Read Lezgi New Testament – ЦӀийи Икьрар 1-Каринфвийриз 8 Bible Online

1-Каринфвийриз 8 - Lezgi New Testament – ЦӀийи Икьрар bible

1-Каринфвийриз 8

¹Гила бутриз къурбанд авунвай тӀуьнрин месэладикай. Чаз виридаз чирвал авайди чаз раиж я, амма чирвили инсанрин кьама ял твада, муьгьуьббатди несигьат гуда.

²Вичиз са вуч ятӀани чизва лугьуз фикирзавайдаз гьакъикъатда гьеле лазим тир саягъда чизвач.

³Амма Аллагьдиз Вич низ кӀанзаватӀа чир хьанва.

⁴Гьа икӀ, бутриз къурбанд авунвай тӀуьнрикай. Чаз малум я хьи, дуьньяда чпиз икрамзавай бутар са затӀарни туш, ва са Аллагьдилай гъейри масад авач.

⁵Чпел «аллагьар» тӀвар алайбур аватӀани, кӀандатӀа абур цава хьурай, кӀандатӀа чилел — рикӀивайни жуьреба-жуьре «аллагьар» ва «агъаяр» гзаф ава, —

⁶амма чун паталди авайди анжах са Аллагь Буба я, чун вири Гьадалай я, Гьам паталди чна уьмуьр тухузва ва анжах са Ребби Иса Месигь я, Гьадалдини вири арадал атана ва Гьадалди чна уьмуьр къачуна.

⁷Амма виридаз и кар малум туш. Бязибур икьван чӀавалди бутрив акьван вердиш хьанва хьи, абуру ахьтин тӀуьн недайла, абуру адакай къурбандриз ганвай тӀуьникай хьиз фикирзава. Гьа береда абурун зайиф вижданди абуруз чеб михьибур туширди лугьузва.

⁸Амма тӀуьни Аллагьдиз мукьва жез куьмекзавайди туш. Чна са затӀ нен тийиз хьайитӀа, чаз пис жезвач, чна нез хьайитӀани, чаз хъсан жезвач.

⁹ЯтӀани, килиг, тӀуьн хкягъунин жигьетдай куь азадвал зайифбур патал кӀвач галкӀидай къван жедайвал тахьурай.

¹⁰Вучиз лагьайтӀа садаз, ваз и чирвал аваз, вуна бутриз ибадат ийизвай кӀвале нез акуртӀа, ви гуьгъуьналлаз зайиф виждан авай гьадавни бутриз къурбанд авунвай тӀуьн нез тадачни?

¹¹Гьа икӀ ви чирвили вичин паталай Месигь кьейи зайиф стха-вах телефда.

¹²И саягъда стхайрин-вахарин аксина гунагьар ийиз ва абурун зайиф виждандал хер ийиз, куьне Месигьдин аксина гунагьар ийизва.

¹³Гьавиляй, зи тӀуьниз килигна зи стхади-ваха гунагь ийизватӀа, за як гьич тӀуьн тавун хъсан жеда — идалди стхадив-вахавни гунагь ийиз тун тавун патал.