Read Lezgi New Testament – ЦӀийи Икьрар Крар 6 Bible Online

Крар 6 - Lezgi New Testament – ЦӀийи Икьрар bible

Крар 6

¹Тилмизрин кьадар артух жезвай чӀавуз юнан чӀалал рахадай чувудри чкадин чувудрилай шикаятар ийиз хьанай. Юнан чувудри лугьузвай хьи, гьар йикъан фу пайдайла, чкадин чувудри юнан чувудрин хендедаяр кваз кьазвач.

²Иниз килигна цӀикьвед илчиди вири тилмизар санал кӀватӀна лагьана: — Аллагьдин Гаф чукӀурун туна, тӀуьнин-хъунин месэлаяр гьялун чаз кутугнавач.

³ГьакӀ хьайила, стхаяр, куь арадай ирид кас хкягъа, чнани а везифаяр гьабурун хиве твада. И ксар гьуьрмет авай, Руьгьдив ацӀанвай ва акьул авай ксар хьун лазим я.

⁴Чна, лагьайтӀа, гзафни-гзаф чи вахт дуьаяр авунизни Аллагьдин Гаф чукӀуруниз серфда.

⁵И меслят вирибуруз хуш хьана, абуру Истефас (ам имандивни Пак Руьгьдив ацӀанвай), ФилипӀ, Пархар, НикӀанур, Тимун, Парман ва виликдай чувудрин диндал хьайи антӀиахви НикӀалай хкяна.

⁶Ирид касни илчийриз къалурнай, абуру, дуьа авуна, абурал гъилер эцигна.

⁷Аллагьдин Гаф гегьеншдиз чкӀизвай, тилмизрин кьадарни Ярусалимда къвердавай артух жезвай, хахамрикайни гзафбур имандал атана.

⁸Аллагьди къуватни берекат ганвай Истефаса халкьдин арада зурба аламатар ва керемат-ишараяр къалурзавай.

⁹«Азад хьайибурун» синагугдикай тир чеб Киринейдай ва Искендерандай атанвай чувудри ва Киликатдай ва Асия вилаятдай тир са шумуд чувудди Истефасахъ галаз гьуьжетар ийиз хьана.

¹⁰Амма Руьгьди Истефасаз ахьтин акьул гана хьи, абурувай садавайни гьуьжетра адал гъалибвал къачуз хьанач.

¹¹ГьакӀ хьайила, Истефасан рекъибри чинеба меслят хьана са бязи инсанрив Истефасакай икӀ лугьуз туна: — Ада Мусадизни Аллагьдиз акси яз чӀуру гафар лугьудайла, чаз ван хьана.

¹²Гьа икӀ а ксари халкь, тавратдарар ва агъсакъалар Истефасаз акси акъвазарна. Истефасакай хъел авайбуру ам кьуна Меслягьат кӀватӀ жезвай чкадиз гъана.

¹³Абуру жагъурай тапан шагьидри лугьудай: — Ам датӀана Аллагьдин КӀваликайни Къанундикай чӀурукӀа рахазва.

¹⁴«Назаретдай тир а Исади Аллагьдин КӀвал барбатӀда, чаз Мусади тур къайдаяр дегишарда», — лугьуз Истефас рахадайла, чаз ван хьанай.

¹⁵Меслягьатда авай кьванбур вири Истефасаз дикъетдалди килигзавай. Адан чин абуруз малаикдин чин хьиз аквазвай.