Read Lezgi New Testament – ЦӀийи Икьрар Крар 26 Bible Online

Крар 26 - Lezgi New Testament – ЦӀийи Икьрар bible

Крар 26

¹— Ваз дувандал жув хуьн патал рахадай ихтияр гузва, — лагьана АгърипӀа Павелаз. Павела гъил хкажна ва вич хуьз эгечӀна:

²— АгърипӀ пачагь! Къе чувудри зак кутазвай тахсиррикай жува жув хуьн патал ийидай рахунар ви вилик акъвазна авун за бахт яз гьисабзава,

³гьадалайни артух яз, чувудрин къайдаяр ва гьуьжет алай абурун месэлаяр ваз хъсандиз чизва. ГьакӀ хьайила, заз сабурдалди яб гун тӀалабда.

⁴Вири чувудриз зи халкьдин арада Ярусалимда фейи зи уьмуьр жегьил чӀавалай инихъ чизва.

⁵Зун чи диндин виридилай кьетӀи са хел тир фарисейрик квай. Гьа икӀ зун гьа чӀавалай чизвайбурувай, абуруз кӀан хьайитӀа, и кар тестикьариз жеда.

⁶Ингье, къе зи дуван Аллагьди чи бубайриз гайи гафуник за умуд кутазва лугьуз ийизва.

⁷Юкъузни йифиз рикӀивай Аллагьдиз ибадат ийизвай чи цӀикьвед тайифадини Аллагьди хиве кьур кар кьилиз акъатуник умуд кутазва. Эхь, пачагь, гьа и са умуддиз килигна чувудри зак тахсирар кутазва.

⁸Куьне вучиз кьейибурал Аллагьди чан хкун жери кар тушиз гьисабзава?

⁹Зунни Назаретдай тир Исадин хура акъвазнавай, инсанри Адахъ иман тавун патал вири къуватар кӀватӀна кӀанда лугьуз фикирнай за.

¹⁰Ярусалимда за гьакӀни авунай. ЧӀехи хахамрин ихтиярдалди За Месигьдиз талукь инсанар къазаматра тунай. Абуруз кьиникьин жаза гудайла, зун ахьтин къарардин терефдар жедай.

¹¹Абуруз жазаяр гун патал зун мукьвал-мукьвал синагугдай синагугдиз фенай. Зун абурув имандикай кьил къакъудиз таз алахъдай. Заз абурукай акьван хъел авай хьи, зун абур хурук кутун патал гьатта Ягьудатдин къеце патазни фидай.

¹²Садра гьа къаст рикӀе аваз чӀехи хахамривай тапшуругъни ихтияр къачуна, зун Шамдиз рекье гьатнай.

¹³Физвай рекье, нисинрихъ, эй пачагь, заз ракъинилайни хциз цӀарцӀар гузвай экв цаварай къвез акуна. Ада зун ва захъ галайбур кьуд патахъай экуь авуна.

¹⁴Чун вири чилел ярх хьайила, заз чувуд чӀалал рахадай ван атана: «Я Шаул, я Шаул, вуна Зун вучиз хурук кутазва? Аллагьдиз ийиз кӀанзавай крарин хура акъвазиз хьайитӀа, ви гьал чӀур жеда».

¹⁵«Вун вуж я, я Агъа?» — хабар кьуна за. «Зун вуна хурук кутазвай Иса я, — жаваб гана Реббиди.

¹⁶— Къарагъ, Зун вакай Заз къуллугъ ийидайди авун патал атанвайди я. За ваз исятдани ва идалай кьулухъни къалурдайдакай вун шагьидвал ийиз жеда.

¹⁷За вун чувудрикайни маса халкьарикай хуьда, ва За вун маса халкьарин патав ракъурзава.

¹⁸Абур иблисдин мичӀи пачагьлугъдай Аллагьдин экуь Пачагьлугъдиз атун патал, За абурун гунагьрилай гъил къахчун патал, абурни Аллагьдиз талукь хьун патал, За вун абурун патав ракъурзава».

¹⁹АгърипӀ пачагь, цаварай акур карагуниз зун муьтӀуьгъ тахьана амукьнач.

²⁰ГьакӀ хьайила сифте за Шамда, ахпа Ярусалимда, ахпани Ягьудатда авай инсанриз ва гуьгъуьнлайни маса халкьарикай тирбуруз Аллагьдиз килиг, Аллагьдин рекьел ша, куьне икӀ ийидайди лайих краралди къалура лагьана.

²¹Гьа и кардиз килигна чувудар Аллагьдин КӀвале зун кьуна рекьиз алахънай.

²²Амма Аллагьди къенин йикъалди заз куьмекзава. Ингье зун инал акъвазнава, за гъвечӀидалай чӀехидал къведалди виридан вилик шагьидвал ийизва: Месигьди азабар чӀугунин, Адакай кьейибурукай чан хтай сад лагьайди хьунин ва Ада Вичин халкьдизни маса халкьариз экуьникай муштулухар гунин. ИкӀ лугьуналди за анжах Мусадинни пайгъамбаррин виликамаз лагьай гафарилай артуханди лугьузвач.

²⁴Павела вичи вич икӀ хуьзвайла, ФестӀа гьарайдалди лагьана: — Вун кими хьанва, Павел, ви зурба чирвилери вун кими авунва!

²⁵— Играми ФестӀ, — жаваб гана Павела, — зун кими туш, зи гафар дуьзбур ва акьул авайбур я.

²⁶Вичихъ галаз викӀегьдиз зун рахазвай пачагьдиз за лугьузвай гафар вири чизва. За лугьузвай крар садазни таквадай са далдадик хьайибур туш. Абурукай пачагьдиз хабар хьунихъ зун агъунва.

²⁷АгърипӀ пачагь, вун пайгъамбаррин гафарин чӀалахъ яни? Вун чӀалахъ тирди заз чизва.

²⁸— Са куьруь вахтундилай вуна закайни месигьи ийида — лагьана АгърипӀа.

²⁹— За анжах са вун ваъ, заз къе яб ни ганатӀа, гьабурни са куьруь ва я яргъал вахтарилай вири крара зун хьтинбур хьун патал, амма зун хьиз къазаматда тун тавун патал Аллагьдиз дуьа ийизва, — жаваб гана Павела.

³⁰Пачагь, адахъ галаз сердер, Беренисе ва дуванханада ацукьнавай амайбурни къарагъна.

³¹Абур анай экъечӀна, сад садахъ галаз рахаз хьана: — И касди ам кьиникьин жаза гуз ва я къазаматда тваз жедай са карни авунвач.

³²— Ада Римдин пачагьди вичин дуван авун тӀалабначиртӀа, ам фадлай азадиз жедай, — лагьана АгърипӀа ФестӀаз.