Read Lezgi New Testament – ЦӀийи Икьрар 2-Каринфвийриз 13 Bible Online

2-Каринфвийриз 13 - Lezgi New Testament – ЦӀийи Икьрар bible

2-Каринфвийриз 13

¹Зун гила куь патав пуд лагьай гъилера къвезва. «Гьар гьихьтин хьайитӀани тахсир кьве ва я пуд шагьиддин гафаралди тестикьзавайди хьун лазим я» лагьана кхьенва.

²Гьавиляй зун кьвед лагьай гъилера куь патав гвайла, за квез тагьким авунай, гилани, яргъа аваз, виликдай гунагьар авурбуруз ва амай вирибуруз за тикрар хъийизва: и гъилера заз куь язух къведач.

³Квез лагьайтӀа зи мецелди Месигь рахазвайди субут авун кӀанзава. Месигь куьн патал зайиф туш, Ада куь арада Вичин къуват къалурзава!

⁴РикӀивайни Месигь зайифвиле аваз хашуниз янайтӀани, Адал Аллагьдин къудратвилин чан ала! ГьакӀ чунни, Ам хьиз, зайиф я, амма чна, куь вагьтедай фин патал, Аллагьдин къудратвилелди Месигьдихъ галаз уьмуьр тухуда.

⁵Куьне куьн чира, квехъ мад иман аматӀа чира, жув синагъ ая. Ва я квез Иса Месигьди уьмуьр кве тухузвайди чизвачни? Квевай гьакъикъатда синагъдай дурум гана экъечӀиз хьанатӀа, — гьелбетда.

⁶Чун лагьайтӀа, и синагъдай чун дурум гана экъечӀайди квез аквадайдак за умуд кутазва.

⁷Куьне писвал тавун патал чна Аллагьдиз дуьа ийизва. Дурум гана экъечӀайбур яз къалурун паталди ваъ, куьне ийизвай крар, чун синагъдай дурум гана экъечӀайбур хьиз такуртӀани, гьахъунихъ галаз кьурбур хьун паталди дуьа ийизва.

⁸Чавай гьакъикъатдиз акси са затӀни ийиз жедач, авуртӀа, анжах гьакъикъат паталди ийида.

⁹Куьн къуват авайбур хьайитӀа, чун гьатта зайифбур хьунални шад жеда. Гьавиляй чна куьн дуьз хъхьунихъ фин патал дуьаярни ийизва.

¹⁰Исятда куь патав гвачиз, за квез авиляй кхьизва хьи, куь патав хьайи чӀавуз за векъивал къалур тавун паталди. Реббиди заз чукӀурун паталди ваъ, арадал гъун паталди гьукум ганва.

¹¹Эхирдай, стхаяр-вахар, заз лугьуз кӀанзава: шад хьухь, дуьз хъхьунихъ гьереката, сада сад кӀубан ая, къуй куь арада садвал хьурай, ислягьвиле аваз уьмуьр твах. Гьа чӀавуз кӀанивилинни саламатвилин чешме тир Аллагь квехъ галаз жеда.

¹²Сада садаз пак темендалди салам це. Аллагьдиз талукь ина авай вирибуру квез саламар лугьузва.

¹³Къуй квехъ виридахъ галаз Ребби Иса Месигьдин берекат, Аллагьдин муьгьуьббат ва Пак Руьгьди гузвай садвал хьурай.