Read Lezgi New Testament – ЦӀийи Икьрар Римвийриз 2 Bible Online

Римвийриз 2 - Lezgi New Testament – ЦӀийи Икьрар bible

Римвийриз 2

¹Гьавиляй, масадан дуван ийизвайди, вун вуж яз хьайитӀани, валай гъил къахчузвач. Масадбурук тахсир кутуналди вуна жуваз кар атӀузва, вучиз лагьайтӀа вунни, дуван ийизвайди, гьа кар ийизвайди я.

²Ни икӀ ийизватӀа, ам Аллагьдин дуванди вилив хуьзвайди чаз чизва, и дуван гьахъди я.

³Жува ийизвай крарай масадбурук тахсир кутуналди, ваз вун Аллагьдин дувандикай хкатдай хьиз яни, я инсан?

⁴Ва я вуна, Аллагьдин регьимди вун Вичин рекьел атунихъ тухузвайдан гъавурда авачиз, Аллагьдин чӀехи регьим, Адан мергьемет ва сабур гьисаба кьазвачни?

⁵Жуван терсвилелди ва авур кардал пашман тахьай рикӀелди вуна вал аватдай хъел кӀватӀзава, а хъел Аллагьдин хъилен юкъуз, гьахъ дуван жедай юкъуз, ви кьилел ацахьда.

⁶Аллагьди гьар садаз абуру авур крарай эвез гуда.

⁷ДатӀана хъсанвал ийиз, баркалла, гьуьрмет ва ажал тахьун жагъурзавайбуруз эбеди уьмуьр гуда.

⁸Амма жуваз кӀандай крар жагъурзавайди, гьакъикъат инкарзавайди ва писвилин рекье авайди хъилени гъазабди вилив хуьзва.

⁹Писвал ийизвай гьар сад, эвелни-эвел чувуд, ахпани муькуьди, хажалатди ва бедбахтвили вилив хуьзва.

¹⁰Амма хъсанвал ийизвайди, эвелни-эвел чувуд, ахпани муькуьди, баркаллади, гьуьрметди ва саламатвили вилив хуьзва,

¹¹вучиз лагьайтӀа Аллагьди сад муькуьдалай вине кьазвач.

¹²Мусадин Къанун авачиз гунагь ийизвайди Къанундилай къеце телеф хьана, ва Къанун чиз гунагь ийизвайдан дуван Къанундив кьурвал ийида.

¹³Къанундиз яб гуз Адал амал ийизвайбур ваъ, Къанун кьилиз акъудзавайбур Аллагьди гьахъ-михьибур яз гьисабзава.

¹⁴Эхь, чувудар туширбурухъ Къанун авач, амма абуру Къанунди тагькимзавайди чпин рикӀяй гьиссна ийизвайла, идалди абуру чпиз вуч авуна кӀандатӀа Къанун галачизни чизвайди къалурзава.

¹⁵Идалди абуру къалурзава хьи, Къанундин тагькимар абурун рикӀе кхьенва, и кардин гьакъиндай гьакӀ абурун виждандини ва гагь абур гьахъарзавай, гагьни абурал тахсир гъунин фикирри шагьидвалзава.

¹⁶И крар Аллагьди Иса Месигьдалди инсанрин чинебан крарин ва фикиррин дуван за вичикай муштулухар гузвай Шад Хабардив кьурвал ийидай юкъуз ашкара жеда.

¹⁷Ингье вуна вун чувуд я лугьузва, Къанундихъ далу акалзава ва вун Аллагьдиз мукьва я лугьуз дамахарзава.

¹⁸Ваз Адан къаст чизва ва Къанунди вердишарнавай вавай вуч хъсан я ва вуч пис ятӀа тайинариз жезва.

¹⁹Вуна вун буьркьуьбур патал аса яз, мичӀивиле авайбур патал экв яз,

²⁰ахмакьар патал несигьатдар яз ва авамар патал муаллим яз гьисабзава, вучиз лагьайтӀа вав Къанун — чирвилинни гьакъикъатдин кӀалуб гва.

²¹АкӀ тирла, масадбуруз тарс гуз, бес вучиз вуна жуваз чирвал гузвач? Вуна угъривилиз акси яз вязер ийизва, амма жува чуьнуьхзава.

²²Вуна зинавал авун айибзава, амма жува зинавал ийизва. Ваз бутар аквадай вилер авач, амма вуна бутханаяр тарашзава.

²³Вуна Къанундал дамахзава, амма, Къанун чӀуриз, Аллагь виляй вегьизва.

²⁴Кхьенва: «Куьн себеб яз халкьарин юкьва Аллагьдин ТӀвар виляй аватзава».

²⁵Вуна Къанундал амал ийизвай чӀавуз суьннет авуникай хийир ава, амма вуна Къанун чӀурзаватӀа, ви суьннет авунихъ са метлебни авач.

²⁶ГьикӀ лагьайтӀа, суьннет тавунвайбуру Къанундал амал ийизватӀа, бес абур суьннетнавайбур яз кьадачни?

²⁷Суьннет тавунвайда, амма Къанундал амал ийизвайда вак, суьннет авунвайдак ва Къанун чизвайдак, амма Адал амал тийизвайдак, тахсир кутада.

²⁸ГьикӀ лагьайтӀа чувуд — чувуд хьиз аквазвайди туш, халисан суьннетни — бедендал алайди туш.

²⁹Ваъ, халисан чувуд къенепатай вич гьахьтинди тир кас я, суьннетни — им Къанундин гьарфунив кьунвайвал ваъ, Руьгьдив кьунвайвал авунвай рикӀин суьннет я. Ихьтин касдиз инсанрин патай ваъ, Аллагьдин патай баркалла.