Read Lezgi New Testament – ЦӀийи Икьрар Римвийриз 10 Bible Online

Римвийриз 10 - Lezgi New Testament – ЦӀийи Икьрар bible

Римвийриз 10

¹Стхаяр-вахар, зи рикӀин мурад ва за Аллагьдиз ийизвай дуьа зи халкьдин векилар хилас хьун паталай я.

²Зун абуру гъайрадалди[2] Аллагьдихъ ялзавайдан шагьид я, амма абурун гъайра чирвиле бине авунвайди туш.

³Аллагьди гузвай гьахъ-михьивилин гъавурда такьаз ва чпин хсуси алахъунралди гьахъ-михьивилив агакьиз кӀанз, абур Аллагьдин гьахъ-михьивилихъ тухузвай рекьиз муьтӀуьгъ хьанач.

⁴Месигь Къанундин мурад я, инлай кьулухъ гьахъ-михьивал имандаллай гьар садав агакьзава.

⁵Къанундив кьур гьахъ-михьивал Мусади икӀ кхьена къалурзава: «ШартӀар-къайдаяр кьилиз акъудзавайдал абур себеб яз чан алаз жеда».

⁶Иман гвай касдикай имандив кьурвал гузвай гьахъ-михьивили Каламда лугьузва: цаварай Месигь гъун патал «Цаварал вуж хкаж жеда?». Ва я: кьенвайбурукай Месигьдал чан хкун патал «„Гургусдиз[3] вуж эвичӀда?“ — лагьана хабар кьамир».

⁸Амма гьахъ-михьивили вуч лугьузва? «Гаф ваз мукьва я, ам ви мецел ала ва ви рикӀе ава». Им чна вичикай вяз ийизвай имандикай тир гьа гаф я!

⁹Вуна Иса Ребби я лугьуз тестикьзаватӀа ва Аллагьди Адал кьейидалай кьулухъ чан хкайдахъ вуна мецелди ва рикӀелди иман ийизватӀа, вун хилас жеда.

¹⁰Вучиз лагьайтӀа рикӀелди иман авуни инсандиз гьахъ-михьивал гузва, мецелди тестикь авур шагьидвили хиласвал гъизва.

¹¹Каламди лугьузва эхир: «Адахъ иман ийизвайдаз садрани регъуь жедач».

¹²И карда чувуддинни муькуьдан арада са тафаватни авач — гьа са Ребби виридан Ребби язва ва Ада Вичиз эверзавай вирибуруз булдаказ нуьсрет гузва.

¹³ГьикӀ лагьайтӀа «Реббидиз эверай гьар сад хилас жеда».

¹⁴Амма абуру чпи иман Тавурдаз гьикӀ эверрай? Вичикай ван Тахьайдаз гьикӀ иман ийида? Абуруз садани вяз ийиз тахьайтӀа, гьикӀ ван жеда?

¹⁵Ракъурнавайди тушиз, са нивай ятӀани вяз гьикӀ ийиз жеда? Кхьенвайвал я: «Шад Хабардикай вяз ийизвайбурун кӀвачер хупӀ иер тушни!»

¹⁶Амма Шад Хабардиз вири муьтӀуьгъ хьанач. ГьикӀ лагьайтӀа, Яшая лугьузва: «Я Ребби, чавай ван хьайидан вуж чӀалахъ хьана?»

¹⁷Гьа икӀ ван хьайи хабардилай, Месигьдикай тир гафунилай иман къвезва.

¹⁸Амма за хабар кьазва: абуруз ван хьаначни бес? Гьелбетда, ван хьана, гьикӀ лагьайтӀа кхьенва: «Абурун ван физва вири чил тирвал, абурун гафар агакьзава а кьилив кьван дуьньядин» .

¹⁹ИкӀ тирла, за хабар кьазва: Исраил идан гъавурда акьазвачир жеди? Сифте яз бес Мусадини Аллагьдин гафаралди лагьанай эхир: «Чпиз халкь я лугьуз тежербурун куьмекдалди За квек гъайра [4] уяхарда; ахмакь халкьдалди За квек хъел кутада» .

²⁰Яшая лагьайтӀа викӀегьдаказ Аллагьдин гафар лугьузва: «Захъ къекъуьн тавурбуруз жагъанва Зун; Завай хабар такьурбуруз ахъа хьанва Зун» .

²¹Амма Исраилдикай Яшая лугьузва: «Яргъи югъди За Зи Гъилер яргъи авунай муьтӀуьгъ тушир ва аси халкьдиз» .