Read Lezgi New Testament – ЦӀийи Икьрар Ягья 6 Bible Online

Ягья 6 - Lezgi New Testament – ЦӀийи Икьрар bible

Ягья 6

¹Идалай кьулухъ Иса Галилейдин, яни Тибердин вирин муькуь къерехдиз экъечӀна.

²Ада азарри кьунвайбур сагъар хъийидайла авур керемат-ишараяр акуна, Адан гуьгъуьна аваз гзаф халкь фена.

³Иса пелел экъечӀна, анал Ам Вичин тилмизарни галаз ацукьна.

⁵Исади, кьил хкажна, Вичин патав къвезвай гзаф кьадар инсанар акурла, ФилипӀаз лагьана: — Абуруз тӀуьн гун патал бес кьадар фу чна гьинай къачуда?

⁶Ибур Ада ФилипӀ синагъ авун патал лагьай гафар тир; вуч авуна кӀандатӀа, Адаз Вичиз чизвай.

⁷ФилипӀа жаваб гана: — Гьардал са кӀус кьванни гьалтун патал кьве виш динардихъ къачур фу абуруз бес жедач.

⁸Адан тилмизрикай сада, Эндирея, Симун-Петрудин стхади, лагьана:

⁹— Ина са гададив мухан вад фуни кьве гъед гва; амма икьван инсанриз адакай вуч жеда?

¹⁰— Абурув виридав ацукьиз тур, — лагьана Исади. А хъсан векь авай чкада вад агъзур кьван итимар ацукьна.

¹¹Исади фар къачуна, шукур авуна, ацукьнавайбуруз гьардаз кӀандай кьван фуни гъетер пайна.

¹²Вири тух хьайила, Ада Вичин тилмизриз лагьана: — Терг тахьун патал амай кӀусар кӀватӀа.

¹³Вирида тӀуьрдалай кьулухъ мухан вад факай амукьай кӀусарай цӀикьвед зимбил ацӀурнай.

¹⁴Исади къалурай керемат-ишараяр акур инсанри лугьуз хьана: — Им дугъриданни дуьньядиз атана кӀанзавай гьа Пайгъамбар я.

¹⁵Инсанриз атана Вичикай гужуналди пачагь ийиз кӀанзавайди чир хьайи Иса мад текдиз пелел фена.

¹⁶Няни хьайила Адан тилмизар вирихъ эвичӀна.

¹⁷МичӀи жезвай, амма Иса абурун патав къвезвачир. Абур луьткведа акьахна вирин а патаз — Кефернагьумдиз фена.

¹⁸Къати гар акъатнавай, вирелни лепе акьалтнавай.

¹⁹Са сятдин мензилдиз фейила, вирелай тӀуз атана луьткведиз мукьва жезвай Иса акуна, абуруз кичӀе хьана.

²⁰Амма Исади абуруз лагьана: — Зун я, кичӀе жемир.

²¹Абуруз Ам луьткведа акьадариз кӀанзавай чӀавуз луьткве абуруз физ кӀанзавай чкадив агакьнавай.

²²Пакагьан юкъуз вирин а пата амай инсанри вирел анжах са луьткве аламайди кьатӀанвай. Абуруз а луьткведа тилмизар акьахайди ва абурухъ Иса галачирдини чизвай. Тилмизар вирин а патаз текдиз экъечӀнай. И арада Тибердай маса луьтквеяр Исади Реббидиз шукур авуна халкьдиз фу гайи чкадин мукьув атана.

²³

²⁴Исани Адан тилмизар авачиз акурла, инсанар луьтквейриз акьахна Исадихъ къекъвез Кефернагьумдиз фена.

²⁵Иса вирин а патай жагъайла, абуру Адаз лагьана: — Муаллим! Вун иниз мус атана?

²⁶Исади жаваб гана: — За квез лап рикӀивай лугьузва: фу тӀуьна тух хьайивиляй я куьн Захъ къекъвезвайди, амма Аллагьдиз Зи керемат-ишарадалди квез вуч лугьуз кӀанзаватӀа куьн гъавурда акьунвач.

²⁷Куьн фад вара-зара жедай гьакӀан тӀуьнихъ галтугмир, квез эбеди уьмуьр гудай тӀуьнихъ галтуг. А тӀуьн квез Инсандин Хци гуда. Чи Аллагь Бубади Инсандин Хциз гьа ихтияр ганва.

²⁸— Аллагьдин крар кьилиз акъудун патал чна вуч авуна кӀанда? — лагьана абуру.

²⁹— Аллагьдиз кӀанзавайди Вичи Ракъурнавайдахъ куьне иман авун я, — жаваб яз лагьана Исади.

³⁰И гафариз жаваб яз, абуру Адаз лагьана: — Вуна чаз са керемат-ишара къалура. Ам акурла, чун Ви чӀалахъ жеда. Вуна вуч ийида?

³¹Каламда кхьенва: «Аллагьди абуруз цаварилай фу нез вугана». Гьа кхьенвайвал, гзаф йисар инлай вилик чи бубайри кьурумда мангьу тӀуьнай.

³²— За квез лап рикӀивай лугьузва: цаварилай квез фу гайиди Муса туш, квез цаварилай халисан фу гузвайди Зи Буба я, — лагьана Исади. —

³³Аллагьди гузвай и фу — им цаварилай атана дуьньядиз уьмуьр гузвайди я.

³⁴— Агъа! — лагьана абуру. — Чаз датӀана гьахьтин фу це.

³⁵— Уьмуьр гудай фу — Зун я, — лагьана Исади. — Зи патав атайди са чӀавузни гишила амукьдач ва Захъ иман ийизвайди гьич са чӀавузни къаних жедач.

³⁶Амма За квез виликдай лагьайвал, квез Зун аквазватӀани, куьне Захъ иман ийизвач.

³⁷Зи Бубади Заз ганвай вирибур гьар гьикӀ хьайитӀани, Зи патав къведа. Зи патав атайди За чукурдач.

³⁸Зун цаварилай Жуваз кӀандайвал авун патал ваъ, Зун Ракъурнавайдан къаст кьилиз акъудун патал атанва.

³⁹Зун Ракъурнавайдан къаст Заз ганвай са касни терг тахьун, Къияматдин юкъуз абурал За чан хкун я.

⁴⁰Зун Ракъурнавайдан къаст — Хва акур ва Адахъ иман ийизвай гьар садаз эбеди уьмуьр гун я. Къияматдин юкъуз За гьахьтин гьар са касдал чан хкида.

⁴¹Исади «Зун цаварилай эвичӀна атанвай фу я» лугьуникди, чувудар Адалай нарази хьана.

⁴²— Ам Юсуфан хва Иса тушни кьван? — лугьузвай абуру. — Чаз Адан дидени буба хъсан чизва. Ада «Зун цаварилай эвичӀнавайди я» гьикӀ хьана лугьузвайди я?

⁴³Абуруз жаваб яз Исади лагьана: — Куьне наразивилер ийимир.

⁴⁴Зи патав анжах Зун ракъурай Зи Бубади гъайидавай къвез жеда. Къияматдин юкъуз За адал чан хкида.

⁴⁵Пайгъамбарри кхьенва: «Аллагьди вири гъавурда твада». Зи Бубади вуч лугьузватӀа ван жезвай ва Ада лагьайбур чир жезвай гьар сад Зи патав къведа.

⁴⁶Им са низ ятӀани Буба акуна лагьай чӀал туш. Анжах Аллагьдин патавай Атанвайдаз Буба акунва.

⁴⁷За квез лап рикӀивай лугьузва: Захъ иман ийизвайдаз эбеди уьмуьр жеда.

⁴⁸Зун уьмуьр гудай фу я.

⁴⁹Куь бубайри кьурумда мангьу тӀуьнайтӀани, абур кьенай.

⁵⁰Куь вилик квайди лагьайтӀа, цаварилай атанвай фу я, а фу тӀуьрди рекьидач.

⁵¹Зун цаварилай атанвай уьмуьр гудай фу я; и фу незвай кас эбеди яз жеда. За гузвай фу Зи Беден я. Ам За инсанар чан алаз хьун патал гуда.

⁵²Инлай чувудри чпи чпихъ галаз гьуьжетар ийиз, лугьуз хьана: — Ада Вичин Беден чав гьикӀ нез тада?

⁵³Исадини абуруз лагьана: — За квез лап рикӀивай лугьузва: куьне Инсандин Хцин Беден тӀуьн тавуртӀа ва Адан Иви хъун тавуртӀа, квехъ уьмуьрни жедач.

⁵⁴Зи Беден незвайдахъ, Зи Иви хъвазвайдахъ эбеди уьмуьр жеда, Къияматдин юкъуз За адал чан хкида.

⁵⁵Вучиз лагьайтӀа Зи Беден — недай гьакъикъи затӀ я, Зи Иви — хъвадай гьакъикъи затӀ я.

⁵⁶Зи Беден незвайди ва Зи Иви хъвазвайди За жеда, Зунни — гьада.

⁵⁷Зун уьмуьр гудай Зи Бубади Ракъурнавайди я, Ам себеб яз Зал гьикӀ чан ала, Зун незвайбурални, Зун себеб яз, гьакӀ чан жеда.

⁵⁸Цаварилай атай гьакъикъи фу гьа ихьтинди я, куь кьенвай бубайри тӀуьр хьтинди туш. Цаварилай атай и фу незвайди эбеди яз жеда.

⁵⁹И гафар Исади Кефернагьумда синагугда чирвилер гудай чӀавуз лагьанай.

⁶⁰Исадин и гафар ван хьайи Адан тилмизрикай гзафбуру лагьанай: — Ибур хупӀ зегьле ракъурдай гафар тушни! Абуруз яб гудайди вуж хьуй!

⁶¹Тилмизрин наразивал Вичиз аян хьанвай Исади абуруз лагьана: — Зи гафари квек хкуьрзавани?

⁶²Бес квез Инсандин Хва Вич хьайи цаварал хъфиз акуртӀа куьне вучда?

⁶³Уьмуьр гузвайди Руьгь я, инсанрин алахъунрихъ ахьтин керемат-ишара авач. За квез лагьанвай гафар руьгь я, абуру уьмуьрни гузва.

⁶⁴ГьакӀ ятӀани, куь арада иман тийизвайбур ава. Исадиз лап сифтедилай Вичихъ ни иман ийидачтӀа чизвай. Адаз Вич ни маса гудатӀани чизвай.

⁶⁵— За гьавиляй лагьанай хьи, — давамарна Исади, — Бубади Зи патав атун низ ганвачтӀа, абурукай садавайни Зи патав къвез жедач.

⁶⁶Гьа вахтунилай Адан тилмизрикай гзафбур Адакай къерех хьана ва Адахъ галаз къекъуьн хъувунач.

⁶⁷Амай цӀикьведавай Исади жузуна: — Квезни Завай къакъатиз кӀанзавани?

⁶⁸— Чун нин патав фида, я Агъа? — жаваб гана Симун-Петруди. — Эбеди уьмуьр гудай гафар Вахъ ава.

⁶⁹Чна Вахъ иман авунва, чаз Вун Аллагьди ракъурнавай Пакди тир чӀал чир хьанва.

⁷⁰Исади абуруз жаваб гана: — Куьн цӀикьведни За хкягъайбур тушни бес? Амма квекай сад иблис я.

⁷¹ИкӀ лугьудайла, Адан фикирда Искарият Симунан хва Ягьуд авай; цӀикьведакай сад тир Ягьуд ахпа Иса маса гайиди тир.