цавуз хкажна, лагьана: — Вахт хьанва, Буба. Жуван Хцин баркалла къалура, Хцини Ви баркалла къалурда.

²Вуна Адан патав гъидай гьар садаз Ада эбеди уьмуьр гун патал, Вуна чан алай вирибур Адан ихтиярда тунва.

³Эбеди уьмуьр, лагьайтӀа, халисан сад Аллагь тир Вун ва Вуна ракъурнавай Иса Месигь чир хьун я.

⁴Вуна Заз чилел ая лагьанвай кар За кьилиз акъудна. Гьа идалди За Ви баркалла къалурна.

⁵Гила, Буба, дуьнья халкь ийидалди Зун ви патав гвайла, Зал алай хьтин баркалла Вуна Зав гахце.

⁶И дуьньяда Вуна Зав агудай инсанриз За Ви ТӀвар чирна. Абур вибур тир, Вуна абур Зи патав гъана. Абуру Ви гаф кьилиз акъудна.

⁷Вуна Заз гайи кьванди вири Валай къвезвай чӀал гила абуруз чир хьанва.

⁸Вуна Заз лагьай гафар За абурал агакьарна, абуруни а гафар кьабулна. Гила абуруз Зун Ви патавай атайди гьакъикъатда чир хьанва ва Зун Вуна ракъурайдахъ абур агъунва.

⁹Абурун паталай За Ваз минетзава. Дуьньяда авай вирибурун паталай ваъ, са гьабурун паталай. Абур вибур тир, Вуна абур Заз гана.

¹⁰Захъ авай вири Види я, Вахъ авай вири Зиди я. Абуру чпин краралди Зи баркалла виридаз къалурда.

¹¹Зун мад и дуьньяда акъваздач, Зун Ви патав хквезва. Абур, лагьайтӀа, и дуьньяда амукьзава. Я пак Буба, абур Заз Вуна гана, Жуван ТӀварцӀелай абур хуьх; къуй абур чун хьиз сад хьурай.

¹²Зун абурухъ галамай кьван гагьда Заз ганвай Ви ТӀварцӀелай За абур хуьзвай. За абур хвена ва Каламда кхьенвайди кьилиз акъатун патал кьиникь ганвай садалай гъейри, абурукай гьич садни терг хьанач.

¹³Гила Зун Ви патав хквезва. За ийизвай хьтин шадвилив гьабурни ацӀун патал, За и вири гафар абурухъ галаз Зун и дуьньяда амаз лугьузва.

¹⁴Ви гаф За абурал агакьарна, амма дуьньяда авайбуруз абур такӀан хьанва, вучиз лагьайтӀа, Зун хьиз, гьабурни и дуьньядикай туш.

¹⁵За Ваз абур и дуьньядай къахчун патал минетзавач, За Вавай абур чӀурудакай хуьн тӀалабзава.

¹⁶Зун дуьньядикай туширвал, гьабурни дуьньядикай туш.

¹⁷Жуван гьакъикъатдив абур пак ая. Ви гаф гьакъикъат я.

¹⁸Вуна Зун и дуьньяда авайбурун патав ракъурайвал, Зани абур и дуьньяда авайбурун патав ракъурна.

¹⁹За Жув гьабурун паталай пак къурбанд хьиз гузва, гьабурни гьакъикъатдив пак хьурай.

²⁰За ийизвай минет са гьабур ваъ, абурун гафариз яб гана Захъ иман ийидайбур патални я.

²¹Зун Ва ава, Вунни За ава. Абур — сад хьурай ва Ча аваз хьурай. Гьа чӀавуз дуьнья Зун Вуна ракъурайдахъ агъада.

²²Зунни Вун гьикӀ сад ятӀа, гьабурни гьакӀ сад хьурай. Гьавиляй За гьабурузни Вуна Заз гайи хьтин баркалла гана.

²³Зун абура ава, Вунни За ава. Абурухъни гьа ихьтин тамам садвал хьурай. Гьа чӀавуз Ваз, Зун хьиз, гьабурни кӀанзавай чӀал дуьньядиз чир жеда ва Зун Вуна ракъурайдахъ дуьнья агъада.

²⁴Буба, гьеле дуьнья халкь жедалди Ваз зун кӀандай ва Вуна Заз баркаллани ганай. Гьавиляй Заз, Вуна Зав агудай и баркалла акун патал, Заз абур Зун гьина хьайитӀа, гьана хьанайтӀа кӀандай.

²⁵Гьахъ-михьи Буба! Дуьньядиз Вун чизвач, амма Заз Вун чизва. Зун Вуна ракъурнавайди ина авайбурузни чир хьанва.

²⁶Ваз Зун кӀандайвал, гьабурни кӀан хьун патал, За абуруз Ви ТӀвар ачухарна ва мадни ачухарда. Гьа и саягъда Зун абура ава.