Read Lezgi New Testament – ЦӀийи Икьрар 2-Каринфвийриз 6 Bible Online

2-Каринфвийриз 6 - Lezgi New Testament – ЦӀийи Икьрар bible

2-Каринфвийриз 6

¹Аллагьдихъ галаз санал кӀвалахзавай ксар яз чна квевай Аллагьдин берекат нетижа авачиз тун тавун тӀалабзава.

²ГьикӀ лагьайтӀа Ада лугьузва: «Кутугай лап хъсан береда Заз ви ван хьана, хиласдай юкъуз За куьмек гана ваз» . Ингье, исятда кутугай лап хъсан бере я; ингье къе хиласвилин югъ я.

³Чна ийизвай къуллугъдиз садавайни туьгьметиз тежедайвал, чна са касдизни кӀвач галкӀидай багьна гузвач.

⁴Чна вири макъамра чун Аллагьдиз къуллугъзавайбур яз къалурзава: зурба сабур хьуна, бедбахтвилера, муьгьтежвиле, четинвилера,

⁵чун гатазвайла, зинданра твазвайла ва я пехъи хьанвай кӀеретӀдин хурук акатзавайла, четин зегьметда, ахвар авачир йифера ва каша,

⁶михьивиле, чирвиле, мягькемвиле, регьимвиле, Пак Руьгьда ва рикӀин сидкьидай тир муьгьуьббатда,

⁷гьакъикъатдин гафуна, Аллагьдин къуватда, эрчӀи ва чапла гъиле гьахъ-михьивилин яракь аваз,

⁸машгьурвиле ва русвагьвиле, гьам айибдин, гьамни разивилин гафар къачуз. Чун тапархъанрай кьазва, амма чун гьакъикъи я;

⁹чун садазни течирбурай кьазва, амма чун чизва; чун кьейибурай кьазва, амма чал чан алама, чаз инад кьазва, амма чун яна кьенвач;

¹⁰чун пашманарзава, амма чна датӀана шадвалзава; чун кесиб я, амма чна гзафбурукай девлет авайбур ийизва; чахъ затӀни авач, гьа са вахтунда чаз вири ава!

¹¹Каринфвияр! Чна квез виридакай ачухдиз лагьанай. Чна чи вири рикӀяй квехъди къвезвай муьгьуьббат къалуриз хьанай.

¹²Квехъ муьгьуьббат авур рикӀер ахъа тийизвайбур чун ваъ, чахъди муьгьуьббатдивди рикӀер ахъа тийизвайбур куьн я.

¹³Зун квехъ галаз, жуван аялрихъ галаз хьиз, рахазва: жаваб яз куьнени куь рикӀер ахъая!

¹⁴Иман авачирбурухъ галаз са викӀиник экечӀмир. Къанун чӀурунихъ галаз гьахъ-михьивилин уртах вуч ава кьван? Экуьнихъ мичӀивилихъ галаз

¹⁵ва я Месигьдихъ Велиярахъ галаз уртах вуч ава кьван? Иман авайдаз иман авачирдахъ галаз

¹⁶ва Аллагьдин ибадатханадиз бутрихъ галаз уртах вуч ава кьван? Чун чан алай Аллагьдин ибадатхана я, Аллагьди чакай лагьайвал: «Зун абурун арадиз гьахьда, къекъвез жеда абурун арада. Закай абурун Аллагь жеда, абурукайни Зи халкь жеда» .

¹⁷Гьавиляй Реббиди мадни лугьузва: «Абурун арадай экъечӀ ва чара хьухь, кягъиз тахьуй чиркиндак, гьа чӀавуз За кьабулда куьн» .

¹⁸«Закай Буба жеда куь, квекай жеда Зи рухваяр ва рушар, — лугьузва Реббиди, вири дуьньядин Агъади».