Read Lezgi New Testament – ЦӀийи Икьрар Ягья 20 Bible Online

Ягья 20 - Lezgi New Testament – ЦӀийи Икьрар bible

Ягья 20

¹Гьафтедин сад лагьай юкъуз[4], Маждалдай тир Майрам йиф кумаз кьветӀел-сурал атана. Адаз кьветӀин сивел алай къван са патахъ ярхарнаваз жагъана.

²Ада, чукурна фена, Симун-Петрудизни Исадин рикӀ алай маса тилмиздиз лагьана: — Агъа кьветӀяй акъудна тухванва, Ам гьиниз авунатӀа чаз чидач.

³Гьасятда Петруни муькуь тилмиз кьветӀин патав фена.

⁴Абуру кьведани санал зверна, амма муькуь тилмизди Петрудилай йигиндиз чукурзавай, гьакӀ хьайила ам фад атана.

⁵Ам кьветӀез гьахьнач. Алгъана килигайла, адаз ана авай кафанар акуна.

⁶Адан гуьгъуьнал алаз атай Симун-Петру кьветӀиз гьахьна. Адаз ана чкӀанвай шаршавар ва Исадин кьил кутӀунай ягълух акуна. Ягълух шаршаврикай чараз кӀватӀна маса чкадал алай.

⁸Сифте агакьай кьвед лагьай тилмизни кьветӀез гьахьна, гьадазни и кар акуна ва ам агъуна.

⁹Икьван чӀавалди абур Исадал кьейидалай кьулухъ чан хкведа лагьана Каламда кхьенвай гафарин гъавурда акьазвачир.

¹⁰Ахпа тилмизар кӀвализ хъфена.

¹¹Майрам, лагьайтӀа, кьветӀин патав акъвазна шехьзавай. И арада ам алгъана[5] кьветӀиз килигайла,

¹²адаз ана виликдай Исадин мейит алай чкадал лацу пекер алаз ацукьнавай кьве малаик акуна, абурукай сад мейитдин кьил, муькуьдини кӀвачер хьайи чкайрал ацукьнавай.

¹³Абуруни Майрамаз лагьана: — Вун вучиз шехьзава? — Инай ни ятӀани зи Агъа хутахнава, — жаваб гана ада, — Ам гьиниз авунатӀа, заз чизвач.

¹⁴ГьакӀ лагьана ам кьулухъ элкъвейла, адаз кӀвачел акъвазнавай са кас акуна, Ам Иса тир, амма икӀ тирди Майрамаз чир хьаначир.

¹⁵— Вун вучиз шехьзава, я вах? — лагьана Исади. — Вун нихъ къекъвезва? Ам ципицӀбан хьиз хьайи Майрама Исадиз лагьана: — Агъа! Ам Вуна инай акъуднатӀа, Ам вутӀнатӀа, заз лагь. За Ам къахчуда.

¹⁶— Майрам! — лагьана Исади. Майрама, Исадихъ элкъвена «Раббуни» (чувуд чӀалал «я муаллим») лагьана.

¹⁷— Вуна Зун кьамир, ахъая, Зун гьеле Зи Бубадин патав хъфенвач, — лагьана Исади. — Вуна фена Зи стхайриз «Зун Зини куь Бубадин патав, Зини куь Аллагьдин патав хъфизва» лагь.

¹⁸Маждалдай тир Майрама фена тилмизриз «Заз Ребби акуна» лагьана, хабар гана. Ада Исади вичиз вуч лагьанатӀа, вири абуруз ахъайна.

¹⁹Гьафтедин гьа сад лагьай йикъан няниз Исадин вири тилмизар санал кӀватӀ хьанвай. Чувудрин кьиле авайбурухъай кичӀела абуру ракни акьалнавай. Рак кӀеви тиртӀани, Иса атана, абурун юкьвал акъвазна. — Квез хийирар хьуй, — лагьана Ада.

²⁰ИкӀ лагьана, Ада абуруз Вичин гъилерални къвалал алай хирер къалурна. Ребби акурла, тилмизриз хвеши хьана.

²¹Исади абуруз кьвед лагьай гъилера лагьана: — Квез хийирар хьуй! Зун Зи Бубади куь патав гьикӀ ракъурнаватӀа, Зани куьн дуьнья тирвал ракъурзава.

²²ИкӀ лагьана, Ада абуруз уф гана, лагьана: — Пак Руьгь кьабула.

²³Нин гунагьрилай куьне гъил къахчуртӀа, гьадакай абур хкатда. Нин гунагьрилай гъил къахчун тавуртӀа, гьадак абур кумукьда.

²⁴Иса атайла, цӀикьвед илчидикай сад тир «Кьветхвер» лугьудай ТӀумай абурухъ галаз ина авачир.

²⁵Муькуь тилмизри адаз лагьана: — Чаз Ребби акуна. Амма ТӀумая лагьана: — Заз Адан гъилерал михери авунвай хирер такуртӀа, а хирера за тӀуб тун тавуртӀа ва Адан къвалаз за гъил тавуртӀа, зун чӀалахъ жедач.

²⁶Са гьафтедилай Исадин тилмизар мад гьа кӀвале кӀватӀ хъхьана. Абурухъ ТӀумайни галай. Рак агалнавай. Иса атана абурун юкьваз гьахьна. — Квез хийирар хьуй! — лагьана Ада.

²⁷Ахпа ТӀумаяз лагьана: — Ви тӀуб Зав гице, килиг Зи Гъилериз; ви гъил гице, Зи къвалаз гъил ая; шак ийимир, иман ая.

²⁸Адаз жаваб яз ТӀумая лагьана: — Зи Ребби! Зи Аллагь!

²⁹Исади адаз лагьана: — Вуна Зун акурла иман авуна. Такуна иман ийидайбур бахтаварар я!

³⁰И ктабда кхьенвай керемат-ишарайрилай гъейри Исади Вичин тилмизрин вилик гьахьтин мадни гзаф крар къалурна.

³¹За и ктаб, Иса Аллагьдин Хва ва Месигь тирдахъ куьне иман авун патал, кхьенвайди я. И кардихъ иман авуни квез эбеди уьмуьр гуда.