Read Lezgi New Testament – ЦӀийи Икьрар 1-Каринфвийриз 10 Bible Online

1-Каринфвийриз 10 - Lezgi New Testament – ЦӀийи Икьрар bible

1-Каринфвийриз 10

¹Стхаяр-вахар, заз чи вири бан-бубаяр циферик кваз хьайидакай ва гьуьляй тӀуз фейидакай куьн са хабарни авачиз таз кӀанзавач.

²Циферани гьуьле абурув виридав Мусадиз талукьбур яз цик акахьун къачуз тунай.

³Абуру вирида цаварилай атай гьа са тӀуьн незвай

⁴ва гьа са хъвадайди хъвазвай. Абуру чпихъ галаз къвезвай Руьгьдин гьа са рагай хъвазвай, гьа раг Месигь тир.

⁵Амма абурукай гзафбуруз Аллагьди майил ийизвачир ва эхирни абурун мейитар кьурум тирвал чкӀанай.

⁶Им чаз виридаз чешне я: чна, абуру тӀалабайвал, писвал тӀалабна кӀандач.

⁷Каламда: «Халкь нез-хъваз ацукьна, гуьгъуьнлайни къугъунариз къарагъна», — кхьенвайвал, абурукай бязибуру авур хьиз, бутриз икрам ийимир.

⁸Абурукай бязибуру авур хьиз, чнани явавал тийин, гьа явавили са юкъуз къанни пуд агъзур кас рекьидайвал авунай.

⁹Гуьгъуьнлай гъуьлягъри кӀасна кьейи абуру авур саягъда тежедайвал, чна Месигь синагъ тийин.

¹⁰Абурукай бязибуру хьиз, наразивални ийимир, гьавиляй терг ийидай малаикди абур кьенай.

¹¹И крар абурун кьилел чешне яз атанай. Им эхирзаманда авай чун патал тагьким яз кхьенва.

¹²ГьакӀ хьайила, са низ ятӀани вич мягькемдиз акъвазнавайди хьиз аватӀа, къуй ам вич ярх тахьун патал мукъаят хьурай!

¹³Квел икьван чӀавалди ацалтзавай вири четинвилер инсанрал гьалтзавай адетдин синагъар хьунилай гъейри маса затӀ туш. Куьн кьадардилай артух синагъ авуниз Аллагьди рехъ гудач, Ада вичи гайи гафуниз вафа хуьзва. Квевай а четинвал эхиз хьун патал, куь кьилел четинвал атай чӀавуз Ада квез ам алуддай рехъни къалурзава.

¹⁴Гьавиляй, зи играмибур, бутриз икрам авуникай кьил къакъуд.

¹⁵За квез акьул авай инсанриз хьиз лугьузва, веревирд куьне ая.

¹⁶Чна хийир-дуьа ийизвай мубарак сукӀради чун Месигьдин Ивидиз шерик ийизвачни кьван? Чна атӀузвай фа чун Месигьдин Бедендиз шерик ийизвачни кьван?

¹⁷Фу сад тир хьиз, чунни, гзаф ятӀани, са беден я, вучиз лагьайтӀа сад тир фа чи пайни ава.

¹⁸Исраилдин халкьдиз килиг: къурбанд авунвайди незвайбур вири са къурбангандиз шерик жезвачни?

¹⁹За лугьузвани кьван: бутдихъ ва я къурбанддиз акъуднавайдахъ са гьихьтин ятӀани метлеб ава?

²⁰Гьелбетда, ваъ, амма кар ана ава хьи, мажусийри чпин къурбандар гуналди, абур Аллагьдиз ваъ, чӀуру жинерриз къурбанд ийизва. Амма заз куьн жинеррихъ галаз алакъада хьана кӀанзавач.

²¹Квевай гьа са вахтунда Реббидин сукӀрадайни жинеррин сукӀрадай хъваз жедач, гьа са вахтунда Реббидин суфрадилай ва жинеррин суфрадилай нез жедач.

²²Ва я чна Аллагьдик хъилен цӀай кутазва лагьана фикирзавани? Чаз Адалай гзаф къуват гвайди авани кьван?

²³Куьне лугьузва: «Вири ихтиярар ава». Амма виридакай хийир авач. «Вири ихтиярар ава», амма вирида са вуч ятӀа арадал гъуниз къуллугъзавач.

²⁴Къуй садни жуваз кӀандайвал ийиз алахъ тавурай, амма масадбурун хийирдихъ гелкъуьрай.

²⁵Базардал маса гузвай вири як, ам гьинай атанватӀа чир тавуна, рикӀин секинвилив неъ,

²⁶вучиз лагьайтӀа «чил ва чилел алай кьван вири Реббидинди я» .

²⁷Иман гвачир касди квез фу нез эверай чкадиз квез физ кӀан хьайитӀа, квез теклифзавай кьван вири затӀар, жузунар тавуна, рикӀин секинвиливди неъ.

²⁸Амма квез ихьтин чӀавуз «Им къурбанддин як я», — лугьуз хьайитӀа, квез икӀ лагьай касдин ва виждандин секинвилин хатурдай ам немир —

²⁹зи фикирда авайди ви хсуси виждан ваъ, маса касдин виждан я. Вучиз зи азадвал чарадан вижданди айибдайвал жеда кьван?

³⁰За Аллагьдиз шукур ийиз незватӀа, а тӀуьн себеб яз зун вучиз айиб авурай кьван?

³¹Гьа икӀ, куьне вуч ийиз хьайитӀани, нез ва хъваз хьайитӀани, Аллагьдиз шукур ийидайвал ая.

³²Сад паталдини кӀвач галкӀидай къван жемир — я чувудар паталди, я муькуьбур паталди, я Аллагьдин иманийрин кӀватӀал паталди.

³³За хьиз, вирибуруз вири крара абур рази жедайвал ая. Зун жуван хийирдихъ ваъ, гзафбур хилас хьун патал, гьабурун хийирдихъ къекъвезва.