Read Lezgi New Testament – ЦӀийи Икьрар Крар 18 Bible Online

Крар 18 - Lezgi New Testament – ЦӀийи Икьрар bible

Крар 18

¹Гьадалай кьулухъ Афинаяр туна, Павел Каринфдиз фена.

²Ана адал ПӀунтӀасдай тир Акуьл лугьудай са чувуд ва адан паб ПрискӀа гьалтна. Абур Италдай и мукьвара атанвайбур тир, вучиз лагьайтӀа Клавдас пачагьди вири чувудриз Римдай экъечӀна хъфин эмирнавай. Павел абурун патав фена.

³Павелни Акуьла са пешедин устӀарар тир — абуру алачухар цвадай, гьакӀ хьайила Павел абурухъ галаз кӀвалахиз амукьна.

⁴Гьар Киш юкъуз ам синагугда чувударни муькуьбур вичин чӀалал гъиз алахъзавай.

⁵МакӀедандай Силавни ТӀиматӀей хтайла, Павела вири вичин вахт вязер ийиз серфна. Ада чувудриз Иса — Месигь я лугьуз шагьидвал ийизвай.

⁶Чувудри и карда адаз акси жез, адан хатурдик хкуьрайла, ада вичин пекерал ацукьнавай руг югъурна абуруз лагьана: — Куьн кьиникьин тахсир куьди жеда! Зак са тахсирни квач, гила за фена маса халкьарикай тирбуруз чирвилер гуда.

⁷Синагугдай экъечӀна ам Аллагьдиз ибадат ийизвай Юст ТӀитӀес лугьудай касдин кӀвализ фена. Адан кӀвал синагугдин патав гвай.

⁸Синагугдин кьиле авай Криспа ва адан вири хизан Реббидихъ ийизвай имандал атана. Павелаз яб гайи гзаф кьадар каринфвийрини, имандал атана, цик акахьун къачуна.

⁹Са йифиз Павелаз ахварай Реббиди лагьана: — КичӀе жемир, вахъ Зун гала. И шегьерда зи инсанар гзаф ава, вак хкӀадай са касни жедач. Гьавиляй рахух, кисмир.

¹¹Аллагьдин Гафуникай чирвилер гуз, Павела ана йисни зур акъудна.

¹²Галиян Ахайда гьаким тир чӀавуз чувудар, вири сад хьана, Павелал гьавалат хьана. Ам кьуна абуру дувандиз гъана

¹³ва лагьана: — И кас, Къанундив кьан тийизвайвал Аллагьдиз ибадат ая лугьуз, инсанар вичин рекьиз гъиз алахънава.

¹⁴Павела сивяй гаф акъуддалди, Галияна элкъвена чувудриз лагьана: — Чувудар, куьне и касди чӀехи са чӀуру кар авуна лагьана адак тахсир кутазвайтӀа, за квез яб гудай.

¹⁵Амма гьуьжет гафарикай, тӀварарикай ва куь Къанундикай физватӀа, абурай кьил куьне акъуда. Заз и крара дуванбег жез кӀанзавач.

¹⁶Галияна абур дуванханадай акъуд лагьана.

¹⁷Инал халкьди синагугдин кьиле авай СастӀен кьуна, дуванханадин вилик адаз гатун кьуна, амма Галияна и кардиз гьич ябни ганач.

¹⁸Са кьадар вахтунда Павел Каринфда амукьна. Ахпа, иманийриз сагърай лагьана, ам гимида аваз Суьриядиз фена. Адахъ галаз ПрискӀа ва Акуьл рекье гьатна. Кинхерейдай экъечӀдалди, Аллагьдин вилик авур вяд куьтягь хьунин лишан яз, ада уьлгуьчдалди вичин кьил твана.

¹⁹Абур Эфесдиз акъатна. ПрискӀа ва Акуьла гьана туна, Павела фена синагугда чувудрихъ галаз ихтилатар ийиз хьана.

²⁰Абуру адавай чпихъ галаз са кьадар вахтунда амукьун тӀалабна, амма ам рази хьанач.

²¹— Аллагьди гайитӀа, куь патав зун мад хкведа, — хъфидайла, лагьана ада. Павел гимида аваз Эфесдай хъфена.

²²Кесардиз атана, гимидай эвичӀна, винелди Ярусалимдиз фена, ана авай иманийрал кьил чӀугуна. Анай ам АнтӀиахдиз рекье гьатна.

²³Са кьадар вахт АнтӀиахда акъудна, шегьердай шегьердиз физ, ГалатӀни Фиригъ тирвал къекъвез, Павела вири тилмизрин руьгь генани мягькемарзавай.

²⁴Гьа чӀавуз Эфесдиз АпӀалас лугьудай са чувуд атана. Вич Искендерандай тир АпӀалас кӀелнавай инсан тир. Калам адаз хъсандиз чидай.

²⁵Реббидин рекьикайни адаз хъсандиз чирвилер ганвай. Адаз чизвайди анжах Ягьяди цик акахьун къачу лугьузвайди тиртӀани, ада лап рикӀивай ва галай-галайвал инсанриз Исадикай чирвилер гузвай.

²⁶Ам гьа идакай синагугда викӀегьвилелди рахаз эгечӀна. ПрискӀадизни Акуьлаз адан ван хьайила, абуру ам чпин кӀвализ тухвана Аллагьдин рехъ вуч затӀ ятӀа мадни дуьм-дуьз чирвилер хгана.

²⁷АпӀаласаз Ахайдиз физ кӀан хьайила, Исадихъ иманийри адаз хъсан рехъ хьурай лагьана. Абуру Ахайда авай тилмизриз АпӀалас кьабулун паталай чарни кхьена. Аниз атана агакьайла, ада Аллагьдин берекатдик кваз имандал атайбуруз зурба куьмекар гана.

²⁸АпӀаласа халкь авай чкайра чувудрихъ галаз ийизвай гьуьжетра, абурун фикирар дуьз туширди къалурдай, Каламдикай бине кьуна, Иса — Месигь тирди чӀалахъ жедайвал субутдай.