Read Lezgi New Testament – ЦӀийи Икьрар 1-Каринфвийриз 1 Bible Online

1-Каринфвийриз 1 - Lezgi New Testament – ЦӀийи Икьрар bible

1-Каринфвийриз 1

¹Аллагьдин къастуналди хкянавай Иса Месигьдин илчи хьунин везифа хиве тунвай Павелан ва СастӀен стхадин патай

²Каринфда авай иманийрин кӀватӀалдиз, Иса Месигьдалди гунагьрикай михьи авунвайбуруз, Адаз талукь хьун патал эвернавайбуруз, гьакӀни жуьреба-жуьре чкайра Иса Месигьдин, яни абурун ва чи Реббидин ТӀварцӀихъ элкъвезвайбуруз.

³Аллагьдин, чи Бубадин, ва Ребби Иса Месигьдин патай берекат ва саламатвал хьурай квез.

⁴Аллагьди Иса Месигьдалди квез берекат ганва лугьуз, за гьар са чӀавуз куь паталай зи Аллагьдиз шукур ийизва.

⁵Месигь себеб яз, Аллагьди квез гьар са патахъай, гьар са гафуна ва гьар са чирвиле девлет ганва.

⁶ГьикӀ лагьайтӀа чна Месигьдикай авур шагьидвилин гьакъикъивал квелди тестикьарна.

⁷Гьавиляй куьне чи Ребби Иса Месигь пайда хьун вилив хуьзвай кьван береда Руьгьдикай ганвай паюна са дарвални жедач.

⁸Чи Ребби Иса Месигь хтай юкъуз квек са тахсирни тежедайвал, Ада куьн эхирдал кьван имандал хьунал мягькемарда.

⁹Вичин Хва Иса Месигьдихъ галаз, чи Реббидихъ галаз рафтарвиле хьухь лугьуз квез эверай Аллагьди Вичи гайи гафуниз вафа хуьзва!

¹⁰Чи Ребби Иса Месигьдин ТӀварцӀелай за квез сад садахъ галаз туькӀвена хьухь лугьуз минетзава, стхаяр-вахар! Къуй куь арада са чаравални тахьуй, куь фикирарни ниятар сад хьурай.

¹¹Зи стхаяр-вахар, Хилаядин кӀвалевайбурувай заз куь гьуьжетрикай чир хьана.

¹²Зи фикирда авайди квекай садбуру икӀ лугьун я: «Зун Павелан терефдар я», муькуьбуру — «Зун — АпӀаласан», пуд лагьайбуру — «Зун — Кифадин», кьуд лагьайбуру — «Зун — Месигьдин».

¹³Месигь пайи-паяр хьанани кьван? Я туштӀа, куь паталай хашуниз ягъайди Павел тир жал? Ва я куьне Павелан тӀварцӀелай цик акахьун къачунай жал?

¹⁴Аллагьдиз шукур, Криспалайни Гаялай гъейри, за квекай садавни цик акахьун къачуз туначир,

¹⁵гьакӀ хьайила квевай садавайни вичив зи тӀварцӀелай цик акахьун къачуз турди я лугьуз жедач.

¹⁶Эхь, за Истефасан кӀвалевайбурувни цик акахьун къачуз тунай, мад са нив ятӀани цик акахьун къачуз тур хьтин кар зи рикӀел аламач.

¹⁷Зун лагьайтӀа, Месигьди инсанрив цик акахьун къачуз таз ваъ, Шад Хабардикай муштулухар гуз ракъурнава. За инсанрин камал квай гафар галачиз муштулухар гун лазим я. МасакӀа хьайитӀа Месигьдин хашуни вичин гуж квадарда.

¹⁸Техкверна терг жедайбуру хашуникай хабар ахмакьвал яз гьисабзава, амма хилас жедай чун патал ам Аллагьдин къуват я.

¹⁹ГьикӀ лагьайтӀа, кхьенва: «За камал авайбурун камал са куьнайни туширвал ийида, акьул авайбурун акьулни За инкарда» .

²⁰Гьинава камал авайди? Гьинава тавратдар? Гьинава и асирдин магьир гьуьжеткар? И дуьньядин камал гьакъикъатда ахмакьвал тирди Аллагьди къалурначни кьван?

²¹Аллагьдихъ камал авай: Аллагьдай кьил акъудун патал, инсанри чпин камалдикай менфят къачун тийидайвал авуна. Идан чкадал Аллагьди чна ваз ийизвай ахмакь хабардин чӀалахъ жезвайбур хилас авун кьетӀна.

²²Чувудриз керемат-ишараяр кӀанзава, муькуьбуру камал жагъурзава,

²³чна лагьайтӀа, хашуниз ягъай Месигьдикай хабар гузва — им чувудар патал кӀвач галкӀидай къван я, муькуьбур патал — акьул тахьун.

²⁴Амма Аллагьди эвернавайбур патал, абур кӀандатӀа чувуд, кӀандатӀа муькуьбур хьурай, Месигь Аллагьдин къуватни камал я!

²⁵ГьикӀ лагьайтӀа Аллагьдин «сефигьвиле» инсандин камалда авайдалай гзаф камал ава, Аллагьдин «зайифвиле» инсандин къуватда авайдалай гзаф къуват ава.

²⁶Аллагьди квез эверай чӀавуз куьн гьихьтинбур тиртӀа килиг, стхаяр-вахар. Куь арада, инсандиз хас жуьреда веревирд авуртӀа, камал авайбур гзаф тирни, къудрат авайбур гзаф тирни, тӀвар-ван авайбур гзаф тирни?

²⁷Амма Аллагьди камал авайбуруз регъуь хьун патал дуьньяда сефигьбур яз кьазвайбур хкяна, къуват авайбуруз регъуь хьун патал зайифбур хкяна.

²⁸Важиб авайди яз гьисабзавайди агъузарун патал, Ада дуьньяда са къиметни авачирди, агъада авайди ва русвагьнавайди хкяна,

²⁹гьакӀ хьайила садавайни Адан вилик вичин тарифиз жедач.

³⁰Аллагьди лагьайтӀа, куьн чун паталди Аллагьдин камал, гьахъ-михьивал, гунагьрикай михьи хьунухь ва гъил къахчунин себебкар хьанвай Иса Месигьдихъ галкӀурна.

³¹Гьавиляй, Каламда кхьенвайвал жезва: «Тариф ийизвайда Аллагьдалди тариф авурай».