Read Lezgi New Testament – ЦӀийи Икьрар Крар 21 Bible Online

Крар 21 - Lezgi New Testament – ЦӀийи Икьрар bible

Крар 21

¹Абурухъ галаз чара хъхьана, чун гьуьлуьз экъечӀна ва дуьм-дуьз Кус атӀадал фена. Пакагьан юкъуз чун Радасдиз агакьна. Гьанайни ПатӀарадиз фена.

²Ана Финикидиз физвай гими жагъурна, гьада аваз рехъ давамарна.

³Куьпри аквадайвал кьибле патай яна Суьриядиз фена. Туьрс шегьерда чи гими акъвазарна, адай парар авудна.

⁴Ина чна Исадин тилмизар жагъурна, абурухъ галаз ирид югъ акъудна. Са бязибуру, Руьгьди эсердик кутунваз, Павелаз Ярусалимдиз фимир лугьуз минетна.

⁵Вахт атана агакьайла, чун чи рекьиз физ гьазур хьана. Вири иманияр, абурун папарни аялар чун рекье тваз шегьердай гьуьлуьн къерехдал кьван экъечӀна. Ана чна метӀер чилиз яна дуьаяр авуна.

⁶Чун, сада садаз сагърай лагьана, гимидиз акьахна. Абурни чпин кӀвалериз хъфена.

⁷Гимида аваз рехъ давамарна, чун Туьрс шегьердай Питалмасдиз атана. Гьана стхайрал-вахарал кьил чӀугуна, абурухъ галаз са югъ акъудна.

⁸Гуьгъуьнин юкъуз анай Кесардиз рекье гьатна. Ина Шад Хабар чукӀурзавай ФилипӀан кӀвале акъвазна. Ам Ярусалимдин иманийрин кӀватӀалди тайинарнавай ирид шемасдикай сад тир.

⁹Адахъ гъуьлуьз тефенвай кьуд руш авай, абурувай пайгъамбарвал ийиз жедай.

¹⁰Чун ина аваз са шумуд югъ алатайла, иниз Ягьудатдай пайгъамбар Агъаб акъатна.

¹¹Ам чи патав атана, ада Павелан чӀул къачуна вичин гъилер, кӀвачер кутӀунна ва лагьана: — Пак Руьгьди лугьузва хьи, Ярусалимда и чӀулунин агъа чувудри гьа икӀ кутӀунна римвийрин гъиле твада.

¹²И гафар чаз ван хьайила, чна ва чкадинбуру Павелаз Ярусалимдиз фимир лугьуз минет ийиз хьана.

¹³Амма Павела жаваб яз лагьана: — Шелар ийиз куьне зи рикӀ вучиз падзава? Зун неинки къазаматда ацукьиз, гьакӀ Ребби Исадин хатурдай Ярусалимда чанни гуз гьазур я.

¹⁴Ам чӀалал гъиз тахьайла, чун секин хьана. — Къуй Аллагьдиз кӀандайвал хьурай, — лагьана чна.

¹⁵Са шумуд йикъалай чун рекье гьатиз гьазур хьана ва Ярусалимдиз фена.

¹⁶Чахъ галаз Кесардай са бязи тилмизарни атана. Абуру чун Минасунан кӀвализ гъана, чун гьана амукьна. Куьпридай тир Минасун лап фадлай Исадин тилмиз тир.

¹⁷Ярусалимда иманийри чун хушвилелди кьабулна.

¹⁸Пакагьан юкъуз Павел чахъ галаз Якьубан патав фена. Ана иманийрин чӀехибур вири кӀватӀ хьанвай.

¹⁹Салам гайидалай кьулухъ, Павела вичив маса халкьарин арада Аллагьди ийиз тур крарикай галай-галайвал ихтилатна.

²⁰Адаз яб гайибуру Аллагьдиз шукурар авуна. Ахпа абуру Павелаз лагьана: — Гила ваз, стха, имандал атанвай чувудар шумуд агъзур кас аватӀа чидани? Абуру вирида гьакъисагъвилелди[9] Къанундал амалзава.

²¹Вуна, маса халкьарин арада уьмуьр тухузвай вири чувудриз Мусадин Къанундикай къерех хьухь, аялар мад суьннет хъийимир ва чи къайдаяр кьуна ацукьмир лугьузвай ванер абуруз атанва.

²²Чна вуч авун лазим я? Абуруз, гьелбетда, вун атанвайдакай хабар жеда.

²³ГьакӀ хьайила чна гудай меслятдиз яб це. Чи арада Аллагьдин вилик вяд авур кьуд кас ава.

²⁴Гьабурни галаз фена адет тирвал михьивилер ая, абуру гана кӀандай пулни вуна це, гьа и чӀавуз абурувай Аллагьдин вилик авур вяд куьтягь хьунин лишан яз кьилерни тваз жеда. Гьа икӀ авуртӀа, вуна Къанундихъ галаз кьадайвал уьмуьр тухузвайди виридаз аквада. Вакай чукӀурнавай хабарар тапанбур тирди виридаз малум жеда.

²⁵Маса халкьарикай яз имандал атанвайбуруз, лагьайтӀа, чна абуру кьилиз акъудна кӀанзавай ихьтин къайдаяр авай чар кхьенай: бутриз къурбанднавай тӀуьн, дуьз тукӀун тавунвай гьайвандин як, иви кумай як немир, явавиликай яргъаз хьухь.

²⁶Пакагьан юкъуз а ксарихъ галаз фена, Павела абурухъ галаз санал михьивилер авуна. Ахпа ада, Аллагьдин КӀвализ гьахьна, чпин михьивилерин вахт куьтягь жедай югъ хахамриз малумарна. И юкъуз Павелани адахъ галай кьуд касди къурбандар авун лазим тир.

²⁷Михьивилер авуна ирид югъ алатзавайла, Павел Аллагьдин КӀвале аваз акур Асия вилаятдай тир са шумуд чувудди футфа кутуна халкьдив Павел кьаз туна

²⁸ва гьарайиз эгечӀна: — Исраилвияр! Чи куьмекдиз ша! Виринра чи халкьдиз, чи Къанундиз ва и Чкадиз акси гафар лугьуз виридаз чирвилер гузвай кас гьа им я. Ада Аллагьдин КӀвализ чувудар туширбурни кваз гъанва, гьадалди ада и пак Чка чиркин авунва.

²⁹Виликдай абуруз Павелахъ галаз шегьерда Эфесдай тир Тирафим акунай, гьакӀ хьайила абуру ам Павела вичихъ галаз Аллагьдин КӀвализ гъанва лагьана фикирнай.

³⁰Вири шегьерда гъулгъула гьатна. Кьуд патахъай къвез инсанар кӀватӀ жезвай. Павел кьуна, Аллагьдин КӀваляй галчӀурна акъудна. Гьанин варарни гьасятда кӀевна.

³¹Абуруз ам рекьидай ният авай чӀавуз вири Ярусалимда гъулгъула гьатнавайдакай шегьерда авай Римдин кьушундин кьилевайдаз хабар гана.

³²Ам, тадиз са шумуд эфсерни аскер галаз халкьдин арадиз гьахьна. Абур акурла, къал къачунвайбуру Павелаз кьазвай гатунар акъвазарна.

³³Кьушундин кьилевайда Павел кьуна ам кьве зунжурда тун эмирна. Эфсерди халкьдивай гатазвай кас вуж я, ада вуч авуна лагьана хабар кьуна.

³⁴Халкьдин арадай садбуру са гафар, муькуьбуру маса гафар гьарайзавай. Гъулгъуладин гъиляй адаз са тайин жаваб жагъун тавурла, ада Павел къеледиз тухун эмирна.

³⁵Абур къеледин гурарив агакьайла, халкь акӀ туьнт хьана хьи, аскерар Павел гъилерал алаз тухуниз мажбур хьана.

³⁶Халкьди абурун гуьгъуьниз физ-физ: — Ам яна йикь! — лугьуз гьарайзавай.

³⁷Аскерри Павел къеледин къенез тухузвайла, ада кьушундин кьилевайдаз лагьана: — Жечни квевай са кар тӀалабайтӀа? — Яъ, вун юнан чӀалал рахазвани?! — жаваб яз хабар кьуна кьушундин кьилевайда. —

³⁸АкӀ ятӀа, вун и мукьвара къалар акъудна, кьурумдиз кьуд агъзур къачагъ галаз катай мисриви туш ман?

³⁹— Зун чувуд я, — жаваб гана Павела, — Киликатда авай ТӀарас лугьудай тӀвар-ван авай шегьердин эгьли я. За тавакъу ийида, заз халкьдихъ элкъвена рахадай ихтияр це.

⁴⁰Кьушундин кьилевайда ихтияр гайила, Павела гурарал акъвазна халкьдиз гъилелди ишара авуна. Халкь кисайла, ам чувуд чӀалал рахаз эгечӀна.