Read Lezgi New Testament – ЦӀийи Икьрар Римвийриз 9 Bible Online

Римвийриз 9 - Lezgi New Testament – ЦӀийи Икьрар bible

Римвийриз 9

¹Месигьдиз талукь касдиз кутугнавайвал, за гьакъикъат лугьузва ва табзавач. Заз и кардин гьакъиндай Пак Руьгьдин регьбервилик квай зи вижданди шагьидвалзава.

²Зун гзаф пашман я, ва зи рикӀ эхир авачир тӀалдив ацӀанва.

³Ивидалди заз багърияр тир зи стхайрин — исраилвийрин чкадал заз жув негь авунайтӀа ва Месигьдивай къакъуднайтӀа кӀандай. Хвавилин ихтиярар, баркалла ва Аллагьдихъ галаз Икьрарар гьабурув агакьнай, абуруз Къанун, Аллагьдиз ибадат авун ва Ада гайи гафар гьабуруз ганай.

⁵И халкьдин арадай бан-бубаяр акъатна, абурун арадай, инсандин тӀебиат хас яз, Месигь акъатнава. Адаз — виридан кьилел алай Аллагьдиз эбеди яз шукур хьурай. Амин.

⁶Амма им Аллагьдин Гаф къуватдай аватнава лагьай чӀал туш, вучиз лагьайтӀа Исраилдин вири халкь гьакъикъи Исраил туш.

⁷Ибрагьиман вири эвледар адан гьакъикъи веледар туш. Кхьенва: «Ви тухум Исакьа давамарда».

⁸Им акӀ лагьай чӀал я хьи, Ибрагьиман вири эвледар Аллагьдин гьакъикъи веледар туш. Ибрагьиман гьакъикъи веледар Аллагьди гайи гаф низ талукь ятӀа, гьабур я.

⁹И гаф и жуьреда ганай: «Тайинарнавай вахтунда Зун хкведа, ва Саррадиз хва жеда».

¹⁰Амма неинки са им хьана. Рефигъадин[1] кьве хцин бубани гьа сад тир — чи бан-буба Исакь.

¹¹Амма гьеле кьветхверар хадалди ва абуру са вуч ятӀани хъсан ва я пис кар ийидалди — Аллагьди хкягъайди

¹²абурун крарилай ваъ, Эверзавайдалай Вичелай аслу хьун патал — Рефигъадиз лагьанай: «ЧӀехиди гъвечӀидаз лукӀ жеда».

¹³Идакай кхьенвайвал хьана: «Заз Якьуб кӀан хьана, Эсав такӀан».

¹⁴Им вуч лагьай чӀал я? Яраб Аллагь гьахъ туш жал? Гьелбетда, ваъ!

¹⁵Ада Мусадиз лагьана: «За низ регьим ийизватӀа, гьадаз регьим ийида, низ инсаф ийизватӀа, гьадаз инсаф ийида» .

¹⁶Гьавиляй метлеб инсандин гьевесдихъ ва я алахъунихъ ваъ, Аллагьдин регьимдихъ ава.

¹⁷Каламда Аллагьди фиръавандиз лугьузва: «Ви винел Зи къуват къалурун патал ва вири чилел Зи ТӀвар машгьур авун патал За вун хкажна».

¹⁸Гьавиляй Аллагьди регьим кӀандайбуруз регьим ийизва, терсвал ийиз кӀанзавайбуруз терсвал ийизва.

¹⁹Са ни ятӀани заз лугьун мумкин я: «АкӀ хьайила, вучиз Ада чак тахсир кутазва? Адан къастунин хура нивай акъвазиз жеда?»

²⁰Бес вун вуж я кьван, инсан, Аллагьдихъ галаз гьуьжетар ийиз? Гъилерив авунвай затӀуни вич авунвай касдиз лугьузвани кьван: «Вуна вучиз зун ихьтинди яз авуна?»

²¹ХъенчӀин къапарин устӀардиз чепедин гьа са кӀусуникай гьуьрмет авайбурун межлисда ва я агъуз дережадин крара гъиликдай къаб-къажах гьазурдай ихтияр авачни кьван?

²²Вичин хъел ва къуват къалуриз кӀанзавай Аллагьди Вичиз хъел гъизвайбур ва терг авун патал гьазурнавайбур яргъалди эхзавайла, вучда кьван?

²³Вичиз регьим низ ийиз кӀанзаватӀа ва вуж Ада баркалла патал гьазурнаватӀа, гьабуралди виридаз Вичин баркалладин девлет къалурун патал Аллагьди икӀ ийиз хьайитӀа, вучда кьван?

²⁴Ада эвер чаз ийизва, чун тек са чувудрикай ваъ, муькуьбурукайни я.

²⁵Гьашидин ктабда Аллагьди лугьузвайвал жезва: «За „Зи халкь“ лугьуда Зи халкь туширдаз; кӀан тийизвайдаз „кӀаниди“ лугьуда» ,

²⁶ва «„Куьн Зи халкь туш“ лагьанвай чкада абуруз „чан алай Аллагьдин рухваяр“ лугьуда» .

²⁷Яшая Исраилдикай икӀ лугьуз гьарайзава: «Исраилдин рухваяр кьадардалди гьуьлуьн къум кьван яз хьайитӀани, анжах тӀимилбур хилас жеда,

²⁸вучиз лагьайтӀа, Реббиди виликамаз малумарай кар Вичи чилел кьетӀидаказ ва фад-фад кьилиз акъудда» .

²⁹Мадни Яшая виликамаз лагьайвал: «Къуватрин Реббиди сагъ яз амукьайбур са шумуд туначиртӀа, чун Садумдиз ухшар жедай, Гамур хьиз жедай чун» .

³⁰Гила чна вуч лугьун? Гьахъ-михьивилихъ камни къачун тавур мажусийрив гьахъ-михьивал агакьна. И гьахъ-михьивал имандай гузва.

³¹Муькуь патахъай, хкянавай Исраилди Аллагьдихъ галаз вич дуьз тухуз тадай Къанун жагъурзавай, амма абуруз Ам жагъанвач.

³²Вучиз? Вучиз лагьайтӀа абуруз а гьахъ-михьивал имандив кьурвал ваъ, крарив кьурвал къачуз кӀан хьана. ГалкӀидай къванцихъ абурун кӀвач галкӀана.

³³Идакай кхьенва: «Ингье За Сигьандал кӀвач галкӀидай Къван эцигзава, Раг эцигзава, вич себеб яз инсанар алукьдай, амма Адахъ иман ийизвайдаз регъуь жедач» .