Read Lezgi New Testament – ЦӀийи Икьрар 2-Каринфвийриз 7 Bible Online

2-Каринфвийриз 7 - Lezgi New Testament – ЦӀийи Икьрар bible

2-Каринфвийриз 7

¹Гьа икӀ, кӀанибур, чаз ихьтин хиве кьунар авунватӀа, ша чнани чун чи беденар ва руьгьер чиркинарзавай виридакай михьи ийин, Аллагьдиз чи чӀехи гьуьрмет къалурин ва чи уьмуьр Гьадаз бахшин.

²Чун паталди куь рикӀер ахъа ая! Чна садан хатурни ханач, садан мал-мулкни вара-зара авунач, садакайни жуваз менфят къачунихъ гелкъвенач.

³И гафар за тахсир кутун яз лугьузвайбур туш. Куьн чи рикӀера авайдакай ва чун квехъ галаз уьмуьр тухуз ва рекьиз гьазур тирдакай за квез икьван чӀавалди лагьанай.

⁴Зун квехъ гзаф агъунва ва за квелди пара дамахзава! Куьне зун акьван кӀубан ийизва хьи, зи вири бедбахтвилеризни килиг тавуна, зун кьадар авачир кьван шад жезва.

⁵Эхь, чун МакӀедандиз атай чӀавузни чаз секинвал хьаначир. Акси яз, вири патарихъай чаз къайгъуяр хьанай: винелай чна гьужумар эхзавай, ва къеняй чак къалабулух акатнавай.

⁶Амма сефилвиле авайбуруз сабур гудай Аллагьди чаз ТӀитӀ атуналди сабур гана,

⁷ам гьакӀ атуналди ваъ, куьне ам кьабул авуналди гзаф сабур гана. ГьикӀ квез зун акуна кӀанзаватӀа, гьикӀ куьне хьайи кардикай гьайиф чӀугвазватӀа ва гьикӀ куьне кӀевелай зи пад кьунатӀа, ада чаз суьгьбет авуна. И карди заз гзаф чӀехи шадвал гана.

⁸Куьн и чарчи сефил авунатӀани, ахьтин чар кхьена лугьуз, за гьайиф чӀугвазвач. Гьелбетда, за сифтедай икӀ хьана лугьуз гьайиф чӀугунай, вучиз лагьайтӀа чарчи, са акьван яргъалди авуначтӀани, куьн сефил авурди заз акунай,

⁹амма исятда зун шад я. Шад я куьн сефил я лугьуз ваъ, куь сефилвили куьн туба авунал гъана лугьуз. Вучиз лагьайтӀа куь пашманвал Аллагьдин къастуналди хьанвайди тир, гьакӀ хьайила чна квез гайи са зиянни авачир.

¹⁰Аллагьдилай атанвай пашманвили туба авунал гъизва, идани хиласвилихъ тухузва ва гьайиф чӀугун патал мад чка тазвач. Амма и дуьньядин пашманвили ажалдихъ тухузва.

¹¹Куьне фагьум ая кван: Аллагьдилай атанвай пашманвили квек гьакъисагъвал, жув гьахъар хъийиз кӀан хьунухь, тахсир квайдакай гьахъдаказ хъел атун, къалабулух, чаз чун акваз кӀан хьунин къанихвал, гьевес, тахсир квайдаз жаза гуз гьазур хьунин гьисс кутуна. Куьне и карда квек са тахсирни квачир чӀал тамамдиз субутарна!

¹²За квез масадан намусдик хкуьрайди ва нин намусдик хкуьрнатӀа, гьам себеб яз кхьейди тушир. Заз куьне гьикӀ рикӀин сидкьидай Аллагьдин вилик вафа хуьзватӀа квез акуна кӀанзавай.

¹³И карди чаз теселли гана! Амма и теселлидалди вири акьалтӀзавач. Чун иллаки ТӀитӀаз хьайи чӀехи хвешивилел шад хьана. ГьикӀ лагьайтӀа куьне адан руьгь кьезиларна.

¹⁴Адахъ галаз хьайи ихтилатда виликдай за куь тариф авунай, ва куьне зун акӀадарначир. Акси яз, чна квез лагьай вири гафар дуьзбур хьайивал, чна куь тариф ийиз ТӀитӀаз лагьай гафарни дуьзбур хьана.

¹⁵Куьне адан гафариз яб гайивал ва куьне гьихьтин гьуьрметдивди ва рикӀик зурзун кваз ам кьабулайвал рикӀел хкидайла, ТӀитӀаз куьн къвердавай гзаф кӀан жезва.

¹⁶Вири крара квехъ далу акализ хьунал зунни шад я!