Read Lezgi New Testament – ЦӀийи Икьрар Римвийриз 15 Bible Online

Римвийриз 15 - Lezgi New Testament – ЦӀийи Икьрар bible

Римвийриз 15

¹Чна, къуват авай са иманийри, зайифбуруз абурун зайифвилер ялиз куьмекна кӀанда ва чна чаз кӀандайвал авуна виже къведач.

²Чакай гьар сад, жуван мукьув гвайдаз кӀандайвал ийиз ва ам Руьгьдин рекьяй чӀехи хьунин къайгъу чӀугваз, адаз кӀани кардихъ гелкъвена кӀанда.

³Месигьди Вичини Вичиз кӀандайвал ийизвачир, амма, кхьенвайвал: «Вакай чӀуру гафар лугьузвайбурун русвагьвилер Зал аватна».

⁴ГьикӀ лагьайтӀа, чав Каламдай агакьзавай сабурдалди ва кӀубанвилелди, чаз умуд хьун патал, Каламда авай вири квез чирвилер гун патал виликамаз кхьенвайди я.

⁵Къуй сабурни кӀубанвал гузвай Аллагьди квев, Иса Месигьдин терефдарриз кутугайвал, сад садахъ галаз меслятвиле аваз уьмуьр тухуз турай,

⁶куьне вирида сад хьиз, са сивяй Аллагьдин, чи Ребби Иса Месигьдин Бубадин тарифдайвал авурай.

⁷Аллагьдиз шукур авунин гьуьрметдай сада сад Месигьди куьн кьабулайвал кьабула.

⁸За квез лугьузва: Аллагьди бан-бубайриз гайи гафар тестикьарун патал, Аллагьдиз вафа къалурун патал, ва гьакӀни, кхьенвайвал, маса халкьаривайни Аллагьдиз Адан регьимдай шукур ийиз хьун патал, Месигьдикай чувудрин лукӀ хьана: «И кардай за Ваз шукур ийида маса халкьарин арада, Ви ТӀварцӀин тариф за ийида» .

¹⁰Ва мад кхьенва: «Шад хьухь, халкьар, Адан халкьдихъ галаз!»

¹¹Ва мадни: «Шукур ая Реббидиз, вири инсанар! Адаз тарифдин мани лагь, вири халкьар!»

¹²ГьакӀни Яшая лугьузва: «Ишаян Дувандилай Сад къведа ва хкаж жеда, халкьар идара авун паталди, халкьар Адак умуд кваз жеда» .

¹³Къуй умуддин чешме тир Аллагьди, куь имандалди куьн гьар жуьредин шадвиливни саламатвилив ацӀуррай. Пак Руьгьдин къуватдин куьмекдалди квез умудрин булвал гурай.

¹⁴Зи стхаяр-вахар, куьн хъсанвилив, гьар жуьредин чирвилерив ацӀанвайдахъ ва квевай садавай садаз несигьат гуз жедайдахъ зун тамамдиз агъунва.

¹⁵ЯтӀани и чарче за викӀегьдаказ бязи затӀар куь рикӀел хкизва, вучиз лагьайтӀа Аллагьди заз ганвай Вичин берекатдив кьурвал

¹⁶зал муькуь халкьар патал Иса Месигьдиз къуллугъзавайди хьун тапшуругъ авунва. Муькуь халкьарикай тирбур Пак Руьгьдалди Аллагьдиз талукь авунвай, Аллагьдиз хуш тир къурбанд хьиз, Аллагьдиз гъун патал, Шад Хабардикай муштулухар гуз, за Адаз къуллугъ ийиз зегьмет чӀугвазва.

¹⁷Гьа икӀ, анжах Иса Месигьдин крарал бине кьуна, завай Аллагьдиз ийизвай жуван къуллугъдал дамахариз жеда.

¹⁸Вири халкьар Аллагьдиз табий хьунал гъун патал, Месигьди зи куьмекдалди авурдалай гъейри, маса са куьникайни завай лугьуз жедач. Ада и кар гафуналди ва кардалди,

¹⁹аламатрин ва керемат-ишарайрин къуватдалди, Аллагьдин Руьгьдин къудратдалди кьилиз акъудна. АкӀ хьайила за и къуллугъ кьилиз акъудна: Месигьдикай Шад Хабардикай Ярусалимдилай та ИлирикӀдал къведалди муштулухар гун.

²⁰Зи алахъун Шад Хабардикай муштулух Месигьдикай гьеле чин тийизвай чкада гун хьана. Заз чарадан хандакӀдал эцигунар ийиз ваъ,

²¹амма кхьенвай гафар кьилиз акъудиз кӀан хьана: «Чпиз Адакай лугьун тавунвайбуруз аквада, ван тахьайбурни гъавурда акьада» .

²²Зи гьа и къуллугъ, зун куь патав къвез гзаф гъилера алахънатӀани, къвез тахьунин себеб хьана.

²³Гила за и вилаятра жуван зегьмет куьтягьнава. Ва гзаф йисара заз куь патав къвез кӀанзавайвиляй,

²⁴Испандиз фидайла, заз и кар ийиз кӀанзава. Гьаниз фидай рекье за квел кьил чӀугвадайдак ва за куь арада хьуникай са тӀимил лезет къачурдалай гуьгъуьниз заз куьне рехъ давамариз куьмекдайдак за умуд кутазва.

²⁵Исятда лагьайтӀа, зун Ярусалимда уьмуьр тухузвай, Месигьдиз талукьбуруз къуллугъун патал аниз физва,

²⁶вучиз лагьайтӀа МакӀеданда ва Ахайда авай иманийрин кӀватӀалри Ярусалимда уьмуьр тухузвай, Месигьдиз талукь кесибар патал садакьаяр кӀватӀун кьетӀнава.

²⁷Абуру икӀ авун чпи кьетӀнава, гьикӀ лагьайтӀа абур гьакъикъатдани и кесибрин вилик буржуник ква. Чувудри чпин Руьгьдин нуьсретар абурухъ галаз пайнатӀа, гьакӀ абуруни чпин патай чувудрихъ галаз дуланажагъдин няметар гуналди куьмекун лазим я.

²⁸За и тапшуругъ кьилиз акъудайдалай ва кӀватӀайди абурув вугайдалай гуьгъуьниз захъ Испандиз финин ният ава ва фидай рекье квелни кьил чӀугваз кӀанзава.

²⁹Зун куь патав атайла, за квез Месигьдин нуьсрет тамамдиз гъидайди заз чизва.

³⁰За квез минетзава, стхаяр-вахар, чи Ребби Иса Месигьдин ва Руьгьдин муьгьуьббатдин хатурдай, зи гьакъиндай Аллагьдиз дуьа авуналди, заз зи женгина куьмек це.

³¹Ягьудатда зун иман гвачирбурукай хилас хьунин гьакъиндай ва Ярусалимда Месигьдиз талукь уьмуьр тухузвайбуру зи къуллугъ хъсандиз кьабулунин гьакъиндай дуьаяр ая.

³²Аллагьди гайитӀа, гьа чӀавуз завай куь патав шаддаказ къвез жеда, ва чавай санал ял ягъиз жеда.

³³Къуй саламатвилин чешме язвай Аллагь квехъ виридахъ галаз хьурай. Амин.