Read Lezgi New Testament – ЦӀийи Икьрар 2-Каринфвийриз 8 Bible Online

2-Каринфвийриз 8 - Lezgi New Testament – ЦӀийи Икьрар bible

2-Каринфвийриз 8

¹Стхаяр-вахар, Аллагьди МакӀеданда авай кӀватӀалриз гьихьтин берекат ганатӀа, чаз гьадакайни квез лугьуз кӀанзава.

²Четин тир гзаф синагъра аватӀани, абурун шадвал акьван зурба тир хьи, абурухъ акьалтӀай пис кесибвиле жумартвилин булвал авай.

³Абуру чпивай жедай кьван вири ва гьатта адалай артухни хушуналди къурбанд ийиз хьайивилин шагьид я зун.

⁴Абуру чпи чавай хабар кьуна ва Ярусалимда Месигьдиз талукьбуруз куьмек гунин пай кутадай ихтияр, чӀехи берекат хьиз, кӀевелай тӀалабна.

⁵Абуру авурди чна умуд кутурдалай гзаф хьана. Абуру эвелни-эвел чпи чеб Реббидиз, ахпани Аллагьдин къастуналди чаз гана.

⁶Гьавиляй чна, ТӀитӀа кьил кутуниз килигна, и мергьеметдин кар ада куь патавни эхирдалди кьилиз акъудун патал адак руьгь кутуна.

⁷Квехъ вири булвилелди хьуниз килигна: квехъ иман, дилаварвал, чирвал, алахъвал ва чахъди куь муьгьуьббат ава, — чаз куьне и мергьеметдин кардани куь лап хъсан чкаяр къалурна кӀанзава.

⁸За квез эмир гузвач, амма масадбуру къалурзавай алахъуникай лугьуналди, заз куь муьгьуьббатни рикӀяй къвезвайди хьун синагъ ийиз кӀанзава.

⁹Квез чи Ребби Иса Месигьдин берекат чизва эхир. Адахъ девлет авай, амма чун паталди Ам кесиб хьана, Вичин кесибвилиз килигна, чун девлет авайбур хьун паталди.

¹⁰За квез икӀ авун меслятзава: куьне шаз ийиз эгечӀай кар куьтягьа, ам гьа квез хийир я. ГьикӀ лагьайтӀа куьн и кар ийиз эгечӀай сифтебурни я, и кар авун куьне сифте яз ниятни авунай. ГьакӀ, кар куьтягьдайлани, и кар ният ийидайла къалурай хьтин гьакъисагъвал[1] къалура. Куь агьвалди гьикьван квез мумкинвал гузватӀа, гьакьван це.

¹²Кьилинди — ийиз кӀан хьунухь я, гьа чӀавуз куьне кутур паюниз Аллагьди къимет гуда. Адаз куьне квез авачирдакай ваъ, авайдакай гана кӀанзава.

¹³Чаз куь гьисабдай масадбуруз регьят хьана кӀанзавач, амма барабарвал хьана кӀанзава.

¹⁴Алай вахтунда куь агьвалди — абурун муьгьтежвал, абурун агьвалди, лагьайтӀа, герек чӀавуз куь муьгьтежвал кьезиларда. Гьа чӀавуз «Гзаф кӀватӀайдаз артуханди авачир, тӀимил кӀватӀайдаз муьгьтежвал авачир» , — лугьуз кхьенвай хьтин барабарвал жеда.

¹⁶Зи рикӀел эцигай хьиз, ТӀитӀан рикӀелни куь къайгъу чӀугун эцигай Аллагьдиз за шукур ийизва.

¹⁷ГьикӀ лагьайтӀа ТӀитӀа чи тӀалабдиз гьакӀ гьай лагьанач, ам куь патав хушуналди, вичи кьил кутуналди къвезва.

¹⁸Чна адахъ галаз санал вири кӀватӀалра Шад Хабардиз хъсандиз къуллугъзавайди яз чизвай мад са стха ракъурнава.

¹⁹Идалайни гъейри, чи ялав квай ниятдин лишан яз, Ребби Вич машгьур авун патал, чна ийизвай мергьеметдин карда чахъ галаз атун патал ва чаз куьмек гун патал, а кас кӀватӀалри хкянавайди я.

²⁰Гъил ахъадаказ гузвай и савкьватрихъ галаз чун кьиле физвайвилиз садавайни туьгьмет ийиз тежедайвал хьана кӀанзава чаз.

²¹Чун вири крар дуьздаказ ийиз алахъзава — са Реббидин вилик ваъ, гьакӀ инсанрин виликни.

²²Чна куь патав гзаф гъилера ва гзаф крара вичин рикӀивай тир къайгъударвал къалурай мад са стха абурухъ галаз ракъурнава. Гила лагьайтӀа квехъ гзаф агъун себеб яз, ам кардив генани рикӀивай эгечӀзава.

²³ТӀитӀакай лагьайтӀа, ам зи амадаг ва куь арада захъ галаз санал кӀвалахзавайди я. Амай стхайрикай рахайтӀа, абур кӀватӀалри ракъурнавайбур я ва Месигьдин баркалла къалурзавай.

²⁴Гьавиляй абуруз куь патай авай муьгьуьббат субут ая, вири кӀватӀалриз чна квел ийизвай дамах гьаваянди туширди аквадайвал.