Read Lezgi New Testament – ЦӀийи Икьрар 2-Каринфвийриз 9 Bible Online

2-Каринфвийриз 9 - Lezgi New Testament – ЦӀийи Икьрар bible

2-Каринфвийриз 9

¹Гьар вуч ятӀани, Месигьдиз талукьбуруз куьмек гуникай квез кхьинин лазимвал заз авач.

²Куьмек гуз кӀан хьунин цӀай квай куь ният заз чизва ва за макӀеданвийрин вилик куь тарифни авунай. Ихьтин къурбанд авуниз куьн Ахайда гьеле шаз гьазур тирдакай за абуруз лагьанай. Куь кьетӀивили абурукни гьерекат кутуна.

³Чна авур куь тариф гьакӀан кьуруди тахьун патал ва за квез лагьайвал куьн гьазур яз жедайвал, за куь патав стхаяр ракъурнава.

⁴ГьикӀ лагьайтӀа, макӀеданвияр захъ галаз атун хьайитӀа ва абуруз куьн гьазур тушиз акуртӀа, чаз регъуь жеда, квез жедай регъуьвиликай талгьайтӀани жеда.

⁵Гьавиляй, куьне гаф гайивал, пул кӀватӀунин кар куьтягьун патал, заз стхаяр чӀалал гъана абуру виликамаз квел кьил чӀугун лазим яз акуна. Гьа чӀавуз куьне и кар мажбурдалди ваъ, хушуналди ийизвайди аквада.

⁶РикӀел хуьх: ни мискьидаказ тум цайитӀа, ада мискьи гвенни гуьда, ни жумартдаказ тум цайитӀа, ада жумарт гвенни гуьда.

⁷Къуй гьар сада вичиз рикӀи гьикьван це лугьузватӀа, гьакьван гурай, гьайиф яз ва я мажбур яз тагурай, вучиз лагьайтӀа Аллагьдиз ни шаддаказ гузватӀа, гьам кӀанда.

⁸«Ада вичихъ авайди кесибриз пайна, Адан гьахъ-михьивал эбеди яз амукьзава» , — лугьуз кхьенвайвал, квехъ датӀана вири бес кьадарда хьун патал ва хъсан кар патал артухни алаз бес жедайвал, Аллагьдивай куьн лазим тир виридалди таъминариз жеда.

¹⁰Тум цазвайдаз тум Гузвайда, инсанриз тӀуьн яз фу Гузвайда куьне цайиди артухарда ва куь гьахъ-михьивилин гвен гзафарда.

¹¹Куьн вири затӀаралди акьван девлет авайбур жеда хьи, квевай датӀана инсанриз гъил ахъадаказ куьмек гуз жеда, чи куьмекдалди агакьарнавай куь жумарт савкьватдай абуру Аллагьдиз шукур ийида.

¹²Куь и къуллугъди кьилди Месигьдиз талукьбурун къайгъуйриз куьмекзавач, ада гьакӀ Аллагьдиз мад ва мад гзаф шукурар ийиз тазва!

¹³Куьне ийизвай мергьеметвилин къуллугъ акваз, инсанри куь паталай Аллагьдиз шукурар ийида. Куьне вичел иман ийизвай Месигьдин Шад Хабардиз куьне вафа хуьзва, куьне квез авайди абурухъ галаз ва вирибурухъ галаз гъилин ахъавилелди пайзава.

¹⁴Абуру куь гьакъиндай дуьаяр ийида ва квез Аллагьди ганвай кьадар авачир берекатдин куьмекдалди абуру квехъди ялда.

¹⁵Гафаралди лугьуз тежедай хьтин савкьватдай Аллагьдиз шукур хьурай!