Read Lezgi New Testament – ЦӀийи Икьрар Римвийриз 12 Bible Online

Римвийриз 12 - Lezgi New Testament – ЦӀийи Икьрар bible

Римвийриз 12

¹Гьавиляй за квез Аллагьдин регьимдин хатурдай тагькимзава, стхаяр-вахар, куь беденар чан алай, пак ва Аллагьдиз кӀани савкьватар яз гъваш. Гьа им куьн патал кутугай, куьне Адаз ийизвай къуллугъ жеда.

²И дуьньядин уьмуьрдин къайдадихъ галаз кьамир, амма дегиш хьухь, квевай Аллагьдин къаст, яни хъсанвал, менфятвал ва тамамвал, кьатӀуз хьун патал, куь акьул цӀийи хъия.

³Заз ганвай берекатдив кьурвал за квекай гьар садаз лугьузва: куьне куьн са акьван артух яз кьамир, кьил кьилеллаз, Аллагьди гьар садаз ганвай имандин уьлчмедалди куьне квекай веревирд ая.

⁴Гьар садахъ са беден ва адахъ гзаф паяр авайвал, амма а паяриз гьардаз вичин везифа авайвал,

⁵Месигьдиз талукь чакайни са беден жезва, ва чун вири сад садаз талукь я.

⁶Чаз ганвай берекатдив кьурвал чав жуьреба-жуьре паяр агакьнава. Са нихъ ятӀани пайгъамбарвал авунин пай аватӀа, къуй ада вичиз ганвай имандив кьурвал пайгъамбарвал авурай;

⁷им масадбуруз къуллугъ авунин пай ятӀа, къуй къуллугърай; им муаллимвал авунин пай ятӀа, къуй чирвилер гурай;

⁸им кӀубанар ва тагьким авунин пай ятӀа, къуй гьакӀ авурай; им муьгьтежбуруз куьмек гунин пай ятӀа, къуй жумартдаказ гурай; им гьакимвал ийиз алакьунин пай ятӀа, къуй гьакъисагъвилелди[7] гьакимвал авурай; им мергьамет гваз хьунин пай ятӀа, къуй а алакьун шадвилелди къалуррай.

⁹Къуй куь муьгьуьббат рикӀин сидкьидай хьурай. Писвал такӀан хьухь ва хъсанвал яхъ.

¹⁰Садаз сад стхаяр-вахар хьиз рикӀелди кӀан хьухь. Сада сад жувалай вине яхъ.

¹¹Къуй куь гьакъисагъвал[8] зайиф тахьурай, Реббидин Руьгьди квекай цӀай квайбур авурай, Реббидиз къуллугъ ая.

¹²Умудда шад хьухь, азабра сабур хуьх, дуьада дегиш тахьана амукь.

¹³Аллагьдиз талукь ксариз, абур муьгьтежвиле авайла, куьмек це, мугьманар кӀан хьухь.

¹⁴Куь геле къекъвезвайбуруз нуьсрет це — абуруз хийир-дуьа ая, лянет гумир.

¹⁵Шадвалзавайбурухъ галаз шадвал ая, шехьзавайбурухъ галаз шехьа.

¹⁶Сад садахъ галаз меслятвиле аваз уьмуьр твах. Лавгъа жемир, виниз тушир дережадин инсанрихъ галазни рафтарвал ийиз хьухь. Куьне куьн са акьван артух яз кьамир.

¹⁷Садазни писвиляй писвал ийимир, виридаз анжах хъсанвал ая.

¹⁸Виридахъ галаз квелай алакьзавай кьван ислягьвилелди уьмуьр твах.

¹⁹Зи дустар, куьне куь паталай кьисас къачумир, Аллагьдин хъел патал чка тур, гьикӀ лагьайтӀа Реббиди Каламда лугьузва: «Кьисас Зи Гъиле тур, За эвез гуда».

²⁰Аксина: «Ви душмандиз гишин ятӀа, фу це адаз, хъваз кӀанзаватӀа, яд це адаз. ИкӀ авуналди, вуна адан кьилел жуьгьенар кӀватӀда» .

²¹Жувал писвилив гъалиб жез тамир, амма хъсанвиливди писвилел гъалибвал къачу.