Read Lezgi New Testament – ЦӀийи Икьрар 2-Каринфвийриз 5 Bible Online

2-Каринфвийриз 5 - Lezgi New Testament – ЦӀийи Икьрар bible

2-Каринфвийриз 5

¹Чаз чизва хьи, чи чилин алачух — чи беден — терг авур чӀавуз цаварал чун эбеди кӀвали — инсанрин гъилералди ваъ, Аллагьди халкьнавай беденди вилив хуьзва.

²Чун и алачухда амай кьван гагьда чна чал чи цаварин кӀвал алукӀдай бере алукьдалди суза ийизва.

³Ам алукӀайла, чун кьецӀил яз амукьзавач.

⁴Амма чун чи чилин алачухда амай кьван ва суза ийизмай кьван гагьда чаз четин я, вучиз лагьайтӀа чаз чилин бедендикай магьрум хьана рекьиз кӀанзавач, амма, гьакӀ ятӀани, ажал галай кьван виридал эбеди яз чан аламукьун патал, чаз жувал даиман беден алукӀиз кӀанзава.

⁵Гьавиляй чун чаз Руьгь замин хьиз ганвай Аллагьди халкьни авунва.

⁶Гьавиляй жуван чилин беденда амай кьван гагьда чун Реббидивай яргъа авунвайди чаз чизватӀани, чакай чи рикӀ датӀана архайин я;

⁷гьикӀ лагьайтӀа чна чаз аквазвайдал ваъ, имандал амал ийизва.

⁸Чи рикӀ чакай архайин я ва чаз, чи беденар хтӀунна фейила, Реббидин патав акъваздайвал хьана кӀанзава.

⁹Гьавиляй, чун чи беденда ва я адалай къеце ава талгьана, Реббидиз чавай вуч кӀанзаватӀа, гьам авун чи мурад я.

¹⁰ГьикӀ лагьайтӀа чи виридан вилик Месигьдин дувандал фин акъвазнава, ва гьар садаз вичин гьунаррай, ада чилин беденда аваз авур хъсан ва пис крарай эвез гуда.

¹¹Гьа икӀ, Реббидиз чӀехи гьуьрмет авун вуч ятӀа чиз, чун масадбур имандал гъиз алахъзава. Аллагьдиз лагьайтӀа чун гьихьтинбур ятӀа чизва, ва квезни чун гьа саягъда хъсандиз, куь виждандив кьурвал чизва лагьана за умудзава.

¹²Куь вилик чун мад садра жуван тарифар ийиз алахъзавач, амма квевай, рикӀе авайдал ваъ, гьакӀ къалурун патал ийизвай крарал дамахзавайбуруз жаваб гуз жедайвал, чал викӀегьдиз дамах ийиз жеда.

¹³Чун кьил кьилел алачирбур яз гьисабзаватӀани, чакай ахьтинбур Аллагь паталди хьанва; кьил кьилел алаз фикирар лугьузватӀа, им куьн паталди я.

¹⁴Месигьдин муьгьуьббатди чав виликди физ тазва. Чун а кардин чӀалахъ я хьи, Сад вирибур патал кьенватӀа, им вирибур кьенва лагьай чӀал я.

¹⁵Чан алайбуру гила чеб патал ваъ, чпин паталай кьена чан Хтанвайди патал уьмуьр тухвайвиляй Ам вирибур патал кьена.

¹⁶Гьа икӀ, чун гила садазни инсандин вилерай килигзавач. АкӀ са мус ятӀани чун Месигьдиз килигнай, амма мад килиг хъийизмач.

¹⁷Гьавиляй, вуж Месигьдиз талукь ятӀа, ам цӀийиз халкьнавайди я. Куьгьнеди алатнава, ингье цӀийивал хьанва!

¹⁸И кар чун вири Месигьдин куьмекдалди Вичихъ галаз туькӀуьр хъувур ва чаз инсанар туькӀуьр хъувунин къуллугъ гайи Аллагьдилай атанвайди я.

¹⁹Яни Месигьдин куьмекдалди Аллагьди, инсанрик абурун гунагьрай тахсирар кутун тавуна, Вичихъ галаз дуьнья туькӀуьр хъувуна, ва Ада и туькӀвейвиликай хабар гун чи хиве туна.

²⁰Гьа икӀ, чун Месигьдин векилар я ва Аллагьди чи куьмекдалди инсанриз тагькимар гузва. Гьавиляй чна Месигьдин ТӀварцӀелай минетзава: Аллагьдихъ галаз туькӀуьн хъия.

²¹Чун Месигьдиз талукь яз Вичин вилик гьахъ-михьибур хьун патал, Аллагьди инсанрин гунагьдай тахсир гунагь Квачирдал эцигна.