Read Lezgi New Testament – ЦӀийи Икьрар Римвийриз 5 Bible Online

Римвийриз 5 - Lezgi New Testament – ЦӀийи Икьрар bible

Римвийриз 5

¹Гьавиляй имандалди гьахъ-михьивилиз акъудуналди, чахъ чи Ребби Иса Месигьдин ТӀварцелди Аллагьдихъ галаз меслятвал жеда.

²Чун исятда авай берекатдихъ къведай рехъ чаз имандалди, Иса Месигьдин куьмекдалди ачух я. Аллагьдин баркалладикай чазни пай хьунин умуддалди чна дамахарзава.

³Неинки са идалди, чна гьакӀни азабралди дамахарзава, вучиз лагьайтӀа чаз чизва хьи, азабри дурум хьунухь,

⁴дурум хьуни тежриба, тежриба хьуни умуд гузва.

⁵Умудди, лагьайтӀа, гьевес хадач, вучиз лагьайтӀа Аллагьди Вичин муьгьуьббат чаз ганвай Пак Руьгьдалди чи рикӀериз цанва.

⁶Чун гунагьрин вилик гьеле ажуз тир чӀавуз Месигь тайин вахтунда чун, имандик квачирбур, патал кьена.

⁷ГьикӀ лагьайтӀа, маса сада вичин уьмуьр гьатта гьахъ-михьибур патални бажагьат гуда, ятӀани са вуж ятӀани дугъри кас патал кьинни мумкин я.

⁸Амма чун гьа гунагькарар яз амайла, Месигь чун паталди кьиналди Аллагьди чаз Вичин муьгьуьббат къалурна.

⁹Исятда, чун Месигьдин Ивидалди гьахъ-михьивилиз акъуднавайла, чун Адалди Аллагьдин хъилекай генани артух хилас авунва!

¹⁰Чун Аллагьдин душманар тир вахтара Адахъ галаз Адан Хцин кьиникьалди туькӀуьн хъувунатӀа, гила гьадалайни артух яз, туьхкӀвенвайбур яз, чун Адан уьмуьрдалди хиласни ийида!

¹¹Мадни артух, чи Ребби Иса Месигь арада аваз Аллагьди чаз Вичелди чун Вичихъ галаз туьхкӀуьр хъувун ракъурунал чна шадвалзава!

¹²Гьавиляй гунагь дуьньядиз са касдилай атана. Гьа са касдин гунагьди вичихъ галаз кьиникь гъана, гьа икӀ, виридакай ажал галайбур хьана, вучиз лагьайтӀа вирида чпин гунагьар ийиз хьана.

¹³Гьеле Къанун гудалди гунагь дуьньяда авазвай, амма Къанун авачир чкада гунагь тахсир яз кьадач.

¹⁴ЯтӀани Адамалай Мусадал къведалди Адама хьиз, Аллагьди эцигнавай къадагъа чӀурна, гунагь тавурбурални ажалди агъавал ийизвай. Адам, лагьайтӀа, атун лазим Тирдан къаматда авайди я.

¹⁵Амма берекатдин хатурдай ганвай паюнин таъсир Адаман тахсиркарвилин эсер хьтинди туш. Гзаф инсанар са касдин тахсирар себеб яз кьенатӀа, гила, гьадалайни артух яз, Аллагьдин берекат ва са Касдин, Иса Месигьдин, берекатдив кьур савкьват булдаказ гзафбуруз гузва!

¹⁶Са касдин гунагьдин нетижаяр и савкьватди гузвайдав гекъигиз жедач. Са тахсиркарвилиз авур дуванди кар атӀун арадал гъизва, амма берекатдин хатурдай ганвай паюни гзаф тахсиркарвилерай гьахъвал гъана.

¹⁷Анжах са касдин тахсиркарвал себеб яз ажалди агъавал ийиз эгечӀзаватӀа, адалай артух яз, са Инсандин, Иса Месигьдин, куьмекдалди берекатдин девлет ва гьахъ-михьивилин савкьват кьабулзавайбуру уьмуьрда агъавал ийида!

¹⁸Гьа икӀ, са инсандин тахсирди вири инсанриз кар атӀун гъайивал, гьакӀ Садан гьахъ-михьи карди вирибуруз уьмуьр гузвай гьахъ-михьивилиз гъана.

¹⁹Сад чӀалаз килиг тавуникди гзафбурукай гунагькарар хьайивал, гьакӀ Сад чӀалаз килигуналди гзафбурукай гьахъ-михьибур жеда.

²⁰Къанун лагьайтӀа, тахсиркарвал гзаф хьун патал, геж атана. Амма гунагь гзаф хьайи чкада берекатдин булвал гьадалай артух хьана,

²¹гунагьди агъавализ ва ажалдихъ тухуз гьикӀ хьанатӀа, гьакӀ Иса Месигьдин, чи Реббидин, куьмекдалди эбеди уьмуьрдихъ тухудай берекатдини гьахъ-михьивилелди агъавал ийидайвал авуна.