Read Lezgi New Testament – ЦӀийи Икьрар 2-Каринфвийриз 11 Bible Online

2-Каринфвийриз 11 - Lezgi New Testament – ЦӀийи Икьрар bible

2-Каринфвийриз 11

¹Куьне са тӀимил зи «ахмакьвал» эхнайтӀа хупӀ хъсан туширни! Са кьадар эхи хъия, минет я.

²Аллагьдин гъайрадалди[2] за куь гьакъиндай гъайра ийизва. Куь кӀватӀал заз зи руш хьиз я; за адак авайни-авачир са Итимдин — Месигьдин лишанар кутунва, ам Месигьдин вилик са рехнени квачир свас хьиз акъвазун патал.

³Амма, Гьава амалдар гъуьлягъди алцурайвал, заз гьа саягъда куь фикирарни куьн сидкьидалди ва михьивилелди Месигьдиз бахш авуникай къерех жез кичӀезва.

⁴Куь патав атана сада чна Вичикай квез хабар гайи Исадикай ваъ, масадакай хабар гуз хьайитӀа, ва я квев агакьнавай Руьгь ваъ, масад агакьиз хьайитӀа, ва я куьне чавай кьабулнавай Шад Хабар ваъ, масад кьабулиз хьайитӀа, а чӀавуз ибур вири куьне лап хъсандиз эхзава.

⁵За жув абурулай, и «акьалтӀай чӀехи илчийрилай», са квелди ятӀани усал туш лагьана фикирзава.

⁶Мумкин я, зун, абур хьиз, са акьван дилавардиз рахазвач, амма захъ чирвал ава, гьар гьикӀ ятӀани, чна квез и кар виридаз аквадайвал тамамдиз къалурна.

⁷Белки, за, куьн хкажун патал, жув агъузаруналди гунагь авунатӀа? За квез Шад Хабардикай муштулух са гьакъини къачун тийиз гуз хьаначирни?

⁸Квез къуллугъ авун патал, за, маса кӀватӀалривай гьакъи къачуз, абур тараш авурдай хьанва.

⁹Зун куь патав гвайла ва са куьхъ ятӀани муьгьтеж тирла, зун квекай садазни пар хьаначир, вучиз лагьайтӀа вири лазим тир затӀаралди заз МакӀедандай атанвай стхайри куьмек гузвай. Зун са куьнани квез пар тежез алахъзавай, идалай кьулухъни за гьакӀ ийида.

¹⁰Месигьдин гьакъикъат зак квайвал, и карни турусди я, — зи тариф инкар ийиз алакьдай са касни вири Ахай вилаятда авач.

¹¹Белки, куьне, заз куьн кӀан тийизвайвиляй за квел пар эцигзавач лагьана, фикирзава? Заз куьн гьикӀ кӀанзаватӀа, Аллагьдиз чизва!

¹²Дамахар ийиз, чеб чаз барабар яз гьисабдай багьнадихъ къекъвезвайбуруз ахьтин багьна тагун патал, за авурвал гьакӀ давамарни ийида.

¹³А ксар тапан илчияр я, чеб Месигьдин илчияр тирдан кьасар ийизвай тапан кӀвалахдарар я.

¹⁴Гьар гьикӀ ятӀани, им аламат жедай кар туш: иблисди вич экуьнин малаик тирдан кьасар ийизва.

¹⁵Гьавиляй адаз къуллугъзавайбуру чеб гьахъ-михьивилиз къуллугъзавайбур тирдан кьасар авунал мягьтел хьана кӀандач. Эхирда абурув, чпиз вуч лайих ятӀа, гьам агакьда.

¹⁶За мад гъилера тикрар хъийизва: зун ахмакьдай кьамир, амма куьне икӀ ийизваз хьайила, заз, ахмакьдиз хьиз, мад са тӀимил жуван тариф ийидай ихтияр це.

¹⁷Исятда за лугьудай гафар за Реббидиз хас тирвал лугьудач. Тариф авунин уюнда зун ахмакь хьиз рахада.

¹⁸И дуьньяда гзафбуру чпин тариф ийизва, зани жуван тариф ийида.

¹⁹Куьне, лагьайтӀа, чӀехи лезетдалди ахмакьар эхзава, куьн гьахьтин акьул авайбур я!

²⁰Куьне куьн лукӀвилик кутазвайбур ва куь жибиндай незвайбур, квез гъиляй къвезвай вуч хьайитӀани ийизвайбур, куь вилик лавгъавал ийизвайбур ва куь чиниз лапӀаш вегьизвайбур эхзава.

²¹Жуваз регъуь жедай кар ятӀани, лугьун: квез гьакӀ ийидай викӀегьвал чаз бес хьанач! Амма абуру квелди дамахардай викӀегьвал авуртӀани, завайни жуван тарифар-дамахардай викӀегьвал ийиз жеда. Зун гьеле мад, ахмакь хьиз, рахазва.

²²Абур чувудар яни? Зунни я. Абур исраилвияр яни? Зунни я. Абур Ибрагьиман эвледар яни? Зунни я!

²³Абур Месигьдиз къуллугъзавайбур яни? ИкӀ лугьун ахмакь кар ятӀани, за Месигьдиз абурулай генани гзаф къуллугъ ийизва! За зегьмет гзаф чӀугуна, зун абурулай гзаф гъилера зинданра тваз хьана, абурулай гзаф гатаз хьана, ажалдин сергьятдал зун садрани кьведра хьанач.

²⁴Чувудри вад гъилера заз гьар чӀавуз яхцӀурдакай сад кимиз къамчидал ягъунин жаза гана.

²⁵Пуд гъилера зун тӀваларалди гатана, са гъилера заз къван гана, пуд гъилера зун гимидин кьилел атай хасаратвилик акатна, гьа чӀавуз садра за михьиз са югъни са йиф гьуьле акъудна.

²⁶Зун мукьвал-мукьвал сиягьат авуниз мажбур жезва. ВацӀарилай элячӀдайла, зун хатавилик акатна, къачагъри, зи халкьдикай тирбуру, маса халкьарикай тирбуру, арадал гъайи хатавилерик акатна; зун шегьерда, кьурумда, гьуьлел хатавилера хьана, тапан стхайри арадал гъайи хатавилера хьана.

²⁷За гьалдай фидалди зегьмет чӀугуна, зун мукьвал-мукьвал ахвар авачиз, кашни гьарарат эхиз, недай затӀ авачиз, къай эхиз, алукӀдай затӀ авачиз хьана.

²⁸Ибурулай гъейри, зал гьар юкъуз вири кӀватӀалрин къайгъу чӀугунни илитӀ жезва.

²⁹Са вуж ятӀани зайиф жезва — зун зайиф жезвачни бес? Са вуж ятӀани гунагьдик акатзава — адахъ зи рикӀ кузвачни бес?

³⁰За дамахар авун герек ятӀа, жув квелди зайиф ятӀа, заз гьадал дамахариз кӀанзава.

³¹За таб тийизвайди Ребби Исадин Бубадиз ва Аллагьдиз чизва. Адаз даим яз шукур хьурай.

³²АретӀ пачагьди Шамда тайинарнавай гьакимди, зун кьун патал, шегьердал къаравулвал тухун эмирна.

³³Амма зун зинбилда аваз шегьердин цла авай текӀвендай агъуз авудна, гьа икӀ зун хилас хьана.