Read Lezgi New Testament – ЦӀийи Икьрар Крар 1 Bible Online

Крар 1 - Lezgi New Testament – ЦӀийи Икьрар bible

Крар 1

¹Я Тегьафил, зи сад лагьай ктабда за ваз Иса цаварал хутахай йикъал къведалди Ада авур крарикайни чирвилерикай кхьенай. Цаварал хутахдалди Ада Пак Руьгьдин куьмекдалди Вичи хкягъай илчийриз вуч авуна кӀандатӀа лагьанай.

³Вичи хашунал азабар чӀугурдалай кьулухъ, Иса яхцӀур йикъан къене а илчийрин патав къвез хьанай. Ада Вичел гьакъикъатда чан алайди субутардай гьар жуьредин делилар гъиз хьанай, Ада абуруз Аллагьдин Пачагьлугъ вуч ятӀа лугьудай.

⁴Садра, илчийрихъ галаз фу недайла, Исади абуруз ихьтин эмир гана: — Ярусалимдай хъфимир, амма Бубади квез хиве кьур савкьватдал вил алаз акъваз. А савкьватдикай квез зи сивяй ван хьанай.

⁵Ягьяди инсанрив цик акахьун къачуз тунай, квев, лагьайтӀа, са кьадар йикъарилай Аллагьди Пак Руьгьдик акахьун къачуз тада.

⁶Илчияр санал кӀватӀ хьайила, абуру Адавай хабар кьуна: — Ребби, Вуна а чӀавуз Исраилдин пачагьлугъ гуьнгуьна хутада ман?

⁷— Бубади Вичин гьукумдалди тайинарнавай кӀвалахар кьиле фидай чӀаварни муьгьлетар чир хьун квез герек туш, — лагьана Ада. —

⁸Квек Пак Руьгь акатна, куьн адан къуватдив ацӀай чӀавуз гьам Ярусалимда, гьам Ягьудатда, гьам Самариятда, гьамни дуьньядин вири пипӀера куьн зи шагьидар жеда.

⁹ИкӀ лугьун кумаз, Ам абуруз акваз-акваз цавуз хкаж хьана ва цифедин гапӀалдик акатна. Ам абурун вилерикай хкатна.

¹⁰Цавуз килигиз амай абурун патав садлагьана лацу пекер алай кьве кас пайда хьана.

¹¹— Галилейвияр, — лагьана абуру, — куьн цавуз килигиз акъвазнава хьи? Квез и Иса куь патавай цаварал хкаж жез акур хьиз, Ам гьакӀ хквенни ийида.

¹²Идалай кьулухъ абур Зейтун пеляй эвичӀна ва Ярусалимдиз хтана. И дагъ Ярусалимдивай са версинин мензилда авай.

¹³Петру, Ягья, Якьубни Эндирей, ФилипӀни ТӀумай, БартӀаламайни МатӀай, Гьалфеян хва Якьуб, Симун Миллетбаз ва Якьубан хва Ягьуд Ярусалимдиз хтана винел алай кӀвале санал ацукьнавай.

¹⁴Абуру вирида сад хьана датӀана дуьаяр ийизвай. Абурухъ галаз са бязи папар, гьакӀни Исадин диде Майрам ва Адан стхаяр авай.

¹⁵Садра Петруди кӀватӀ хьанвай вишни къад кас кьван иманийрин вилик къарагъна, лагьана:

¹⁶— Стхаяр, Каламда Пак Руьгьди Давуд пачагьдин мецелди Ягьудакай виликамаз лагьай гафар кьилиз акъат тавуна жедачир. Чи арада аваз, чахъ галаз санал къуллугъ ийизвайтӀани, Ягьуда Иса кьаз кӀанз геле къекъвезвайбуруз Ам авай чка къалурна.

¹⁸Хаинвал авуналди къачур пулунихъ ада ник къачунай, гьа икӀ адан эхир пучни хьанай. Ам, кьилихъди акьуна, руфун пад хьана, ратарни чкӀанваз жагъанай.

¹⁹И крарикай Ярусалимда авай вирибуруз хабар хьанай ва а никӀиз абуру чпин чӀалал Гьакелдама, яни Ивидин Ник лагьана тӀвар ганай.

²⁰И крарикай Забурдани кхьенва: «Адан кӀвал ичӀи хьурай, ана чан алай касни тамукьрай» , ва: «Адан къуллугъдин чкани масада кьурай» .

²¹ГьакӀ хьайила, адан чкадал маса кас хкяна кӀанда. Герек, а кас Ягьяди Исадив цик акахьун къачуз таз эгечӀай чӀавалай та Иса чи патавай цаварал хъфей йикъалди Исадихъ галаз чи арада хьайи кас жен. А кас Исадал чан хтайвиликай чахъ галаз санал шагьидвал ийидайдини хьун лазим я.

²³Кьве касдин: Юст лакӀаб алай Юсуфан (адаз гьакӀни Барсаба лугьудай) ва МатӀидин тӀварар кьунай.

²⁴КӀватӀ хьанвайбуру дуьаяр авуна: — Я Ребби, Ваз виридан рикӀер аквазва, илчивиликай хкатна вичиз гьазурнавай чкадиз хъфей Ягьудан чкадал къуллугъ авун патал Вуна и кьведакай вуж хкядатӀа чаз къалура.

²⁶Ахпа абуру чип вегьена, чип МатӀидал аватна. Гьа икӀ, ам цӀусад илчидин жергедиз цӀикьвед лагьайди яз кьабулна.