Read Lezgi New Testament – ЦӀийи Икьрар Крар 7 Bible Online

Крар 7 - Lezgi New Testament – ЦӀийи Икьрар bible

Крар 7

¹Кьилин хахамди Истефасавай хабар кьуна: — ГьакӀ яни?

²— Стхаярни бубаяр! — жаваб гана Истефаса. — Заз яб це. Чи буба Ибрагьим гьеле Месапатамда амайла, ам Харандиз фидалди вилик, адаз баркалла алай Аллагь вичив рахаз акунай.

³«Жуван уьлкве ва мукьва-кьилияр тур. Вун За ваз къалурдай чил галайвал алад», — лагьана Аллагьди.

⁴Халдейрин чилер туна, Ибрагьим Харандиз куьч хьана. Буба кьейила, Аллагьди Ибрагьим исятда куьне уьмуьр тухузвай и чилерал куьчарна.

⁵Аллагьди адаз эменни яз са чӀиб чил кьванни ганач. Ибрагьимахъ а чӀавуз веледар авачиртӀани, Аллагьди и чил адаз ва адан эвледриз гуда лагьана хиве кьунай.

⁶Аллагьди адаз лагьанай: «Ви несилар гъурбатда къурабаяр яз, кьуд виш йисуз лукӀвиле жеда, абуруз садани инсафдач.

⁷Амма абур лукӀвиле тур халкьдиз За жаза гуда. Ахпа ви несилар анай экъечӀна хъфейла, абуру и чкадал атана Заз къуллугъда».

⁸Ахпа Ада Ибрагьимахъ галаз Икьрар кутӀунна, а Икьрардин лишанни суьннет авун хьана. Ибрагьимаз хва Исакь хьана, адани ам хайи муьжуьд йикъалай суьннетна. Ахпа Исакьаз хва Якьуб хьана, а хцикайни цӀикьвед тайифадин буба хьана.

⁹Якьубан цӀусад хва чпин стха Юсуфал пехил тир, гьакӀ хьайила абуру ам Мисридиз лукӀвилиз маса гана. Амма Аллагь Юсуфахъ галаз хьана.

¹⁰Аллагьди ам вири четинвилерай акъудна. Ада Юсуфаз акьул-камал гана, адалай фиръаван — Мисридин пачагь, рази жедайвал авуна. Фиръавандини Юсуф вири Мисридин ва вичин мал-мулк идара ийидай гьакимвиле тайинарна.

¹¹Ахпа вири Мисрида ва Къенанда каш ва зурба мусибатар гьатна. Чи бубайриз недай затӀ гьатзавачир.

¹²Мисрида техил ава лагьана ван хьайи Якьуба аниз вичин рухваяр сад лагьай гъилера ракъурна.

¹³Кьвед лагьай гъилера стхаяр иниз атайла, Юсуфа абуруз вич вуж ятӀа лагьана, гьа икӀ фиръавандизни Юсуфан хизандикай хабар хьана.

¹⁴Идалай кьулухъ Юсуфа вичин буба Якьуб ва амай вири хизан, санлай хизанда пудкъанни цӀувад кас авай, вичин патав гъиз ксар ракъурна.

¹⁵Якьуб Мисридиз атана, ана ам ва адан рухваяр кьена.

¹⁶Абурун мейитар Шехемдиз хкана, Ибрагьима Шехемдай тир Гьамуран рухвайривай гимишдин пулунихъ къачур сура туна.

¹⁷Аллагьди Ибрагьимаз гайи гаф кьилиз акъуддай вахт мукьвал жердавай, тахтуниз Юсуфакай хабар авачир маса пачагь къведалди чи халкьдин кьадарни Мисрида лап артух хьана.

¹⁸

¹⁹Чи халкьдихъ галаз а пачагьди вич хаинвилелди тухузвай, ада чи бубайриз инсаф ийизвачир. Ада гьатта ханвай бицӀекар, абурал чан аламукь тавун патал, куьчедиз гадарун мажбурзавай.

²⁰Гьа чӀавуз Муса дидедиз хьана. Ам лугьуз тежедай кьван иер аял тир. Сифте пуд вацра Муса вичин бубадин кӀвале хьана,

²¹ахпа аял гадарна, гьанлай ам фиръавандин руша къахчуна. Руша аялдиз, вичин хайи хциз хьиз, тербия гана.

²²Мусадиз Мисридин гьа чӀаван вири илимар чирнавай; ам кар алакьдай, рахунрин устад яз чӀехи хьана.

²³Вичин яхцӀур йис тамам хьайила, ада вичин халкьдикай тир стхайрал кьил чӀугун кьетӀна.

²⁴Садра адаз мисривиди са исраилвидин хатурдик хкӀурзавайвал акуна. Мусади исраилвидин пад хвена, ада, кьисас къахчун яз, мисриви яна кьена.

²⁵Мусади вичин куьмекдалди вичин стхаяр Аллагьди хиласдайдан гъавурда абур ава лугьуз фикирзавай, амма абур и кардин гъавурда гьатзавачир.

²⁶Пакагьан юкъуз Мусадиз кьве исраилви кикӀиз акуна. Ам абур туьхкӀуьр хъийиз алахъна. «Я итимар, куьн стхаяр я, — лагьана ада, — вучиз куьне куь хатур хазва?»

²⁷Хатурда эцязавайда, Мусадиз рум гана хьиз, лагьана: «Вун гьаким ва чӀехиди яз эцигайди вуж я?

²⁸ТахьайтӀа накьан мисриви хьиз ваз зунни яна рекьиз кӀанзавани?»

²⁹И гафарилай гуьгъуьниз Муса Мидияндиз катна, ана къураба яз амукьна. Ана Мусадикай кьве хцин буба хьана.

³⁰ЯхцӀур йис алатайла, Синай дагъдин мукьув, кьурумда адаз ялавди кьунвай валарин юкьвай малаик акуна.

³¹Ам акурла, Муса мягьтел хьана. Вуч хьанватӀа чириз кӀанз валариз мукьва хьайила, Мусадиз Реббидин ван атана:

³²«Зун ви бан-бубайрин, Ибрагьиман, Исакьан ва Якьубан Аллагь я». КичӀе хьана Муса зурзаз акъвазна. Адавай кьил хкажна килигдай жуьрэт хьанач.

³³Реббиди лагьана: «КӀвачин къапар хтӀуна, Вун акъвазнавай чка пак чил я.

³⁴Зи халкьдиз Мисрида инсаф тийизвайдакай Заз хабар ава. Заз абурун шел-хвалдин ван къвезва. Зун абур лукӀвиликай азад авун патал атанва. За вун Мисридиз ракъурзава, алад».

³⁵Аллагьди исраилвийрин патав абуру чпи «Вун гьаким ва чӀехиди яз эцигайди вуж я?» лагьана абуру инкарай гьа и Муса ракъурна. Кузвай валарин юкьвай адан вилик пайда хьайи малаикдин куьмекдалди Аллагьди Вичи ам исраилвийрин чӀехиди яз ва абур хиласдайди яз Муса ракъурнавай.

³⁶Мусади, аламатар ва керемат-ишараяр къалуриз, исраилвияр Мисридай ахкъудна, Яру гьуьлелай алудна, ахпа абур кьурумдай яхцӀур йисуз тухвана.

³⁷Гьа и Мусади Исраилдин халкьдиз лагьана: «Реббиди, куь Аллагьди, квез зун хьтин пайгъамбар ракъурда, ам квекай сад жеда».

³⁸Чи бан-бубаяр кьурумда санал кӀватӀ хьанвайла, Мусани гьабурухъ галаз авай. Ана малаикди Синай дагъдал Мусадиз, Мусадини чи бубайриз, чал агакьарун патал, эбеди яз амукьдай гафар лагьана.

³⁹Амма чи бубайриз Мусадин чӀалаз килигиз кӀан хьанач, абуру ам инкарна. Абуруз элкъвена Мисридиз хъфиз кӀанзавай.

⁴⁰Абуру Гьаруназ лагьана: «Чаз чун вичин гуьгъуьна аваз вилик тухудай аллагь туькӀуьра. Чун Мисридай акъудай Мусадикай лагьайтӀа, чаз адахъ вуч хьанватӀа чидач!»

⁴¹Абуру къизилдикай дана туькӀуьрна, гьа бутдиз къурбандар гъиз ва чпин гъилералди авур бутдин сагълугъдай суварар ийиз хьана.

⁴²Гьа чӀавуз Аллагьди абурухъ далу элкъуьрна, абур цава авай гъетеризни маса затӀариз икрам ийиз гьана туна. И кардикай пайгъамбаррини кхьенай: «Исраилдин халкь! Кьурумда хьайи яхцӀур йисан къене куьне Заз къурбандар авунайни кьван?

⁴³Квев куь аллагь Малухан алачух ва куь аллагь Ремфанан гъед ва абурун шикилар гвай вуна чпиз икрам авун паталди. ГьакӀ хьайила, За куьн Бабилдилайни анихъ суьргуьнда» .

⁴⁴Кьурумда чи бубайрив Шагьидвилин Алачух гвай. И Алачух Мусади Аллагьди къалурайвални лагьайвал туькӀуьрнавай.

⁴⁵Чи бубаяр аниз къвердавай Аллагьди ана авай халкьар чукурнай, ва абурун чилер кьаз Нунан хва Шуай кьиле аваз фидай чӀавузни и алачух чи бубайрив гвай. Ахпа алачух несилрилай несилрив вугуз хьана. Давуд пачагьдин девирдалди а алачухни и чилерал аламай.

⁴⁶Давуд пачагьдилай Аллагь рази тир, Давуда, лагьайтӀа, вичивай Якьубан Аллагьдиз кӀвал эцигайтӀа жедани лугьуз Аллагьдивай хабар кьуна.

⁴⁷Аллагьдиз кӀвал Сулейман пачагьди эцигна.

⁴⁸Амма Цаварал Алайда инсанри эцигнавай кӀвалера уьмуьр тухудач. Пайгъамбарди идакай икӀ лугьузва:

⁴⁹«Цавар Зи тахт я, чилни — Зи кӀвачерик квай даях. Квевай Заз гьихьтин кӀвал эцигиз жеда? Заз ял ядай чка гьинава? — лугьузва Реббиди. —

⁵⁰Дуьньяда авай кьван вири шейэр Зи Гъилералди авунвайбур тушни кьван?»

⁵¹Эй кьилиз ялдай, Аллагь тийижир рикӀ авай, Аллагь патал япар бишибур! Куьн датӀана Пак Руьгьдиз акси экъечӀзава! Куьн куь бубаяр хьиз я!

⁵²Куь бубайри хурук кутун тавур са пайгъамбар кьванни хьайиди яни? Аллагьдин Гьахъ-Михьиди атуникай виликамаз хабарар гайибур абуру ягъиз, рекьиз хьана, исятда куьне хаинвилелди гьа и гьахъ ЛукӀ Вич яна кьена.

⁵³Квез, лагьайтӀа, Аллагьди малаикрин куьмекдалди Къанун ганай, амма куьне адал амал авунач.

⁵⁴Меслягьатдин векилриз и гафарин ван хьайила, абур хъилен цӀай акатна, сарар регъвез акъвазна.

⁵⁵Истефас Пак Руьгьдив ацӀанвай. Ам цавуз килигзавай, анай адаз баркалла алай Аллагь ва Адан эрчӀи гъилихъай акъвазнавай Иса акуна.

⁵⁶— Килиг, — лагьана ада, — заз ахъа хьайи цавара Аллагьдин эрчӀи гъилихъай акъвазнавай Инсандин Хва аквазва.

⁵⁷Инал абур, чпин япара тупӀар туна, гьарайиз, вирида сад хьиз адал хкадарна.

⁵⁸Абуру ам галчӀурна шегьердай къерехдиз акъудна, гьана ам къванцин хура туна. Тахсир кутазвай шагьидри Шаул лугьудай жегьил касдин кӀвачерив чпин пекер тунай.

⁵⁹Абуру Истефасаз къван гудайла, Истефаса дад авуна: — Я Ребби Иса, зи руьгь Вуна кьабула.

⁶⁰Ахпа ада чилиз метӀер яна, ван ацалтна гьарайна: — Я Ребби, Вуна абурун и гунагьдилай гъил къахчу. И гафар лагьана, Истефасан чан хкатна.