Read Lezgi New Testament – ЦӀийи Икьрар Ягья 2 Bible Online

Ягья 2 - Lezgi New Testament – ЦӀийи Икьрар bible

Ягья 2

¹Пуд лагьай юкъуз Галилейда авай Кана лугьудай шегьерда мехъер авай, мехъерик Исадин дидени квай.

²Мехъерик Исадиз ва Адан тилмизризни эвернавай.

³Чехир куьтягь хьайила, Исадин дидеди Адаз лагьана: — Мехъерин иесийрихъ мад чехир амач.

⁴— Я диде! — лагьана Исади. — Вуна За́з вучиз лугьузва? Зи вахт гьеле атанвач.

⁵Адан дидеди кьилел-кӀвачел элкъведайбуруз лагьана: — Ада квез вуч лагьайтӀани, гьам кьилиз акъуд.

⁶Анал чувудри чпин михьивилер авун патал яд цадай къванцин ругуд каркун алай. Абурукай гьар сад кьвед-пуд метратӀас кьван яд гьакьдайбур тир.

⁷Исади кьилел-кӀвачел элкъведайбуруз лагьана: — Къванцин къапар цяй ацӀура. Абуруни каркунар сиве-сивди ацӀурна.

⁸— Гила са тӀимил кьван цана, тамададин патав твах, — лагьана Ада. Абуру тухвана.

⁹Тамададиз чехир цикай хьанвайди чизвачир, адаз и чехир гьинай гъайиди ятӀани чизвачир, а кар чизвайбур анжах яд къапариз цайибур тир. Чехирдин дад акуна, тамадади чамраз эверна, са патахъ тухвана.

¹⁰— Гьар са инсанди сифте хъсан чехир эцигда, — лагьана ада, — межлисдик квайбур хъвана кефина гьатайла, усал чехир гъида; амма вуна хъсан чехир икьван гагьда тунва.

¹¹Гьа икӀ Исади Галилейда авай Кана шегьерда сифтегьан керемат-ишара къалурна ва инсанриз Вичин баркалла чирна. Адан тилмизрини Адахъ иман авуна.

¹²Адалай кьулухъ Иса, Адан диде, стхаяр ва Адан тилмизар Кефернагьум шегьер галайвал эвичӀна. Ана абур акьван яргъалди амукьнач.

¹³Чувудрин Песагь сувар мукьва жезвай, Иса Ярусалимдиз фена.

¹⁴Ана Адаз Аллагьдин КӀвалин гьаятда яцар, хипер ва лифер маса гузвайбурни пулар дегишарзавайбур акуна.

¹⁵Исади еперикай къамчи храна, вирибур Аллагьдин КӀвалин гьаятдай чукурна — гьакӀни яцарни хипер, пул дегишарзавайбурун дезгеяр алабарна, абурун пулар чукӀурна.

¹⁶Лифер гузвайбурузни лагьана: — Квадара абур инай, Зи Бубадин кӀвал базардиз элкъуьрмир.

¹⁷Инал Адан тилмизрин рикӀел Каламда кхьенвай ихьтин гафар хтана: «Ви кӀвалин къайгъу чӀугваз кӀанз Зи рикӀи рикӀ незва».

¹⁸И крариз жаваб яз, чувудрин кьиле авайбуру Адаз лагьана: — Ваз икӀ ийидай ихтияр авайди субут авун патал, чаз са керемат-ишара къалура.

¹⁹— Куьне и Аллагьдин КӀвал чукӀурайтӀа, За ам пуд йикъан къене эхциг хъийида, — жаваб гана Исади.

²⁰Инал чувудри лагьана: — И Аллагьдин КӀвал яхцӀурни ругуд йисуз эцигайди я, Вуна ам пуд йикъан къене гьикӀ эхцигда?

²¹Амма Ам Аллагьдин КӀваликай рахазвайла, Адан фикирда Вичин Беден авай.

²²Ам кьена чан хтайдалай кьулухъ, Адан тилмизрин рикӀел гьа и гафар хтанай. Абур Каламдин ва Исади лугьузвай гафарин чӀалахъ хьана.

²³Иса Песагь суварик Ярусалимда авайла, Ада къалурзавай керемат-ишараяр акур вирибуру Адахъ иман авуна.

²⁴Амма Исади абурал ихтибар ийизвачир: Адаз инсанар хъсандиз чидай.

²⁵Адаз гьар са касдин рикӀе вуч аватӀа аквазвай, Адаз масадбуру ийидай ихтилатар герек тушир.