Read Lezgi New Testament – ЦӀийи Икьрар Римвийриз 4 Bible Online

Римвийриз 4 - Lezgi New Testament – ЦӀийи Икьрар bible

Римвийриз 4

¹Бедендин жигьетдай чи бан-буба тир Ибрагьимакай чавай вуч лугьуз жеда? Ада вуч гъилиз гъана?

²Ибрагьим ада авур крариз килигна гьахъ-михьивилиз акъуднатӀа, адаз дамахардай себеб авай, амма Аллагьдин вилик ваъ.

³Каламди вуч лугьузва бес? «Ибрагьима Аллагьдихъ иман авуна — им адан гьахъ-михьивал яз кьабулна».

⁴КӀвалахзавайдаз гьакъи гун — им савкьват ваъ, адаз къвезвай къазанжи я.

⁵Крарихъ далу акал тийиз, амма чалкечир гьахъ-михьи ийизвай Аллагьдихъ иман ийизвайди патал адан иман вич гьахъ-михьивилиз акъуднавайди яз гьисабда.

⁶Гьа икӀ, Аллагьди инсандин крариз килиг тавуна гьахъ-михьивал яз гьисабзавай и кар ийизвайди бахтавар я, тестикьарзава Давудани. Ада лугьузва:

⁷«Нин писвилерилай къахчунватӀа гъил, нин гунагьар кӀевнаватӀа, гьам бахтавар я!

⁸Аллагьди нин хиве твазвачтӀа гунагьар, гьам бахтавар я» .

⁹И нуьсрет анжах суьннетнавайбуруз талукь яни ва я суьннет тавунвайбурузни? Ибрагьимаз адан иман гьахъ-михьивал яз кьабулайдакай чна лагьанай.

¹⁰АкӀ яз мус гьисабнай? Суьннет ийидалди ва я гуьгъуьнлай? Гуьгъуьнлай ваъ, суьннет ийидалди!

¹¹Суьннетдин ишара адав ахпа, ам имандалди гьахъ-михьи тирди тестикьарун яз, гьеле ам суьннет тавунвайла, агакьнай. Гьа икӀ, суьннет тавунвай иманиярни гьахъ-михьибур яз гьисабун патал, Ибрагьимакай абурун виридан буба хьана.

¹²Ам неинки суьннет авунин адетдал амал ийизвай, чи буба Ибрагьимахъ суьннет ийидалди хьайи имандин рекьяйни физвай, чебни суьннет авунвайбурун бубани я.

¹³Дуьнья чпиз ирс яз жеда лагьана гайи гаф Ибрагьимазни адан эвледриз Къанундин куьмекдалди ваъ, абур имандин жигьетдай гьахъ-михьибур я лагьана гайиди я.

¹⁴И гайи гаф Къанун кьилиз акъудзавайбуруз талукь тиртӀа, иман гьаваянди ва Аллагьди гайи гаф кар галачирди жедай.

¹⁵ГьикӀ лагьайтӀа Къанун чӀуруни хъел гъида, амма Къанун авачир чкада Къанун чӀурунин тахсиркарвални авач.

¹⁶Гьавиляй и гаф, берекатдив кьурди хьун патал, иманидаз ганва. Гьа икӀ, ам Ибрагьиман вири эвледар патал гьакъикъиди я: неинки чпин умудар Къанундал амал авуник кутунвайбур патал, гьакӀни чпихъ Ибрагьимахъ хьтин иман авайбур патални. Ам чи виридан буба я.

¹⁷Каламда кхьенвайвал: «За вакай гзаф халкьарин бан-буба авунва». Ам вичи иман авур Аллагьдин вилик чи буба я — кьейибурал чан хкизвай ва гьеле авачирди авачирнай гъана авайди ийизвай Аллагьдин вилик.

¹⁸Са умудни амачирла, Ибрагьим умуд кутуна агъуна, гьавиляй «Ви несилни кьадардиз гьа икьванди жеда!» лагьанвайвал, адакай гзаф халкьарин буба хьана.

¹⁹Вичин яш виш йисав агакьнавай чӀавуз вичин беден саки кьенвайди ва Саррадизни аялар техъжезмайди Ибрагьимаз чизвайтӀани, адан иман зайиф хьанач.

²⁰Аллагьди гайи гафунихъ Ибрагьиман иманди ян ганач, аксина, ам иман себеб яз къуватдив ацӀана ва ада Аллагьдиз шукур ийизвай.

²¹Аллагьди гайи гаф Ада кьилиз акъуддай къуват Адахъ авайдахъ Ибрагьима кӀевелай иман ийизвай.

²²Ингье вучиз Аллагьди адан иман гьахъ-михьивал яз кьабулнатӀа.

²³И кар неинки са Ибрагьимаз,

²⁴ам чазни талукь я. Чи Ребби Иса Месигьдал кьейидалай кьулухъ чан Хкайдахъ ийизвай чи иманни Аллагьди гьахъ-михьивал яз гьисабда.

²⁵Иса Месигь чи тахсирар себеб яз ажалдин хура тунай ва чун гьахъ-михьивилиз акъудун патал Адал чан хтанай.