Read Lezgi New Testament – ЦӀийи Икьрар Крар 24 Bible Online

Крар 24 - Lezgi New Testament – ЦӀийи Икьрар bible

Крар 24

¹Вад югъ алатайла, кьилин хахам Гьанани Кесардиз атана. Абуру Павелак гьихьтин тахсир кутунватӀа сердердиз къалурна. Адахъ са бязи агъсакъалар ва дувандал рахун патал хкянавай Тертуьл лугьудай са кас галай.

²Павел дуванханадиз гъайила, анал Тертуьл Павелак кутазвай тахсирдикай рахана: — Жанаби Феликс! Вун себеб яз чи уьлкведа ислягьвал ава. Вуна, камал гваз халкьдин гьакимвал авуналди, адан уьмуьр хъсанарзава. Вири и дегишвилер чна кьабулзава ва уьлкведин вири пипӀера халкьди ваз рикӀин сидкьидай сагърай лугьузва.

⁴Вавай вахт къакъуд тавун патал, за куьрелди лугьуда. За вавай регьимдалди яб гун тӀалабзава.

⁵Чаз и инсан халкьдик гъулгъула кутазвайди яз чида. Ада вири дуьньяда, вири Ягьудатда къал твазва, ва ам назаретвийрин кӀватӀал тӀвар алайбурун кьил я.

⁶Ам гьатта чи Аллагьдин КӀвал чиркин ийизни алахънай. Гьа чӀавуз чна ам кьунни авунай. Вуна адавай силис кьурла, чна адак тахсирар кутун дуьз кар тирдахъ вунни чӀалахъ жеда.

⁹Чувудри Тертуьлан пад кьуна Павелак кутазвай тахсирар гьахъбур я лагьана.

¹⁰Сердерди Павелаз рахадай ихтияр гайила, ада лагьана: — Вун и уьлкведа халкьдин дуванбег яз са шумуд йис тирди заз хабар ава, гьакӀ хьайила ви вилик жув хуьн патал рахадай мумкинвал хьунал зун шад я.

¹¹Зун ибадат авун патал Ярусалимдиз атана цӀикьвед йикъалай гзаф туширди вавай регьятдиз чириз жеда.

¹²Зак тахсирар кутазвайбуруз за Аллагьдин КӀвале, синагугра ва шегьерда са нихъ галаз ятӀани гьуьжетар ийиз ва я халкьдин арада гъулгъула тваз акунач.

¹³Исятда зак кутазвай тахсирар абурувай са куьналдини субутариз жедач.

¹⁴ЯтӀани, за чи бубайрин Аллагьдиз, Адан рекьел алайда хьиз ибадат ийизвайди хиве кьазва. Чувудри, лагьайтӀа, за кьунвай рехъ чӀуру чирвал яз гьисабзава. Къанунда лугьузвайдахъ ва пайгъамбарри кхьенвайдахъ зун чӀалахъ я.

¹⁵Абурухъ кьейи гьахъ-михьи тирбурални туширбурал Аллагьди чан хкунин умуд авайвал, захъни гьахьтин умуд ава.

¹⁶Гьавиляй зун Аллагьдинни инсанрин вилик датӀана жуван намус михьи яз хуьн патал алахънава.

¹⁷Зун инра авачиз са шумуд йис алатна. Гила жуван халкьдикай тир кесибриз куьмек гун патал ва Аллагьдин КӀвале къурбандар авун патал Ярусалимдиз хтанва.

¹⁸И ксар атана зал гьалтайла, за вири и кӀвалахар кьиле тухванвай ва Къанундив кьадай михьивилерни авунвай. А чӀавуз зи гуьгъуьна халкь авайди тушир, я къал акъуддайбурни авачир.

¹⁹Зак тахсирар кутаз кӀанзавай са бязи чувудар зал гьалтна. Абур Асия вилаятдай я. Ингье, исятда абур инал ви вилик квайтӀа ва чпи зак кутазвай тахсирар лагьанайтӀа, хъсан тир!

²⁰Я тахьайтӀа, къуй инал алайбуру Меслягьатдиз закай вуч тахсир жагъанатӀа, гьадакай лугьурай.

²¹Абурувай зак кутаз жедай тахсир — «Кьейибурал чан хтунихъ за иман авуниз килигна, куьне къе зи дуван ийизва» гафар абурун вилик лугьун я.

²²Феликсаз Реббидин рекьел алайбуру хьиз ибадат авун вуч затӀ ятӀа хъсандиз чизвай. Ада ийизвай дуван акъвазарна. — Ви кардай къарар кьушундин кьилевай Луьси иниз атайла, за акъудда, — лагьана ада.

²³Ада эфсердиз Павелелай вил алуд тавун, гьа са вахтунда адаз вич вичин ихтиярда жедай мумкинвални гун эмирна ва Павелан дустарини адан къайгъу чӀугвадайвал абурун вилик пад кьамир лагьана.

²⁴Са шумуд югъ алатайла, Феликс вичин чувуд паб Дурзилани галаз атана. Ада Павел гъун эмирна. Феликсаз Иса Месигьдихъ иман авун вуч затӀ ятӀа чириз кӀанзавай.

²⁵Павела гьахъ-михьивиликай, сабур хьуникай ва Къияматдин йикъакай лагьайла, Феликсаз кичӀе хьана. — Къе авур ихтилатар бес я! — лагьана ада Павелаз. — Ахлад, маса гъилера заз вахт хьайила, за ваз мад эвер хъийида.

²⁶Гьа са чӀавуз адан вил Павела вичиз ришвет гунални алай, гьакӀ хьайила ада, ам мукьвал-мукьвал вичин патав гъиз таз, адахъ галаз ихтилатар ийидай.

²⁷Кьве йис алатна, Феликсан къуллугъдин чкадални ПуркӀас ФестӀ хьана, амма Феликса чувудар рази авун патал Павел къазаматда туна.