Read Lezgi New Testament – ЦӀийи Икьрар Ягья 5 Bible Online

Ягья 5 - Lezgi New Testament – ЦӀийи Икьрар bible

Ягья 5

¹Адалай кьулухъ Ягьудатда сувар хьана, Иса Ярусалимдиз фена.

²Ярусалимда, Лапагдин варар лугьудай чкада, чувуд чӀалал Бетзата лугьудай гьавиз авай. Адан патав вад кьур гвай.

³А кьурарик гзаф кьадар азарди кьунвайбур: буьркьуьбур, кьецӀибур, фалужди ягъайбур къатканвай.

⁵Ина къанни цӀемуьжуьд йисан къене азар квай са касни авай.

⁶Исадиз ам ана къатканваз акуна ва гъавурда акьуна хьи, ам фадлай гьа икӀ ава. — Ваз сагъ жез кӀанзавани? — лагьана Исади адаз.

⁷— КӀанзава, Агъа, — жаваб гана азарди кьунвайда. — Амма цик юзун акатайла, зун гьавиздиз авуддай са кас захъ авач; зун агатайла, залай вилик гьавиздиз масад эвичӀзава.

⁸— Къарагъ, — лагьана Исади, — жуван месни къахчуна алад.

⁹Амни гьасятда кӀвачел ахкьалтна, вичин месни къахчуна, анай хъфена. Им Киш юкъуз хьайи кар я.

¹⁰Гьа чӀавуз чувудрин кьиле авайбуру сагъ хъхьайдаз лагьана: — Къе Киш югъ я, вуна мес хутахун къадагъа я.

¹¹— Зун кӀвачел ахкьалдарайда заз «жуван месни къахчуна алад» лагьанва, — жаваб гана ада.

¹²— Ваз «Жуван месни къахчуна алад» лагьай Кас вуж я? — хабар кьуна абуру.

¹³И чӀавуз Иса халкьдик акахьна вилерикай хкатнавай, гьавиляй кӀвачел ахкьалтайдаз вич ни сагъар хъувунватӀа чизвачир.

¹⁴А кас Исадиз Аллагьдин КӀвалин гъенел жагъана. — Аку, — лагьана Исади адаз, — вун сагъ хъхьана. Ви кьилел идалай артух къада-бала техкъведайвал, вуна мад гунагь крар хъийимир.

¹⁵А касди, чувудрин кьиле авайбурун патав фена, вич сагъар хъувурди Иса тирди лагьана.

¹⁶Чувудри Исади ихьтин кӀвалахар Киш юкъуз ийизва лугьуз, Ам хурук кутаз хьана.

¹⁷Исади абуруз лагьана: — Зи Бубади къедалди гьахьтин крар ийизва. Зани гьакӀ ийизва.

¹⁸Исади са Киш югъ чӀурна лугьуз ваъ, гьакӀни Ада Аллагь Вичин буба я ва Вич Аллагьдиз барабар я лугьузвайвиляй чувудрин кьиле авайбуруз Ам амайдалайни гзаф рекьиз кӀан хьана.

¹⁹И кардин паталай Исади лагьана: — За квез лап рикӀивай лугьузва: Бубади арадал гъизвай крар такунмаз Хцивай Вичивай затӀни арадал гъиз жедач: Ада вуч ийизватӀа, Хцини гьам ийида.

²⁰Бубадиз Вичин Хва гзаф кӀанда, Ада Вичи вуч ийизватӀа Хциз къалурзава. Бубади Хциз гьабурулайни зурба крар ийидайвал къалурда. Ада а крар авурла, квез керемат-ишара жеда.

²¹Бубади кьейибурал чан хкизвай саягъда Хцини Вичиз кӀандайбурал чан хкизва.

²²Бубадиз ийизвай хьтин гьуьрмет Хцизни авун патал, виридан дуван ийидай ихтияр Бубади Хцив вугана. Бубади Вичи садан дуванни ийизвач. Ни Хциз гьуьрмет ийизвачтӀа, Хва ракъурай Бубадизни ада гьуьрмет ийизвач.

²³

²⁴За квез лап рикӀивай лугьузва: Зи Гафунихъ яб акалзавайдаз ва Зун Ракъурайдахъ иман ийизвайдаз эбеди уьмуьр ганва ва адан дуван ийидач. Ам ажалдилай кам яна уьмуьрдиз экъечӀнава.

²⁵За квез лап рикӀивай лугьузва: ахьтин чӀав къведа хьи, кьейибурузни Аллагьдин Хцин ван жеда, ва Адан ван хьайибурал чан хкведа, а чӀавни ингье атана агакьнава.

²⁶Буба уьмуьрдин чешме тирвал, Бубади Хцикайни уьмуьрдин чешме авунва.

²⁷Бубади Адан гъиле дуван ийидай ихтиярни тунва, вучиз лагьайтӀа Ам Инсандин Хва я.

²⁸Сура авай вирибуруз Адан ван къведай вахт алукьда. Хъсан крар авурбуруз, чан хтайла, эбеди уьмуьр гьатда. Пис крар авайбурув, чан хтайла, чпин жаза агакьда. Куьн зи и гафарал мягьтел жемир.

²⁹

³⁰Завай жува-жувалай са затӀни ийиз жедач. За Жуваз лагьайвал дуван ийизва. Зун Заз кӀандайвал ийиз алахъзавач, Зун Ракъурайди рази жедайвал ийизва За. Гьавиляй Зи дуванни гьахъ-михьиди жезва.

³¹За Жува Жувакай инсанриз лугьуз хьайитӀа, Зи Гафарихъ са къиметни жедач.

³²Закай лугьузвай маса шагьид ава. Ада Закай гьакъикъи шагьидвал ийизвайди Заз чизва.

³³Куьне Ягьядин патав инсанар ракъурнай, адани квез Закай авайвал лагьана.

³⁴Амма Зун инсанри шагьидвал авунилай аслу туш. За жуван гафар анжах куьн хилас авун патал лугьузвайди я.

³⁵Ягья экв чукӀуриз кузвай чирагъ тир. Квез кӀанзавай карни са кьадар вахтунда, гьа экуьник акатна, шадвал авун тир.

³⁶Заз жуван гьакъиндай мад са шагьидвал ава. Амни зи крар я. За Зи крар Бубади Зи хиве тунвай кӀвалах кьилиз акъудун патал ийизвайди я. Зи крари Зун Бубади ракъурнавайди тестикьарзава. И шагьидвал Ягьядин шагьидвилелай артух я.

³⁷Гьатта Зун иниз ракъурнавай Зи Бубади Вичи Зи гьакъиндай шагьидвал ийизва. Амма квез гьич садрани я Адан ван хьайиди туш, я Ам Вич акурди туш.

³⁸Куьн Ада Ракъурнавайдан чӀалахъ туш. Гьавиляй Адан Гафни куьне куь рикӀера хуьзвач.

³⁹Аллагьдин Калам кӀелайла, эбеди уьмуьр гьатда лугьуз куьне алахъна Калам чирзава. Амма гьа Пак Каламдини Зи гьакъиндай шагьидвалзава.

⁴⁰Амма эбеди уьмуьрдив агакьун патал квез Зи патав къвез кӀанзавач.

⁴¹Заз инсанрин патай баркалла герек туш.

⁴²Амма квез Аллагь кӀан тийизвайди Заз чида.

⁴³Зун Зи Бубадин ТӀварцӀелай атана, амма куьне Зун кьабулзавач; са масад вичин тӀварцӀелай атайтӀа, куьне гьам кьабулда!

⁴⁴Куьн са-садан вилик, инсанрин арада куь тӀвар-ван гьатунихъ къекъвезва, амма Сад Аллагьдин вилик тӀвар-ван гьатунихъ куьн къекъвезвач. ГьакӀ хьайила, квелай Захъ иман ийиз алакьдани?

⁴⁵Зи Бубадин вилик За квек тахсирар кутада лагьана куьне фикирар ийимир. Куьне далу акалнавай Мусади вичи квек тахсир кутада.

⁴⁶Мусади, лагьайтӀа, Закай виликамаз кхьенай. Куьн Мусадин чӀалахъ хьанайтӀа, Зи чӀалахъни жедай.

⁴⁷Ада кхьенвайдан чӀалахъ жезвачтӀа, Зи гафарин чӀалахъни куьн гьикӀ жеда?