Read Lezgi New Testament – ЦӀийи Икьрар Крар 22 Bible Online

Крар 22 - Lezgi New Testament – ЦӀийи Икьрар bible

Крар 22

¹— Бубаяр, стхаяр, куьне заз жув хуьн паталай кьве гаф лугьудай ихтияр це, — лагьана Павела.

²Ам чувуд чӀалал рахаз акурла, абур вири михьиз кис хьана. Ада давамарна:

³— Зун чувуд я, зун Киликатда авай ТӀарасда хана. И Ярусалим шегьерда заз тербия гана. Чи бубайрин Къанун Гамалила заз лап хъсандиз чирна. Инал акъвазнавай куьн хьиз, зунни Аллагьдин весияр рикӀивай кьилиз акъудиз алахъна.

⁴Зун Исадин рекьел атайбур хурук кутаз ва абур рекьидай рекьер жагъуриз хьана. За, итимарни, папарни кьаз, къазаматриз вегьидай.

⁵Кьилин хахамдивайни Меслягьатдивай а крарин шагьидвал ийиз жеда. За абурувай Шамдиз фин патал стхайриз кхьенвай чарни къачунай. Аниз фейила, вири иманияр кьаз ва Ярусалимдиз хкана абуруз жаза гуз кӀанзавай.

⁶Физвай рекье, нисинриз хьиз Шамдиз агакьзавайла, садлагьана цаварай атай къати рапрапди зун экуь авуна.

⁷Зун чилел ярх хьана, заз захъ элкъвена рахазвай са ван хьана: «Шаул! Я Шаул! Вуна Зун вучиз хурук кутазва?»

⁸«Вун вуж я, я Агъа?» — хабар кьуна за. «Зун вуна хурук кутазвай Назаретдай тир Иса я», — жаваб гана Ада заз.

⁹Захъ галай юлдашриз экв акунай, амма заз атай ван абуруз атанач.

¹⁰За хабар кьуна: «Я Ребби, за вуч авун лазим я?» «Къарагъна Шамдиз алад, — жаваб гана Реббиди, — Аллагьди ваз ая лагьанвай вуна авуна кӀандай крарикай ваз ана лугьуда».

¹¹Аллагьдин баркалладин экуьни зун буьркьуь авуниз килигна, юлдашри гъил кьуна, зун Шамдиз гъана.

¹²Ана Гьанани лугьудай са кас зи патав атана. Ам Аллагь рикӀел алай, Мусадин Къанундал амалзавай инсан тир, ана авай вири чувудрин арада адаз зурба гьуьрмет авай.

¹³Зи патав атана, зи вилик акъвазна, ада лагьана: «Шаул стха, ви вилериз экв хтурай!» Зи вилер гьасятда ахъа хъхьана, заз ам акуна.

¹⁴«Чи бубайрин Аллагьди вун хкяна, ви гьакъиндай Вичин къаст ваз къалурна, — лагьана ада. — Ваз Гьахъ-Михьиди акуна, ваз Адан Гафар ван хьана,

¹⁵вучиз лагьайтӀа акурдакайни ван хьайидакай вавай шагьидди хьиз виридан вилик ихтилат ийиз жеда.

¹⁶Вучиз вуна гежарзава? Къарагъ, цик акахьун къачу, жув гунагьрикай михьи авуна, Адан ТӀвар яхъ».

¹⁷Элкъвена Ярусалимдиз хтана, за Аллагьдин КӀвале дуьаяр ийидайла, заз зун ахварал алай хьиз хьана.

¹⁸Заз Ребби акуна. Ада заз лагьана: «Тадиз Ярусалимдай ахлад, ина авайбуру вуна Закай авур шагьидвал кьабулдач».

¹⁹«Я Ребби, — жаваб гана за, — вахъ иман ийизвай вири ксар кьаз, синагугра гатай ва абур къазаматда тваз хьайи кас зун тирди и инсанриз хабар ава.

²⁰Ви шагьид хьайи Истефас кьиникьиз акъудайлани зун гьанал алай, за къван гайибурун пад кьунай. За ам кьейибурун пекер хуьзвай».

²¹Инал Реббиди лагьана: «Алад, За вун яргъал уьлквейрин халкьарин патав ракъурзава».

²²И гафарал къведалди халкьди Павелаз яб гузвай, амма и гафар лугьунни кумаз, абур гьарайиз эгечӀна: — Ам дуьньядилай терг ая, адал чан туна виже къведач!

²³Абуру гьарайиз, чпин абаяр гадариз, руг хчализ цавуз ахъайдайла,

²⁴кьушундин кьилевайда Павел къеледиз твах лагьана эмирна. Вучиз халкьди адаз икьван гьарайзаватӀа чириз кӀанз ада ам гатана силис твах лагьана.

²⁵Гатун патал Павел кутӀунзавайла, патав акъвазнавай эфсердиз ада лагьана: — Римдин къанунди гьахъ-дуван тавунвай Римдин ватанэгьли гатадай ихтияр гузвани?

²⁶И гафар ван хьайила, эфсерди фена кьушундин кьилевайдаз лагьана: — Куьне вуч ийизва? А инсан Римдин ватанэгьли я.

²⁷Павелан патав фена, кьушундин кьилевайда адавай хабар кьуна: — Лагь кван заз, вун рикӀивайни Римдин ватанэгьли яни? — Эхь, — лагьана жаваб гана Павела.

²⁸— Римдин ватанэгьли хьун патал за гзаф пул гайиди тир, — лагьана кьушундин кьилевайда. — Зун Римдин ватанэгьли яз хайиди я, — лагьана жаваб гана Павела.

²⁹Адавай силис кьаз кӀанзавайбур садлагьана кьулухъ хьана. Вичи Римдин ватанэгьли зунжурра турди кьатӀайла, кьушундин кьилевайдакни къалабулух акатна.

³⁰Чувудри адан хиве вуч тахсир твазватӀа, авайвал чирун патал ада пакад юкъуз вири чӀехи хахамар ва Меслягьат кӀватӀун эмирна. Ада Павел азадна ва аниз гъана, гьабурун вилик акъвазарна.