Read Lezgi New Testament – ЦӀийи Икьрар Крар 16 Bible Online

Крар 16 - Lezgi New Testament – ЦӀийи Икьрар bible

Крар 16

¹Павел Дербедиз ва ЛуьстӀрадиз атана. Ана ТӀиматӀей тӀвар алай тилмиз авай. ТӀиматӀеян диде Исадихъ иман ийизвай чувуд, бубани юнан тир.

²ЛуьстӀрадани Канида авай иманияр ТӀиматӀеякай хъсан рахазвай.

³Павелаз вичихъ галаз ТӀиматӀейни къачуз кӀан хьана, гьакӀ хьайила ада ам суьннет авуна. И кар ада и чкайра авай чувудриз ТӀиматӀеян буба юнан тирди чир хьуниз килигна авунай.

⁴Шегьердай шегьердиз физ, Павелани адахъ галайбуру Ярусалимда илчийрини чӀехибуру кьабулай къайдайрикай иманийрал хабар агакьарзавай, абуру маса халкьарикай тир иманийриз и къайдайрал амал ая лугьузвай.

⁵Гьа икӀ кӀватӀалра авай иманияр имандал мягькем, абурун кьадарни югъ-къандавай артух жезвай.

⁶Абур Фиригъдайни ГалатӀдай яна физвай, Асия вилаятда Аллагьдин Гафуникай хабар чукӀурдай ихтияр абуруз Пак Руьгьди ганач.

⁷Муьсидин часпардал атана агакьайла, абуруз Битиндиз физ кӀан хьанай. Амма абур Исадин Руьгьди аниз ахъайнач.

⁸Абурни Муьсидин патавай яна Туругьасдиз фена.

⁹Йифиз Павелаз ахварай МакӀедандай тир инсан акуна. Ада кӀвачел акъвазна Павелаз минетзавай: — Тавакъу ийида, вун гьуьлелай элячӀна, чиниз ша, чаз куьмек ая.

¹⁰Павелаз акур и ахвардай чна Аллагьди чаз Шад Хабардикай муштулухар гуз аниз эверзавайди кьатӀана. Чунни гьасятда МакӀедандиз рекье гьатна.

¹¹Туругьасдай гимида аваз чун дуьз СаматӀракӀдал фена, гьанай пакагьан юкъуз чун Неапулдиз акъатна.

¹²Неапулдай чун римвийрин гъилик квай, МакӀедандин и паюнин кьилин шегьер тир ФилипӀриз атана. Ана чун са шумуд юкъуз хьана.

¹³Киш юкъуз шегьердин варарай экъечӀна, вацӀал фена. Чаз ана ибадат ийидай чка авай хьиз тир. Чун ана кӀватӀ хьанвай папарихъ галаз рахана.

¹⁴Абурун арада Туьатира шегьердай тир Лидият лугьудай са паб авай, адан пеше багьа парчаяр маса гун тир. Лидият Аллагьдиз ибадат ийизвай кас тир, Павелан гафар а папан рикӀе гьатун патал Реббиди адан рикӀ ахъайна.

¹⁵Лидията вичин кӀвале авай виридахъ галаз цик акахьун къачуна. Идалай гуьгъуьниз Лидията чун вичин кӀвализ мугьманвилиз кьетӀивилелди тухвана. — Куьне зун Реббидихъ иман ийизвай касдай кьазватӀа, атана заз мугьман хьухь, — лагьана ада. Чун рази хьана.

¹⁶Садра чун ибадат ийидай чкадал фидайла, рекье чал жинжи кьунвай къаравуш руш гьалтна. Жинжи рушан мецелай инлай кьулухъ жедай крарикай лугьудай. Фалбазвал авуналди руша вичин сагьибриз зурба хийирар гъизвай.

¹⁷Къаравушди, Павеланни чи гуьгъуьна гьатна, гьарайзавай: — И инсанар цавараллай Аллагьдин лукӀар я! Абуру квез хилас жедай рехъ къалурзава!

¹⁸А руша гзаф йикъара гьакӀ ийиз хьана. Эхирни бизар хьана, Павела чӀуру жинжихъ элкъвена лагьана: — Иса Месигьдин ТӀварцӀелай за ваз эмирзава, адакай хкат! Рушакай жин гьасятда хкатна.

¹⁹Чпиз хийир къвезвай чешме квахьайди чир хьайила, рушан иесийри Павелни Силав кьуна, абур шегьердин кьилевайбурун патав майдандал галчӀурна.

²⁰Павелни Силав шегьердин гьакимрин патав гъайибуру лагьана: — И инсанар чувудар я. Абуру вири шегьердик гъулгъула кутазва.

²¹Абур чал, римвийрал, чавай кьабулиз тежедай хьтин, къанундив кьан тийидай къайдаяр илитӀиз алахънава.

²²Халкьди Павелни Силав гъайибурун пад кьуна. Гьакимри абурулай пекер хтӀунна, лашаралди гатун эмирна.

²³Хъсандиз гатана абур къазаматдиз вегьена, къаравулдални абур мукъаятдаказ хуьх лугьуз тапшуругъ гана.

²⁴Гьа ихьтин эмир къачур къаравулди абурун кӀвачериз кӀарасдин тӀапӀар яна, абур къене пата авай къазаматдиз чуькьвена.

²⁵Йифен кьулариз Павелани Силава Аллагьдиз дуьаяр ийидайла ва тарифдин манияр лугьудайла, къазаматда авай муькуьбуру абуруз яб гузвай.

²⁶Садлагьана ахьтин кӀеви залзала хьана хьи, къазаматдин бинени кваз юзана. Къазаматдин вири ракӀарар ахъа хьана, къазаматнавай вирибурал алай зунжурар кутӀуннавай хкар цларай акъатна аватна.

²⁷Ахварай аватай къаравулдиз, ахъа хьайи ракӀарар акурла, къазаматда авай вирибур катнавай хьиз хьана. Гьавиляй ада тур акъудна ва вичи вич яна рекьиз кӀан хьана.

²⁸Амма Павела кӀевиз гьарайна: — Жуван чандиз къаст ийимир! Чун вири ина ама!

²⁹Къаравулди экв куькӀуьрун эмирна ва ам тадиз къазаматнавайбур авай чкадиз гьахьна. Чандик зурзун акатна, ам фена Павеланни Силаван кӀвачерик ярх хьана.

³⁰Ада абур анай акъудна, хабар кьуна: — Агъаяр, жув хиласун патал за вуч авун лазим я?

³¹— Ребби Исадихъ иман ая, — лагьана абуру, — гьакӀ авурла, вунни хилас жеда, ви хизанни.

³²Абуру адазни адан кӀвале авай вирибуруз Реббидин Гаф лагьана.

³³Йифен и геж вахтунда къаравулди абур вичин кӀвализ тухвана, абурун хирер чуьхвена, ахпа ам ва адан кӀвалевайбуруни цик акахьун къачуна.

³⁴Ада Павелни Силав вичин кӀвализ хкана, абуруз хъсан тӀуьн-хъун гана. Чеб Аллагьдихъ ийизвай имандал атанва лугьуз ам ва адан хизан гзаф шад хьанвай.

³⁵Югъ алукьна. Гьакимри къазаматдиз вач-хъшаяр ракъурна. Абуру къаравулдиз Павелни Силав къазаматдай азад ая лагьана эмир гана.

³⁶Къаравулди Павелаз и кардикай хабар гана лагьана: — Гьакимри куьн къазаматдай ахъая лагьана эмирнава! Квевай хъфейтӀа жеда, квез хъсан рехъ хьурай!

³⁷Амма Павела гьакимрин вач-хъшайриз лагьана: — Чун Римдин ватанэгьлияр хьунизни килиг тавуна, абуру дуван тавуна чун халкьдин вилик гатана, къазаматдиз вегьена. Гила абуруз, а кардикай садазни чир тежедайвал, чун чпелай элягъиз кӀанзавани? Ваъ! Абур иниз чеб атана, чпи чун инай акъудрай.

³⁸Вач-хъшайри Павеланни Силаван гафар гьакимрал агакьарна. Павелни Силав Римдин ватанэгьлияр тирдакай чир хьайила, гьакимриз кичӀе хьана.

³⁹Абуру атана гъил къахчун тӀалабна. Гьакимри абурувай къазаматдай экъечӀна, шегьердай масаниз хъфин тӀалабна.

⁴⁰Къазаматдай экъечӀна, Павелни Силав Лидиятан кӀвализ фена. Абуру ана авай иманийрин руьгь кӀубанарна. Адалай гуьгъуьниз абур чпин рекьиз экъечӀна.