Read Lezgi New Testament – ЦӀийи Икьрар 1-Каринфвийриз 15 Bible Online

1-Каринфвийриз 15 - Lezgi New Testament – ЦӀийи Икьрар bible

1-Каринфвийриз 15

¹Стхаяр-вахар, за квез муштулух гайи, куьне кьабулай ва вичелди куьн мягькем хьайи Шад Хабар за куь рикӀел хкизва.

²Куьн за квез муштулух яз гайидал кӀевиз акъвазайтӀа, куьн гьадалди хилас жеда, тахьайтӀа куь иман гьаваянди я.

³Жува къачур виридалайни важиб тирди за квев вуганва: Каламра авайвал, Месигь чи гунагьрай кьенай.

⁴Каламда авайвал Ам кучукнай ва кьейи пуд лагьай юкъуз чан хтанай.

⁵Ам Кифадиз акунай ва ахпа цӀикьвед тилмиздиз.

⁶Идалай гуьгъуьниз Ам вад вишелайни гзаф стхайриз-вахариз гьа са вахтунда акунай. Абурукай гзафбурал чан алама, са бязибур рагьметдиз фенва.

⁷Са кьадар чӀавалай Ам Якьубаз акунай, ахпа гьакӀни вири илчийриз,

⁸ва геж хьиз куь арадиз атай язух заз Ам виридалай гуьгъуьниз акунай.

⁹Зун лагьайтӀа, илчийрикай виридалайни гъвечӀиди я ва гьатта илчидин тӀварцӀиз лайихни туш, вучиз лагьайтӀа зун Аллагьдин иманийрин кӀватӀалдин геле къекъвенай.

¹⁰Амма Аллагьдин берекатди гайивал зун вуж ятӀа гьам я, Адан берекат зак нагьакьанди хьанач: за амайбурулай гзаф зегьмет чӀугуна, яни за ваъ, захъ галай Аллагьдин берекатди.

¹¹Ни муштулух гузватӀа са гафар я: за ва я абуру. Кьилинди куьн чна муштулух гузвайдан чӀалахъ хьунухь я.

¹²Лагь кван заз, Месигьдал кьейидалай кьулухъ чан хтана лугьуз муштулух гузватӀа, квекай са бязибуру гьикӀ лагьана кьейибурал чан хтун жедай кар туш лугьузвайди я?

¹³Кьейибурал чан хтун авай кар туштӀа, Месигьдални чан хтанвач.

¹⁴Месигьдал чан хтанвачтӀа, чна муштулух гузвайдахъни чи имандихъ са манани авач.

¹⁵Гьа са чӀавуз чакай Аллагьдикай тапан шагьидвал ийизвайбур жезва, вучиз лагьайтӀа чна, кьейибурал чан хкиз тахьайтӀани, Аллагьди чан хкун тавур Месигьдал Ада чан хкана лугьуз шагьидвал авунай.

¹⁶ГьикӀ лагьайтӀа, кьейибурал чан хквезвачтӀа, Месигьдални чан хтаначир.

¹⁷Месигьдал чан хтанвачтӀа, чи иманни гьаваянди я, куь гунагьарни куь хиве ама.

¹⁸АкӀ хьайила, Месигьдихъ ийизвай иман гваз рагьметдиз фейибурни телеф хьана.

¹⁹Чна Месигьдик кутазвай умуд анжах са и уьмуьр паталди ятӀа, чун амай инсанрилайни гзаф язух гьалда ава.

²⁰Амма Месигьдал гьакъикъатдани чан хтана! Адал рагьметдиз фейибурун арадай сифтегьанди яз чан хтанва.

²¹И дуьньядиз ажал са касдалди гьикӀ атанатӀа, гьакӀ са Касдалди кьейидалай кьулухъ чан хтунни атана.

²²Вучиз лагьайтӀа Адамаз талукьбур вири гьикӀ рекьизватӀа, Месигьдиз талукь виридал гьакӀ чан хкведа.

²³Гьардахъ вичин вяде ава: сифте Месигьдал чан хтана, ахпа, Ам мад пайда хьайила, Адаз талукьбурални чан хкведа.

²⁴Ада, гьар са гьакимвал ва гьукум ва къуват тергна, Пачагьлугъ Аллагь Бубадив вугай чӀавуз эхир заман алукьда.

²⁵Аллагьди вири душманар ярхарна Месигьдин кӀвачерик вегьидай вахт къведалди, Месигьди пачагьвал авуна кӀанда.

²⁶Тергна алуддай эхиримжи душман ажал я.

²⁷Аллагьди Каламда лугьузвайвал, «вири Адан кӀвачерик муьтӀуьгъарна». «Вири муьтӀуьгъарна», — лугьудай чӀавуз, гьелбетда, «вири» гафуник вири Адаз муьтӀуьгъ авур Аллагь Вич акатзавач.

²⁸Вири Адаз муьтӀуьгъ авур чӀавуз, Аллагьди вирина агъавал авун патал, Хва Вични вири Хциз муьтӀуьгъ Авурдаз табий жеда.

²⁹ИкӀ туширтӀа, вучиз кьейибурун паталай инсанри цик акахьун кьачудай? Кьейибурал чан хкведачтӀа, вучиз абурун паталай инсанри цик акахьун къачузва кьван?

³⁰Вучиз чнани гьар са сятда жуван уьмуьр хатадик кутазва?

³¹Стхаяр-вахар, зун гьар юкъуз кьиникьин вилик чин-чинал акъваззава. Им за чи Ребби тир Иса Месигьдин вилик квел дамахар ийизвайди хьиз гьакъикъатда авай кар я.

³²За, цаварал жедай уьмуьрдик умуд кутун тавуна, Эфесда вагьши гьайванар хьтин инсанрихъ галаз женг чӀугунатӀа, заз идай хьайи вуч хийир ава? Кьейибурал чан хквезвачтӀа, вучда кьван: «Ша нен, хъван, вучиз лагьайтӀа пака чун рекьида?»

³³Килиг, куьн алцур жедайвал тахьуй: «Пис кӀватӀалди хъсан адетар чӀурда».

³⁴Куьн хьун лазим тирвал, кьил кьилел хъша, гунагьар ийимир, гьикӀ лагьайтӀа, квекай бязибуруз Аллагь чизвач, — и гафар за квез регъуь хьун патал лугьузва.

³⁵Мумкин я сада хабар кьун: «Кьейибурал гьикӀ чан хкведа? Абурухъ гьихьтин беден жеда?»

³⁶Ибур терхеба гафар я. Гьар са цил уьмуьрдин цӀир гъун патал кьена кӀанда!

³⁷Вуна тум вегьидай чӀавуз цазвайди набататдин вири беден туш кьван, анжах къуьлуьн ва я са маса твар я.

³⁸Амма Аллагьди Вичиз кӀандайвал адаз беден гузва — гьар са тварциз вичин беден.

³⁹Вири беденар сад хьтинбур туш: инсанрин беденар са жуьрединбур я, гьайванрин беденар са жуьрединбур я, къушарин беденар са жуьрединбур я, гьуьлуьн гъетрен беденар са жуьрединбур я.

⁴⁰Цаварал алай кӀалубарни, чилерал жедайбурни ава. Цаварин кӀалубрихъ чпин иервал ава, чилинбурухъ — чпин.

⁴¹Ракъинихъ вичин парпар ава, вацрахъ — вичин, гъетерихъни — чпин. Гъетерни чпин нубатдай экуьвилел гьалтайла садаз садалай тафават авайбур жезва.

⁴²Кьейибурал чан хкведайлани гьакӀ жеда. Чилик кутур беден ктӀана чкӀида, чан хкведай беден ктӀидач.

⁴³Чилик кутур бедендал баркалла алач, чан хкведай бедендал баркалла жеда. Чилик кутурди зайифвиле жеда, чан хкведайди — къуватда.

⁴⁴Чилик кутурди беден авай затӀ хьиз чкӀида, чан хкведайди Руьгьдиз хас жуьреда жеда. Тан авай беден аватӀа, Руьгьдиз хас беденни ава.

⁴⁵Каламди лугьузва хьи, сад лагьай инсан Адамал чан атана, амма эхиримжи Адам — уьмуьр гудай Руьгь я.

⁴⁶Сифтедай Руьгьдиз хасди ваъ, беден авайди къвезва, анжах ахпа — Руьгьдиз хасди.

⁴⁷Сад лагьай инсан чилин руквадикай халкь авунай, кьвед лагьай Инсан — им цаварилай тир Инсан я.

⁴⁸Чилин инсанар чилин сад лагьай инсан хьтинбур я, цаварин инсанар цаварилай атай Инсан хьтинбур я.

⁴⁹Исятда чал гьикӀ чилин инсандин къамат алатӀа, гьакӀ чун цаварин Инсандизни ухшар жеда.

⁵⁰За квез лугьузва, стхаяр-вахар, якӀукайни ивидикай Аллагьдин Пачагьлугъдин ирссагьибар хьун мумкин туш; ктӀидай са затӀни ктӀин тийидайдан ирссагьиб жедач.

⁵¹Яб це, за квез исятда сир ахъайда: чун вири рагьметдиз фидач, амма вири чун

⁵²садлагьана, вил кӀевна ахъайдалди, эхиримжи къаргъудин ван акъатайла, дегишарда. Къаргъудин ван акъатдайла, кьейибурал члаф тежедайвал чан хкведа, чун лагьайтӀа, дегиш жеда.

⁵³Члаф жедай кьван вири члаф тежедайдаз элкъуьн лазим я, ажал галай кьван вири — рекьин тийидайдаз.

⁵⁴Члафдакай члаф тежерди, рекьирдакай рекьин тийирди хьайила, гьа чӀавуз и кхьенвай гафар кьилиз акъатда: «Ажал гъалибвили туькьуьнна!»

⁵⁵«Я ажал, ви гъалибвал гьинава? Я ажал, ви мизмиз гьинава?»

⁵⁶Ажалдин мизмиз гунагь я, гунагьди къуват Къанундивай къачузва.

⁵⁷Амма Аллагьдиз шукур хьурай! Ада чи Ребби Иса Месигьдин куьмекдалди чаз гъалибвал гузва!

⁵⁸Гьавиляй, зи кӀани стхаяр-вахар, кӀевиз акъваз. Са куьнини куь рикӀе шак туна кӀандач. Куьне датӀана Аллагьдиз къуллугъ авунин рекье агалкьунар къачу ва куь зегьмет Ребби патал гьаваянди туширди чир хьухь.