Read Lezgi New Testament – ЦӀийи Икьрар Крар 25 Bible Online

Крар 25 - Lezgi New Testament – ЦӀийи Икьрар bible

Крар 25

¹Гьакимдин везифайрив эгечӀай пуд йикъалай, ФестӀ Кесардай Ярусалимдиз фена.

²Ярусалимда адан патав чӀехи хахамар ва чувудрин вилик-кьилик квай ксар атана, абуру Павелан хиве авай тахсиррикай гьакимдиз лагьана.

³Абуру Павел Ярусалимдиз хкунин патахъай ва чпихъ галаз разивиле хьунин патахъай ФестӀавай кӀевелай тӀалабна. Абуруз ам хкидай рекье яна рекьидай къаст авай.

⁴ФестӀа жаваб гана: — Павел Кесарда къазаматвиле жеда. Къе-пака зунни гьаниз фида.

⁵Къуй куь векиларни захъ галаз атурай. Павела рикӀивайни авунвай чӀуру кар аватӀа, абуру гьана адак квай тахсирар лугьурай.

⁶ФестӀа абурун арада муьжуьд-цӀуд йикъалай гзаф тушиз йикъар акъудна, ахпа элкъвена Кесардиз хтана. Пакагьан юкъуз ада, гьакимдин чкадал ацукьна, Павел дувандиз гъунин эмир гана.

⁷Павел дуванханадиз гъана. Ярусалимдай атай чувудри Павел юкьва туна адак гзаф ва еке тахсирар кутаз хьана, амма абурувай а тахсирар субутариз жезвачир.

⁸Павела вич хуьн патал лагьана: — За я чувудрин Къанундиз, я Аллагьдин КӀвализ, я Римдин пачагьдиз акси гьич са чӀуру карни авунач.

⁹ФестӀа, чувудар рази жедайвал ийиз кӀанз, Павелавай хабар кьуна: — Ви дуван Ярусалимда за авун патал вун гьаниз ракъурунал вун рази яни?

¹⁰— Зун Римдин пачагьдин дувандин вилик акъвазнава, гьада зи дуванни авун лазим я, — жаваб гана Павела. — Ваз хъсандиз чизвайвал, чувудриз за гьич са пис карни авунвайди туш.

¹¹АвунватӀа, за кьиникьикай кьил къакъудзавач. Чувудри зак кутазвай тахсирар садни за авунвайбур туштӀа, гьич садазни зун абурун гъиле твадай ихтияр авач. За зи дуван Римдин пачагьди авун тӀалабзава!

¹²Меслятар авурдалай кьулухъ, ФестӀа малумарна: — Вуна ви дуван пачагьди авун тӀалабзаватӀа, вун гьадан патав финни ийида.

¹³Са кьадар вахт алатайла, ФестӀал илифун патал Кесардиз АгърипӀ пачагьни Беренисе атана.

¹⁴Вичин патав абур са шумуд югъ санал хьайидалай кьулухъ ФестӀа пачагьдихъ галаз Павелан кардикай ихтилатна. — Ина гьеле Феликса къазаматда тур са инсан ама, — лагьана ада.

¹⁵— Зун Ярусалимда авайла, чувудрин чӀехи хахамри ва агъсакъалри адак тахсирар кутуна. Абуру завай адаз кар атӀун тӀалабзавай.

¹⁶За абуруз лагьана хьи, инсандиз вичик тахсирар кутазвайбурукай чин-чинал акъвазна вич хуьдай мумкинвал тахьанмаз, са нин ятӀани гьуьрметдай кар атӀун Римдин къайдайрихъ галаз кьазвач.

¹⁷Абур захъ галаз иниз атана акурла, и кар яргъалди вегьин тавуна за дуван пакадин юкъуз тайинарна ва а кас дувандал гъун эмир гана.

¹⁸Абуру адак кутазвай тахсирар лугьуз эгечӀайла, за вилив хвейи хьтин тахсиркарвилерикай анал са гафни хьаначир.

¹⁹Амма абуру кутазвай тахсирар чпин диндин са бязи месэлайрикай тир. Кьилди къачуртӀа, Павела Иса лугьудай кьенвай са Касдикай Адал чан ала лугьуз тестикьарзавай.

²⁰Зун кӀеве акӀанай, заз вуч авуна кӀандатӀа чизвачир. ГьакӀ хьайила, за адавай вичин дуван Ярусалимда авунал ам рази яни лагьана хабар кьуна.

²¹Амма Павела вичин дуван авунин месэладай эхиримжи гаф Римдин пачагьди лугьун ва вич ина тун тӀалабна. Римдин пачагьдин патав ракъурдай мумкинвал жедалди, за ам ина къаравулар алаз тун эмирна.

²²— Зазни а инсандиз яб гуз кӀанзава, — лагьана АгърипӀа. — Вуна адаз пака яб це, — лагьана жаваб гана ФестӀа.

²³Пакадин юкъуз АгърипӀни Беренисе дамахар авуна, дуванханадиз атана. Абурухъ чӀехи дережаяр авай эфсерар ва шегьердин вилик-кьилик квай инсанар галай. ФестӀан эмирдалди Павел аниз гъана.

²⁴ФестӀа лагьана: — АгърипӀ пачагь ва ина чахъ галаз кӀватӀ хьанвай ксар! Куьн и касдиз килиг. Ярусалимда ва Кесарда авай вири чувудри, зи патав къвез, и касдилай шикаятар ийиз хьанай. А касдал мад чан аламаз хьун лазим туш лугьуз, абуру гьараярнай.

²⁵Заз, лагьайтӀа, ам кьиникьиз акъуддай хьтин са тахсирни адак кваз жагъанач. Амма и касди вичин дуван Римдин пачагьди авун тӀалабна, гьавиляй за ам Римдиз ракъурдай къарар кьабулна.

²⁶Амма адан гьакъиндай пачагьдиз кхьидай якъин делилар тахьуниз килигна, за ам куь вилик, иллаки ви вилик, АгърипӀ пачагь, гъанва. Адавай жузун-качузун авурла, белки, заз адакай кхьидай делилар жагъин.

²⁷Квай тахсирар къалур тавуна къазаматнавайди Римдин пачагьдин патав ракъурун за акьулдив кьур кар яз гьисабзавач.