Read Lezgi New Testament – ЦӀийи Икьрар Крар 15 Bible Online

Крар 15 - Lezgi New Testament – ЦӀийи Икьрар bible

Крар 15

¹АнтӀиахдиз Ягьудатдай атай са бязи инсанри иманийриз лугьуз хьана: — Куьн Мусади ганвай къайда тирвал суьннет тавуртӀа, куьн хилас жедач.

²И гафариз килигна, Павелни Барнаба а ксарихъ галаз чӀехи гьуьжетра гьатна. И месэладай кьил акъудун патал, Павелни Барнаба са кьадар иманиярни галаз Ярусалимдиз илчийринни чӀехибурун патав ракъурун кьетӀна.

³Иманийрин кӀватӀалда авайбуруз сагърай лагьана, абур рекье гьатна. Абур Финикидайни Самариятдай тӀуз фена, ана абуру чувудар туширбур Аллагьдин рекьел къвезвайдакай хабар гана. И хабарди вири иманийрик чӀехи шадвал кутуна.

⁴Ярусалимдиз атайла, абур иманийрин кӀватӀалди, илчийри ва чӀехибуру кьабулна. Павелани Барнабади Аллагьди чпин гъилералди авур вири крарикай ахъайна.

⁵Фарисейрин патал алай имандал атанвайбуру къарагъна, лагьана: — Имандал атанвай чувудар туширбур суьннет авун лазим я, гьабурувайни Мусадин Къанун кьилиз акъудун гьаркьна[6] кӀанда.

⁶И месэладин паталай меслятар ийиз илчиярни чӀехибур кӀватӀ хьана.

⁷Яргъал гьуьжетар хьайидалай кьулухъ Петруди къарагъна, лагьана: — Стхаяр, квез чизва хьи, куь арадай зун Аллагьди чувудар туширбур имандал гъун патал Шад Хабардикай муштулухар гуз хкяна тӀимил вахт туш.

⁸РикӀер аквазвай Аллагьди, чаз хьиз чувудар туширбурузни Пак Руьгь гуналди, гьабурни кьабулзавайди къалурна.

⁹Абуру Иса Месигьдихъ иман авурла, Аллагьди и имандалди абурун рикӀер михьна, абурунни чи арада авай тафават квадарна.

¹⁰ГьакӀ хьайила, я чавай, я чи бубайривай кьаз тахьай пар маса халкьарин арадай тилмизвилиз атайбурун хивез вегьиз, вучиз куьне Аллагь синагъ ийизва?

¹¹Гьабуру хьиз, чнани Ребби Исадин берекатдик кваз хилас жедайдахъ иман авунва эхир!

¹²И чӀавуз вирида кисна Павелазни Барнабадиз яб гузвай. Абуру чпин куьмекдалди Аллагьди маса халкьарин арада гьихьтин аламатар ва керемат-ишараяр къалурнатӀа суьгьбетзавай.

¹³Абуру куьтягьайла, Якьуба лагьана: — Стхаяр, захъ яб акала.

¹⁴Сифте яз Аллагь чувудар туширбурун къайгъу чӀугваз эгечӀна, абурукай Ада Вичин халкь авуникай чаз Симуна ахъайна.

¹⁵Адан гафарихъ галаз пайгъамбарри кхьенвайдини кьазва:

¹⁶«„Ахпа За элкъвена хтана Давудан ацахьнавай кӀвал туьхкӀуьр хъийида. А кӀвал За чкадиз хкида, За ам цӀийи кьилелай гуьнгуьна хутада.

¹⁷Амай инсанарни Зи ТӀвар янавай вири халкьар Реббидихъ къекъвез жедайвал“, — дегь чӀаварилай инихъ Вичин гафар малумарна кьилиз акъудай Реббиди икӀ лугьузва» .

¹⁹ГьакӀ хьайила за гьисабзава хьи, Аллагьдихъ элкъвезвай чувудар туширбурун вилик пад кьуна кӀандач.

²⁰Бутриз къурбанднавай тӀуьн, дуьз тукӀун тавунвай гьайванрин як, иви кумай як немир ва явавиликай яргъаз хьухь лагьана абуруз за чар кхьин теклифзава.

²¹Мусадин Къанун, лагьайтӀа, дегь чӀаварилай гьар са шегьерда чирзава ва синагугра гьар Киш юкъуз кӀелзава.

²²Илчийрини иманийрин кӀватӀалдин чӀехибуру амай вири иманийрихъ галаз санал, чпин арадай са шумуд кас хкяна, абур Павелахъни Барнабадихъ галаз санал АнтӀиахдиз ракъурун къетӀна. Абуру хкягъайбур Барсаба-Ягьудни Силав тир. И кьве кас иманийрин кьиле авайбур тир.

²³Иманийри абурув вугана ракъурай чарче икӀ кхьенвай: «Илчийрин ва иманийрин кӀватӀалдин чӀехибурун патай АнтӀиахдин, Суьриядин ва Киликатдин имандаллай маса халкьарикай тир стхайриз-вахариз саламар ракъурзава!

²⁴Куь кьилив чи патавай са бязи ксар атайди ва абуру чпин ихтилатралди куь арада гъулгъула тунва ва куь руьгьер теспача авунва лугьуз чаз ван хьана. Амма чна абуруз са эмирни авунвачир.

²⁵Иниз килигна чна чун вири кӀватӀ хьанвай чкадал са шумуд кас хкяна, абур играми Барнабадихъни Павелахъ галаз куь патав ракъурун кьетӀна.

²⁶Барнабани Павел чи Ребби Иса Месигьдин ТӀвар патал чпин чан эцигнавайбур я.

²⁷И чар гваз чна ракъурзавай Ягьудани Силава чпини и чарче авай гафар квез тестикь хъийида.

²⁸Пак Руьгьдизни чаз квел, са бязи къайдайрал куьне амал авунилай гъейри, са парни эцигна кӀанзавач:

²⁹бутриз къурбанднавай тӀуьн, дуьз тукӀун тавунвай гьайвандин як, иви кумай як немир, явавиликай яргъаз хьухь. И тагькимар куьне кьилиз акъудиз хьайитӀа, хъсан я. Куьн сагърай».

³⁰Ракъурнавайбур атана АнтӀиахдиз агакьна. Ана иманияр кӀватӀна, чпив гвай чар абурув вугана.

³¹Чарче авай руьгь кутадай гафар кӀелайла, абуруз хвеши хьана.

³²Ягьудни Силав чебни пайгъамбарар тир, абуру иманийриз кӀубанардай ва руьгь мягькемардай гзаф гафар лагьана.

³³Абур ана са кьадар вахтунда амукьна, ахпа иманийри абуруз хийир-дуьа авуна, абур иниз ракъурай ксарин патав рекье хтуна.

³⁵Павелни Барнаба АнтӀиахда амукьна. Ана абуру ва абурухъ галай гзаф масабуру Реббидин Гафуникай муштуллухар гузвай.

³⁶Арадай са кьадар вахт фейила, Павела Барнабадиз лагьана: — Ша, чна Реббидин Гафуникай хабар ганвай кьван шегьерриз фена, чи стхайрал-вахарал са кьил чӀугван, абур гьикӀ аватӀа килигин.

³⁷Барнабадиз вичихъ галаз Ягья-Маркни тухуз кӀанзавай.

³⁸Амма Павелаз Памфилда чеб гадарна чпин крарикай кьил къакъудай Марк чпихъ галаз тухуз кӀан хьанач.

³⁹Павеланни Барнабадин арада хци наразивилер гьатна, абур чара хьана. Барнаба, Маркни къачуна, Куьпридиз фена.

⁴⁰Павела вичиз Силав хкяна. Стхайри-вахари Павел Аллагьдин берекатдал аманатна, ам рекьиз экъечӀна.

⁴¹Павела Суьриядайни Киликатдай тӀуз фидай рекье иманийрик руьгь кутаз хьана.