Read Lezgi New Testament – ЦӀийи Икьрар Крар 9 Bible Online

Крар 9 - Lezgi New Testament – ЦӀийи Икьрар bible

Крар 9

¹Шаула Реббидин тилмизрин кьилел тӀурфан акъудзавай, ам абур яна рекьиз кӀанз хъиле кузвай. Шаулаз Шам шегьерда Исадихъ иман авунин рекье авай ксар — гьам итимар, гьамни папар — гъилер кутӀунна Ярусалимдиз хкиз кӀанзавай. И кар авун патал ада кьилин хахамдивай Шамда авай синагугриз чарар кхьин тӀалабна.

³Ам Шамдив агакьзавай рекье, садлагьана цава куькӀвей экуьни кьуд пата нур туна.

⁴Шаул чилел ярх хьана. Адаз вичихъ элкъвена рахазвай са ван хьана: — Шаул, я Шаул, вуна Зун вучиз хурук кутазва?

⁵— Вун вуж я, я Агъа? — жузуна Шаула. — Зун вуна хурук кутазвай Иса я, — жаваб гана ванци, —

⁶исятда къарагъна шегьердиз алад, ана вуна вуч авуна кӀандатӀа ваз лугьуда.

⁷Шаулахъ галай инсанар анал къах хьана амукьна, садавайни сивяй гаф акъудиз хьанач. Абуруз ван атана, амма акур кас хьанач.

⁸Шаул чилелай къарагъна, амма вилер ахъаяйла, ам затӀни такваз амукьна. Шамдиз ам гъил кьуна гъана.

⁹Пуд йикъан къене адаз затӀни акуначир, ада я тӀуьнни авуначир, я хъунни.

¹⁰Шамда Гьанани тӀвар алай са тилмиз авай. Адаз са карагун акуна. Адахъ галаз Ребби рахана: — Гьанани! — Гьай, Ребби, — лагьана жаваб гана ада.

¹¹— «Дуьз» тӀвар алай куьчеда авай Ягьудан кӀвализ фена, ТӀарас шегьердай тир Шаул лугьудай кас хабар яхъ, ингье, ада дуьаяр ийизва, — лагьана Реббиди.

¹²Шаулаз вичин патав Гьанани лугьудай кас керематдин жуьреда атайди ва Гьананиди адан вилерал гъилер эцигна абур ахъа хъувурди карагна.

¹³— Я Ребби, — жаваб гана Гьананиди, — а касди Ваз талукьбуруз Ярусалимда авур писвилерикай заз гзаф ванер хьана.

¹⁴Ам иниз Ви ТӀвар кьур кьванди къазаматда твадай ихтиярар чӀехи хахамривай къачуна атанвайди я.

¹⁵— Алад! — лагьана Реббиди. — А кас Зи ТӀвар пачагьрин ва Исраилдинни маса халкьаррин арада машгьур авун патал За хкянавай алат я.

¹⁶Зи ТӀварцин патахъай вичи гьикьван азаб-азият чӀугвадатӀа За адаз къалурда.

¹⁷Гьанани фена, вичиз лагьай кӀвализ гьахьна. Ада Шаулал гъилер эцигна, лагьана: — Шаул стха, вун иниз къведай рекье пайда хьайи Ребби Исади ви вилериз экв ахквадайвал ва вун Пак Руьгьдив ацӀудайвал зун ви патав ракъурнава.

¹⁸Гьа и арада Шаулаз вичин вилерилай перде алатай хьиз хьана, адан вилер ачух хъхьана. Ада, къарагъна, цик акахьун къачуна.

¹⁹Ахпа ада фу тӀуьна, адан чандиз такьат хтана. Шаул са шумуд юкъуз тилмизрихъ галаз Шамда хьана.

²⁰Гежел тевгьена, ада синагугра Иса Аллагьдин Хва тирдакай вязер ийизвай.

²¹Адан ван хьайи вирида тажуб яз лугьудай: — Ярусалимда Исадин ТӀвар кьурбур терг ийиз хьайиди гьам туширни? Ам иниз иманияр кьуна чӀехи хахамрин патав хутахиз атанвайди туширни?

²²Шаулан вязер къвердавай къуватда гьатзавай. Иса Месигь я лугьуз субутариз, Шамда авай чувудриз ада лугьудай гаф тазвачир.

²³Са кьадар вахт алатна фена, чувудри Шаул яна рекьин кьетӀна.

²⁴Амма Шаулаз абурун чӀуру къастуникай хабар хьана. Абуру, ам яна рекьиз кӀанз, йифиз-юкъуз шегьердин варарихъ къаравулвал чӀугуна.

²⁵Амма йифиз Шаулан тилмизри ам куткунда аваз шегьердин цлалай авадарна.

²⁶Шаул Ярусалимдиз хтана, гьана ам тилмизрик акахьиз алахъна, амма абуруз адахъай кичӀе тир, ам имандал атунин чӀалахъ абур жезвачир.

²⁷Барнабади адаз куьмек гана ва ам илчийрин патав гъана. Ада абуруз Шаулаз Шамдин рекье Ребби акурвал, Ребби адахъ галаз рахайвал ва Шаула Шамда викӀегьдаказ Исадин ТӀварцӀикай вязер авурвал ахъайна.

²⁸Са кьадар вахтунда Шаул Ярусалимда иманийрин амадаг хьана, ада Реббидин ТӀварцӀелай викӀегьдиз вязер ийизвай.

²⁹Ам юнан чӀалал рахадай чувудрихъ галаз гьуьжетра гьатдай. Гьавиляй абур ам рекьиз алахънай.

³⁰Иман гвай стхайриз и кардикай хабар хьайила, абуру Шаул Кесар шегьердиз тухвана, анайни ТӀарасдиз рекье туна.

³¹Гьа и чӀавуз Ягьудатда, Галилейда ва Самариятда иманийрин кӀватӀалар патал ислягь йикъар алукьна. Пак Руьгьдин куьмекдалди кӀватӀалар мягькем, иманийрин кьадарни гзаф жезвай. Абуру Аллагьдикай кичӀе яз уьмуьр гьалзавай.

³²Уьлкве тирвал къекъвей Петру Месигьдиз талукь инсанрал кьил чӀугун патал Луьда шегьердизни атана.

³³Ана Эней лугьудай са кас авай. Ам фалужди яна, муьжуьд йисан къене меселай къарагъзавачир.

³⁴Петруди адаз лагьана: — Эней! Иса Месигьди вун дири хъийизва. Къарагъ! Жуван месни кӀватӀ хъия. Эней гьасятда къарагъна.

³⁵Луьда шегьердинни Шарун арандин агьалийриз ам сагъ хъхьайди акурла, абур Аллагьдихъ элкъвена.

³⁶Яфа шегьерда Исадихъ иман ийизвай са паб авай, адан тӀварни Табита, яни «Жейран» тир. Табитади гзаф хъсанвилер ийидай, кесибриз куьмекар гудай.

³⁷Гьа и вахтунда ам азарди кьуна кьена. Адан мейит чуьхвена винеллай кӀвале эцигна.

³⁸Луьда шегьер Яфадин патав гвай. Петру Луьдада ава лагьана ван хьайи тилмизри адан патав кьве кас ракъурна, минетдалди лагьана: — Геж тавуна чи шегьердиз ша ман!

³⁹Петру абурухъ галаз фена. Атана агакьайла, абуру ам винеллай кӀвализ тухвана. Ина вири хендедаяр атана адал алтӀушна. Абуру, чпиз Жейрана вичел чан аламай чӀавуз цвайи булушкаярни маса пекер къалуриз, шел-хвал ийизвай.

⁴⁰Петруди абур вири кӀваляй акъудна, метӀер чилиз яна, дуьаяр авуна, кьенвайдахъ элкъвена, лагьана: — Табита, къарагъ! Табитади вилер ахъайна. Петру акурла, ам хкаж хьана ацукьна.

⁴¹Петруди адан гъил кьуна, адаз къарагъиз куьмекна. Ахпа ада хендедайризни Месигьдиз талукьбуруз эверна, чан ахкьалтнавай Табита къалурна.

⁴²И кардикай вири Яфада хабар хьана. Гьавиляй гзаф кьадар инсанар Реббидихъ ийизвай имандал атана.

⁴³Яфада Петру яргъалди амукьна, ана ам табагъар ийидай Симунан кӀвале хьана.