Read Lezgi New Testament – ЦӀийи Икьрар Римвийриз 8 Bible Online

Римвийриз 8 - Lezgi New Testament – ЦӀийи Икьрар bible

Римвийриз 8

¹Гила Иса Месигьдиз талукь тирбуруз са жуьрединни кар атӀун авач,

²вучиз лагьайтӀа уьмуьр гузвай Руьгьдин къанунди вун гунагьдинни ажалдин къанундикай Иса Месигьдин куьмекдалди азад авунва.

³Чи гунагькар тӀебиат табий ийиз тахьай Къанундилай алакь тавурди Аллагьди авуна. Ада Вичин Хва инсандин гунагькар бедендиз ухшар беденда аваз ракъурна ва, Адакай чи гунагьрай къурбанд авуналди, гунагьдиз кар атӀана.

⁴И кар Ада, гунагькар тӀебиатдив кьурвал ваъ, Руьгьдив кьурвал уьмуьр тухузвай чи арада Къанундин тагькимар кьилиз акъатун патал, авуна.

⁵Гунагькар тӀебиатдив кьурвал уьмуьр тухузвайбурун къанажагъди и тӀебиатдиз вуч кӀанзаватӀа гьадакай фикирзава, амма Руьгьдив кьурвал уьмуьр тухузвайбурун къанажагъди Руьгьдиз вуч кӀанзаватӀа — гьадакай.

⁶Гунагькар тӀебиатдай къвезвай къанажагъди ажалдихъ тухузва, амма Руьгьдай къвезвай фикирри уьмуьрдихъни ислягьвилихъ тухузва.

⁷Гунагькар къанажагъ Аллагьдихъ галаз душманвиле ава. А къанажагъ Аллагьдин Къанундиз табий жезвач, я адалай табий жез алакьни ийидач.

⁸Гьавиляй гунагькар тӀебиатдин гьукумдик кваз уьмуьр тухузвайбурувай Аллагьдиз хуш крар ийиз жезвач.

⁹Амма Аллагьдин Руьгь рикӀивайни квек кваз аватӀа, куьн гунагькар тӀебиатдин гьукумдик ваъ, Руьгьдин гьукумдик ква. Месигьдин Руьгь квачирди Адаз талукь туш.

¹⁰Месигь квек кваз аватӀа, куь беден гунагь себеб яз рекьида, амма Руьгьди куьн Аллагьдихъ галаз туьхкӀвейвиляй уьмуьрдив ацӀурда.

¹¹Исадал кьейидалай кьулухъ чан Хкайдан Руьгь квек кваз уьмуьр тухузватӀа, Месигьдал кьейидалай кьулухъ чан Хкайда квек кваз уьмуьр тухузвай Вичин Руьгьдалди куь ажал галай беденрални чан хкида.

¹²Гьавиляй, стхаяр-вахар, гунагькар тӀебиатди чал илитӀзавай саягъда уьмуьр тухудайвал, чун адан буржуник квайбур туш.

¹³Куьне квел гунагькар тӀебиатди илитӀзавай саягъда уьмуьр тухузватӀа, куьн телеф жеда. Куьне Руьгьдалди гунагькар тӀебиатдин гьерекатар рекьизватӀа, квел чан жеда.

¹⁴Вучиз лагьайтӀа Аллагьдин Руьгьдин регьбервилик квай вири Аллагьдин веледар я.

¹⁵Квев агакьнавайди идалай кьулухъни кичӀевиле уьмуьр тухун патал ганвай ва квекай лукӀар ийидай руьгь ваъ, квекай Аллагьдин веледар ийидай Руьгь я, Адалди чун Аллагьдихъни элкъвена рахазва: «Абба! Буба чан!»

¹⁶Аллагьдин Руьгьдини чи руьгьдихъ галаз санал чун Аллагьдин веледар тирдан шагьидвалзава.

¹⁷Чун рикӀивайни Адан веледар ятӀа, чун Аллагьдин ирссагьибарни я, Месигьдихъ галаз Гьадан ирссагьибарни я. Чна адахъ галаз санал азаб чӀугвазватӀа, чал Адахъ галаз санал баркаллани къведа.

¹⁸Чи гилан азабар, чаз инлай кьулухъ ахъа жедай баркалладив гекъигайла, за са затӀни тушиз гьисабзава.

¹⁹ГьикӀ лагьайтӀа халкь авунвай вирида сабур авачиз Аллагьдин веледар ашкара авун вилив хуьзва.

²⁰Вучиз лагьайтӀа халкь авунвай вири затӀар уьмуьрдихъ мана авачирвилиз, хабарни такьуна, чеб муьтӀуьгъ Авурдан къастуналди табий авунай. Амма халкь авунвайдаз, Аллагьдин веледри къачудай хьтин баркалла алай азадвал къачун патал, кьиникьин гьукумдикай азад хьунин умуд ава.

²²Халкь авунвай вирибуру икьван чӀавалди, аял хазвай папа хьиз, цӀугъ ийизвайди ва азият чӀугвазвайди чаз чизва,

²³неинки са гьабуру, чна вилив хуьзвайдан замин яз Руьгь агакьнавай чнани къенепатай цӀугъ ийизва, сабур авачиз, чун веледвилиз кьабулунал, яни чун михьиз азад хьунал вил алаз акъвазнава.

²⁴Чун хилас хьанва, амма им гьеле умуд я. Умуд, лагьайтӀа, вилиз аквазвайдахъ элкъвена жедач; са вуч ятӀа аквазватӀа, адак умуд кутун куьз я кьван?

²⁵Чна таквазвайдак умуд кутазватӀа, чна ам сабурдивди дурум гваз вилив хвена кӀанда.

²⁶ГьакӀ чаз чи вири зайифвилера Руьгьдини куьмек гузва. Чаз куьн гьакъиндай дуьа авуна кӀандатӀани чизвач, амма Руьгьди Вичи гафаралди лугьуз тежедай агьар чӀугуналди чи гьакъиндай тавакъу ийизва.

²⁷РикӀер Чирзавайдаз Руьгьдин фикир чизва, вучиз лагьайтӀа Руьгьди Аллагьдин къастунихъ галаз разивиле аваз пакбурун гьакъиндай тавакъу ийизва.

²⁸Чаз чизва хьи, Аллагьди Вич кӀандайбур ва Вичин ниятдив кьурвал эвернавайбур патал вири хийирдиз элкъуьрзава.

²⁹Исадикай гзаф стхайрин-вахарин арада Сад лагьай велед хьун патал, Аллагьди виликамаз чир хьайибуруз Вичин Хцин къаматдиз ухшарбур хьун тайинарни авуна.

³⁰Вичи виликамаз тайинарайбуруз Ада эверни авуна, эверайбур гьахъ-михьивилиз акъудна ва гьахъ-михьивилиз акъуддайбурал баркаллани гъана.

³¹Чна идакай вуч лугьун? Аллагь чи патал алатӀа, нивай чаз аксивал ийиз жеда?

³²Вичин Хцин гьайиф Татайда, амма Ам чун вири патал Гайида Адахъ галаз чаз вири гудачни бес?

³³Аллагьди хкягъайбурук ни тахсир кутада? Гьахъ-михьивилиз акъудзавайди Аллагь я.

³⁴Чаз нивай кар атӀуз жеда? Кьейиди Иса Месигь я; гьадалайни артух яз Адал чан хтана ва исятда Ам Аллагьдин эрчӀи гъилихъай ацукьнава. Ада чи гьакъиндай тавакъуни ийизва.

³⁵Чун Месигьдин муьгьуьббатдивай куьвай къакъудиз жеда? Хажалатдивай ва я четинвилеривай? Чи геле къекъуьнивай ва я кашавай? КьецӀилвиливай ва я ажалдивай?

³⁶Кхьенвайвал я: «Ви паталай гьар юкъуз чун рекьизва, кьасабханадиз гьалзавай хипериз хьиз килигзава чаз» .

³⁷Амма вири и крарал чун кӀан Хьайидан куьмекдалди чна лап чӀехи гъалибвал къачузва.

³⁸Зун кӀевелай агъунва: Я ажалдивай, я уьмуьрдивай, я малаикривай, я гьукумривай, я алай аямдивай, я къведай аямдивай, я къуватривай, я кьакьанвиливай, я деринвиливай, я халкь авунвай кьван амайбурукай — са куьнивайни чун Аллагьди чи Ребби Иса Месигьди авур кардалди къалурай муьгьуьббатдивай къакъудиз жедач!