Read Lezgi New Testament – ЦӀийи Икьрар Крар 20 Bible Online

Крар 20 - Lezgi New Testament – ЦӀийи Икьрар bible

Крар 20

¹Къалар куьтягь хьайила, Павела, тилмизар кӀватӀна, абурук руьгь кутуна. Абуруз сагърай лагьана, ам МакӀедандиз рекье гьатна.

²Фидай рехъди ада иманияр кӀубанар ийизвай. Юнандиз атайла,

³ада ана пуд варз акъудна. Суьриядиз фидай арада, чувудриз адаз акси яз чӀуру къаст ийиз кӀан хьайила, ада МакӀедандай яна элкъвена хтун кьетӀна.

⁴Хъфидайла адахъ бериви Пуьран хва УспатӀрус, Саланикдай тир АристӀархни СекӀунд, Дербедай тир Гай, ТӀиматӀей, Асия вилаятдай тир Тирафимни Туьхик галай.

⁵Абуру, чалай вилик фена, чун Туругьасда вилив хуьзвай.

⁶Чун ТӀили фарин суварилай кьулухъ ФилипӀрай гимида аваз фена ва вад йикъалай Туругьасда абурук акахьна. Ана чун ирид юкъуз амукьна.

⁷Гьафтедин сад лагьай юкъуз[8], чун фу атӀуз кӀватӀ хьана. Павела кӀватӀ хьанвайбурухъ галаз ихтилатзавай. Адаз пакад юкъуз хъфиз кӀан хьайивиляй, ихтилатар кьуланфералди давам хьана.

⁸Чун кӀватӀ хьанвай винел алай кӀвале гзаф чирагъар кузвай.

⁹ДакӀарда ЭвтӀих лугьудай жегьил гада ацукьнавай. Павел рахазвайла, гада ахварин хиялда гьатзавай. Ахпа, михьиз ахварал фейила, ам пуд лагьай гьавадай аватна. Фена хкажайла, ам кьенваз жагъана.

¹⁰Павел кӀаник эвичӀна, жегьил гададин винел ярх хьана, ам къужахда кьуна. — Архайин хьухь, — лагьана. — Адал чан ала!

¹¹Павел мад кӀвализ хкаж хъхьана. Ада фу атӀуз тӀуьна. Экв жедалди ада суьгьбетар авуна, пакамахъ ам анай хъфена.

¹²Жегьил гадани саламат яз кӀвализ хкана. И карди виридаз гзаф хвеши авуна.

¹³Гимида аваз чун Асасдиз фена. Ана Павелни чак акахьун лазим тир. Чун ина вичел вил алаз акъвазунин патахъай ада вичи лагьанай, амма адаз вичиз къураматдин рекьяй физ кӀан хьана.

¹⁴Асасда ам чи вилик экъечӀна, чи гимидиз акьахна, чун вири Муьтленадиз фена.

¹⁵Анай пакагьан юкъуз чун Хигьасдилай алатна фена. Са югъ арадай фейила, чун Самасдиз, мадни са йикъалай Милетдиз агакьна.

¹⁶Асия вилаятда геж тахьун патал Павела Эфесда акъваз тавуна фин меслятна. Адаз, агакьиз хьайитӀа, Ярусалимдиз ЯхцӀурни цӀуд лагьай йикъан суварик физ кӀанзавай, гьавиляй адак тадини квай.

¹⁷Эфесдин иманийрин кӀватӀалдин кьиле авайбур атун патал Павела Милетдай инсанар ракъурна.

¹⁸Абур атайла, ада абуруз лагьана: — Асия вилаятдиз атай сифте йикъарилай эгечӀна за ина, куь арада, гьикӀ уьмуьр тухванатӀа, квез чизва.

¹⁹Чувудри зи кьилел гъайи еке синагъризни килиг тавуна, за муьтӀуьгъдаказ, вилел нагъв алаз Аллагьдиз къуллугъна.

²⁰Квез хийир гудай са карни за квекай чуьнуьхнач, гьам халкь алай чкайрални, гьам куь кӀвалерани за квез вязер авуна ва чирвилер гана.

²¹За чувудризни муькуьбуруз абур Аллагьдин рекьел атун ва чи Ребби Исадихъ иман авун лазим тирди малумарзавай.

²²Ингье, исятда зун Руьгьдин гуьгъуьнаваз Ярусалимдиз физва, заз ана вуч жедатӀани чизвач.

²³Заз анжах чизва хьи, гьар са шегьерда Пак Руьгьди зи кьилел къведай азаб-азиятрикай ва зун къазаматда гьатдайдакай заз виликамаз хабарзава.

²⁴Амма заз жуван уьмуьр са квяйни аквазвач. Заз кӀанзавайди Ребби Иса Месигьди зал Аллагьдин берекетдикай шагьидвал ая лагьана ганвай тапшуругъ кар кьилиз акъудун я.

²⁵Куь арада за Аллагьдин пачагьвиликай малумарнай. Гила заз чизва хьи, квекай садазни мад зун ахквадач.

²⁶ГьакӀ хьайила за квез къе лугьузва: Са вуж ятӀани телеф хьайитӀа, тахсир зиди жедач.

²⁷За квез, са затӀни чуьнуьх тийиз, Аллагьдин вири къастуникай лагьанай.

²⁸Пак Руьгьди Вичи квекай иманийрин суьруьдин чубанар авуна. Жувал ва Аллагьди Вичин Ивидалди кӀватӀай иманийрал вил алаз хьухь, абурув чӀуру крар ийиз тамир.

²⁹Заз чизва хьи, зун инай хъфейла, куь патав пехъи жанавурар къведа, абуру суьруьдиз инсаф ийидач.

³⁰Гьатта куь арадайни тапан несигьатар гудайбур акъатда, абуруз тилмизар чпин рекьел гъиз кӀан жеда.

³¹ГьакӀ хьайила мукъаят хьухь! За, вилерал нагъв алаз, датӀана пуд йисан къене квез гьар садаз несигьатар гайиди рикӀел хуьх!

³²Исятда за куьн Аллагьдал ва Адан берекатдикай лугьузвай Гафунал аманатзава. И Гафунихъ куьн мягькемардай къуват ава, Аллагьди квез, Вичиз талукь виридаз, хиве кьурди гуда.

³³Заз гьич садавайни я гимиш, я къизил, я пекер къачуз кӀан хьайиди туш.

³⁴Зи ва зи юлдашрин фу зи жуван гъилерин зегьметдалди гьатнавайди квез чизва.

³⁵Ребби Исадин «Гузвай кас къачузвайдалай бахтлу я» лугьудай гафар датӀана рикӀел хвена, за вири крара ажузбуруз куьмек гана. Гьа икӀ, жуван къуватар гьайиф татана зегьмет чӀугуналди, куьнени гьа икӀ авуна кӀандайди за квез къалурна.

³⁶И гафар лагьана Павела, виридахъ галаз санал метӀер чилиз яна, дуьа авуна.

³⁷Вирида, шехьиз ва ам къужахда кьаз, адаз теменар гузвай.

³⁸Абуруз иллаки «мад квез зун ахквадач» лагьай адан гафари хажалат авунвай. Павел абуру гимидал кьван рекье туна.