Read Lezgi New Testament – ЦӀийи Икьрар Крар 12 Bible Online

Крар 12 - Lezgi New Testament – ЦӀийи Икьрар bible

Крар 12

¹Тахминан гьа и вахтунда Гьируд пачагьди иманийрикай са бязибур хурук кутаз хьана ва абуруз писвилер авуна.

²Ада Ягьядин стха Якьуб туруналди рекьиз тунай.

³Ихьтин крар чувудриз хуш жез акурла, ада Петруни кьунай. И кар ТӀили фарин суварин йикъара хьана.

⁴Къазаматда тур адал кьуд кӀеретӀ, гьар кӀеретӀда кьуд къаравул эцигна. Гьирудан къаст Песагь суварилай кьулухъ халкьдин вилик Петрудин дуван авун тир.

⁵Гьа икӀ Петру къазаматда авай, амма иманийрин кӀватӀалди акъваз тавуна адан паталай Аллагьдиз дуьаяр ийизвай.

⁶Гьирудаз Петрудин дуван ийиз кӀанзавай йикъан вилик квай йиф алукьна. Петру кьве зунжурдалди кутӀуннаваз, кьве аскердин юкьва ксанвай. Къазаматдин ракӀарални къаравулар алай.

⁷Садлагьана Реббидин малаик атана акъатна. Къазаматдин кӀвал экуьнив ацӀана. Малаикди Петрудин къвала эцяна, ам ахварай авудна. — Тадиз къарагъ! — лагьана малаикди. Петрудин гъилерал алай зунжурар ахъа хьана чилел аватна.

⁸— Кьилел-кӀвачел алукӀ, — лагьана малаикди. Петруди ада лагьайвал авуна. — Са чухва галчукна зи гуьгъуьна аваз ша, — лагьана малаикди.

⁹Петру малаикдин гуьгъуьна аваз къазаматдай экъечӀна. Адаз малаикди ийизвай крар гьакъикъатда жезвайбур тирди чизвачир. Адаз и кар ахварин хиялдай карагзавай хьиз тир.

¹⁰Абур сад ва кьвед лагьай къаравулрилай элячӀна, шегьердихъ физвай ракьун варарив атана агакьна. Варар чеб чпелай ахъа хьана, абур анай экъечӀна. Абур кьведни куьчедин атӀа кьилиз кьван акъатайла, малаик Петрудин вилерикай квахьна.

¹¹Петруди, вич вичел хтайла, лагьана: — Исятда зун рикӀивайни гъавурда гьатна хьи, Реббиди Вичин малаик ракъурна зун Гьирудан гъиляй акъудна, Ада зун чувуд халкьди заз кьазвай кардикай хиласна.

¹²Кьил кьилел хтайла, Петру Майраман кӀвализ фена. Майрам Ягьядин (адаз Маркни лугьузвай) диде тир. Ана дуьаяр ийиз гзаф иманияр кӀватӀ хьанвай.

¹³Петруди вар гатана — Реда тӀвар алай са къаравуш руш экъечӀна.

¹⁴Адаз Петру ванцелай чир хъхьана, шадвиляй варни ахъа тавуна, зверна фена кӀвализ гьахьна. — Петру хтана варарив гва! — лагьана Редади.

¹⁵— Вун кими хьанвани?! — лагьана адаз кӀвалевайбуру. Амма рикӀивайни Петру хтанва лугьуз къаравуш вичин гафунал акъвазна. И чӀавуз абуру лагьана: — Ам адан малаик я.

¹⁶Петруди вар гатазмай. Вар ахъайна, Петру акурла, абур мягьтел хьана амукьна.

¹⁷Петруди абуруз гъилелди кис хьухь лагьай ишара авуна, ахпа Реббиди вич гьикӀ къазаматдай акъуднатӀа ахъайна. — Куьне и кардикай Якьубазни амай стхайриз ахъая, — лагьана, вич инай масаниз фена.

¹⁸Экуьнахъ аскеррин арада зурба къалабулух гьатна. Петру гьиниз фенатӀа садан кьилни акъатзавачир.

¹⁹Гьируд адахъ виринра къекъвена, амма Петру жагъанач. Гьируда аскерривай силис кьуна, ахпа абур рекьин эмирна. Ахпа Гьируд Ягьудатдай Кесардиз фена, ам ана са кьадар вахтунда амукьна.

²⁰Гьирудаз Туьрс ва Сидун шегьеррин жемятрикай гзаф хъел авай, амма недай суьрсетдал гьалтайла, абур Гьирудан уьлкведилай аслу тир. Гьавиляй абуру вири сад хьана, пачагьдин ихтибар алай къуллугъдар БиластӀакай даях кьуна, чпиз ислягьвал тӀалабун патал, пачагьдихъ галаз чин-чинал гьалт жез алахънавай.

²¹Гьалтдай чӀав тайинарай юкъуз пачагьдин пекер алукӀна, Гьируд атана кьакьан тахтунал ацукьна, халкьдихъ элкъвена рахана.

²²Халкьди ван алаз гьарайна: — Чахъ галаз рахазвайди инсан ваъ, аллагь я!

²³Гьа и чӀавуз Гьируда Аллагь кваз кьунач лугьуз Реббидин малаикди ам яна. Ам чан аламаз къеняй куквари тӀуьна куьтягьна.

²⁴Амма Аллагьдин Гаф гегьеншдиз чкӀизвай, иманийрин кьадарни гзаф жезвай.

²⁵Барнабадини Шаула чпин хиве авай везифа Ярусалимда кьилиз акъудна. Ахпа абур Ягья-Маркни галаз элкъвена хтана.