Read Lezgi New Testament – ЦӀийи Икьрар Римвийриз 7 Bible Online

Римвийриз 7 - Lezgi New Testament – ЦӀийи Икьрар bible

Римвийриз 7

¹Стхаяр-вахар, зун квехъ галаз Къанун чизвайбурухъ галаз хьиз рахазва. Инсандал анжах чан аламай кьван адал Къанундин гьукум алайди квез чизвачни кьван?

²Месела, гъуьлуьк квай паб, гъуьлел чан аламай кьван, некягьдин къанундалди вичин гъуьлуьхъ галаз алакъада ава. Эгер хьи гъуьл кьейитӀа, паб и къанундикай азад жезва.

³Гьавиляй, гьеле гъуьлел чан аламаз, паб масадаз гъуьлуьз физ хьайитӀа, и кардалди ада гъуьлуьнни папан вафа чӀурзава, амма гъуьл кьенватӀа, паб къанундикай азад я ва адак, масадаз гъуьлуьз хъфизвайла, гъуьлуьнни папан вафа чӀурна лугьуз, тахсир кутаз жедач.

⁴Куьнни гьакӀ я, зи стхаяр-вахар. Куьн Масадаз, кьейидалай кьулухъ чан Хтайдаз, талукь хьун патал ва гьа икӀ Аллагьдиз бегьер гъун патал, Месигьдин Беден кьинин куьмекдалди куьн Къанун патал кьена.

⁵Чна чи гунагькар тӀебиатдив кьурвал уьмуьр тухудай чӀавуз Къанунди чак чи бедендин паяра чпин кар аквазвай гунагькар гьевесар уяхардай, ва абурун бегьер ажал тир.

⁶Гила лагьайтӀа, са мус ятӀани чун пацук кутур Къанун патал чун кьенвайла, виликдай хьиз, Къанундин гьарфунив кьурвал ваъ, цӀийикӀа, Руьгьдин куьмекдалди Аллагьдиз къуллугъун патал, чун азад авунва.

⁷Им вуч лагьай чӀал я? Къанун гунагь я лагьай чӀал яни? Гьелбетда, ваъ. Амма гунагь вуч ятӀа заз чир жедачир, Къанун авачиртӀа. Мумкин тир, месела, заз нефс вуч ятӀа чир тахьун, Къанунди лугьузвачиртӀа: «Темягьда гьатмир».

⁸Гунагьди, и тагькимдай багьна жагъанваз, зи чанда вири жуьрейрин гьевесар арадал гъана, амма Къанун галачиз гунагьдал чан жедач.

⁹Са мус ятӀани за Къанун течиз уьмуьр тухузвай, амма заз тагьким чир хьайи чӀавуз гунагьдал зи беденда чан атана,

¹⁰зун лагьайтӀа, кьена. КилигайтӀа, уьмуьр гъун лазим тир тагькимди ажал гъана,

¹¹вучиз лагьайтӀа гунагьди, тагьким вич гъиликиз, зун алцурарна ва Руьгьдин рекьяй кьиникьал гъана.

¹²Гьа икӀ Къанун пакди я, тагькимни пакди я, гьахъ-михьиди ва хъсанди я.

¹³АкӀ хьайила, хъсанда заз ажал гъанани? Гьелбетда, ваъ! Амма гунагьди вич гунагь яз къалурун патал, хъсандан куьмекдалди вичин кар ийиз, зи чанда ажал арадал гъана. Ва гьа и саягъда, тагькимдин куьмекдалди, чаз гунагь гьикьван эйбежер ятӀа аквадай мумкинвал хьана.

¹⁴Къанун руьгьани тир чӀал чаз чизва. Зун лагьайтӀа беден авайди я, зун гунагьдиз лукӀвиле маса ганва.

¹⁵За вучзаватӀа, зун гъавурда акьазвач. Заз вуч кӀанзаватӀа за ийизвач, адан чкадал жуваз такӀанзавай кар ийизва.

¹⁶Жуваз кӀан тийизвай кар за ийизватӀа, за идалди Къанун вич хъсан тирдахъ галаз разивал ийизва.

¹⁷Гьа икӀ и кар за жува ваъ, зак квай гунагьди ийизва.

¹⁸Зак, зи бедендик, хъсан са затӀни квачирди заз чизва, вучиз лагьайтӀа заз хъсанвал ийиз кӀанзава, амма ийиз жезвач.

¹⁹За ийизвайди заз ийиз кӀанзавай а хъсанвал туш. За жуваз тийиз кӀанзавай писвал ийизва.

²⁰Гьа икӀ, жуваз кӀан тийизвай кар за ийизватӀа, и кар ийизвайди зун ваъ, зак квай гунагь я.

²¹Гьа икӀ ина заз ихьтин къанунди кар ийизвайди жагъана: заз хъсанвал ийиз кӀанзавай чӀавуз гьасятда писвал атана акъатзава.

²²Къенепатай за Аллагьдин Къанундал шадвалзава,

²³амма заз зи беденда маса къанунди вичин кар ийизвайди аквазва. И къанунди зун рикӀяй вичелай рази тир къанундихъ галаз дяве тухузва ва закай зи бедендин паяра вичин кар ийизвай гунагьдин къанундин есир ийизва.

²⁴Бахт авачир инсан я зун! Зун ажал галай и бедендикай ни хилас авурай?

²⁵И кар чи Ребби Иса Месигьдин куьмекдалди авур Аллагьдиз шукур хьурай! Гьа икӀ, зун зи акьулдалди Аллагьдин Къанундин, амма бедендалди зун гунагьдин къанундин лукӀ я.