Read Lezgi New Testament – ЦӀийи Икьрар Крар 11 Bible Online

Крар 11 - Lezgi New Testament – ЦӀийи Икьрар bible

Крар 11

¹Илчийриз ва Ягьудатда авай стхайриз Аллагьдин Гаф чувудар туширбуруни кьабулуникай хабар хьана.

²Петру Ярусалимдиз атайла, чувуд иманийри и кардин патахъай ана адаз ахмурар ийиз хьана.

³— Суьннет тавунвайбурун кӀвалериз фена, вуна абурухъ галаз ацукьна фу тӀуьна, — лугьузвай абуру.

⁴Петруди абуруз хьайи-хьайивал ахъайиз эгечӀна:

⁵— Яфа шегьерда за дуьаяр ийизвай, — лагьана ада. — Заз, дуьа ийизвай чӀавуз, ахварал алайдаз хьиз, ихьтин керемат акуна. Заз са ни ятӀани кьуд пӀипӀ кьуна цавай авадарзавай зурба суфра хьтинди акуна. Ам атана лап зи вилик акъвазна.

⁶Дикъетдив килигайла, заз адал гьайванарни ничхирар, чурчуларни къушар акуна.

⁷Ахпа заз ван атана: «Петру, къарагъ! Абур тукӀуна неъ».

⁸«Гьич са чӀавузни, я Ребби! — жаваб гана за. — Зи уьмуьрда за чиркин ва я гьарам затӀ тӀуьрди туш».

⁹Цавай атай ванци мад лагьана: «Аллагьди гьалал авур затӀуниз гьарам я лугьумир».

¹⁰Гьа икӀ пудра тикрар хьана, ахпа вири цавуз чӀугун хъувуна.

¹¹Гьа чӀавуз зун илифнавай кӀвалин патав пуд кас атана акъатна. Абур зи патав Кесардай ракъурнавайбур тир.

¹²Руьгьди заз са шакни тавуна абурухъ галаз алад лагьана. Захъ галаз а ругуд стхани рекье гьатна. Атана чун заз теклифай инсандин кӀвализ акъатна.

¹³Ада вичин кӀвале малаик акурдакай ва ам вичихъ галаз рахайдакай чаз ихтилат авуна. Малаикди адаз лагьана: «Яфадиз, Симун-Петру тӀвар алай касдиз эвериз ракъура,

¹⁴ада ваз жув ва жуван вири хизан гьикӀ хиласдатӀа ихтилатда».

¹⁵Зун рахаз эгечӀайла, лап сифтедай чак гьикӀ акатнатӀа, гьабурукни гьакӀ атана Пак Руьгь акатна.

¹⁶Гьанал зи рикӀел Реббиди лагьай гафар хтана: «Ягьяди инсанрив цик акахьун къачуз тунай, квев Пак Руьгьди гьахьиз тада».

¹⁷ГьакӀ хьайила, Ребби Иса Месигьдихъ иман авур чаз, хьтин пай Аллагьди абурузни ганватӀа, завай Аллагьдиз манийвал ийиз женни?

¹⁸Абуру Петрудиз мад туьгьметар хъувунач. Абуру Аллагьдиз шукурар ийиз, лугьуз хьана: — ГьакӀ хьайила, Аллагьди чувудар туширбурузни уьмуьрдихъ фин патал Аллагьдин рекьел къведай мумкинвал ганва.

¹⁹Истефас кьейидалай кьулухъ хурук кутуна Ярусалимдай катай иманийрикай са кьадарбур Финикидив, Куьпридив ва АнтӀиах шегьердив кьван агакьна. Абуру Аллагьдин Гафуникай анжах чувудриз хабар гузвай.

²⁰Катна атай иманийрин арада куьпривиярни киринейвияр авай. АнтӀиахдиз атайла, абуру Ребби Исадикай Шад Хабар чувудар туширбурузни гузвай.

²¹Абуруз Аллагьди куьмек гузвай, гзафбур Исадихъ ийизвай имандал атана Аллагьдихъ элкъвенай.

²²И вакъиадикай хабар Ярусалимдин иманийрин кӀватӀалдивни агакьна. Анай АнтӀиахдиз Барнаба ракъурна.

²³АнтӀиахдиз атайла, Барнабадиз Аллагьдин берекат акуна. Ам лап шад хьана. Ада цӀийиз имандал атайбуруз Аллагьдиз вири рикӀелди вафа хьана амукь лугьуз эверзавай.

²⁴Барнаба, лагьайтӀа, Пак Руьгьдив ацӀанвай имандаллай ва хъсан кас тир. Гзаф инсанар Реббидин рекьел атана.

²⁵Ахпа Шаул ахкун патал Барнаба ТӀарасдиз фена.

²⁶Адаз ам ана жагъана, ада Шаул АнтӀиахдиз хкана. Тамам са йисан къене Барнабани Шаул АнтӀиахдин иманийрин кӀватӀалда хьана, абуру гзаф инсанриз чирвилер гана. Тилмизриз месигьияр сифте АнтӀиахда лагьайди я.

²⁷И чӀавуз Ярусалимдай АнтӀиахдиз пайгъамбарар атана.

²⁸Абурукай Агъаба, Руьгь акатнаваз, Римдин пачагьлугъ михьиз каша кьадайдакай виликамаз малумарнай. (Клавдаса пачагьлугъ идара ийизвай вахтунда и кар хьунни авуна.)

²⁹ГьакӀ хьайила Ягьудатда авай стхайриз-вахариз тилмизри чпелай гьардалай алакьдай кьадар куьмек гун къарар кьабулна.

³⁰А къарар абуру кьилизни акъудна. Абуру, Барнабадивни Шаулав вугана, Ярусалимда авай иманийрин кӀватӀалдин чӀехибуруз чпи кӀватӀай пул-затӀ ракъурна.