Read Lezgi New Testament – ЦӀийи Икьрар ГалатӀвийриз 1 Bible Online

ГалатӀвийриз 1 - Lezgi New Testament – ЦӀийи Икьрар bible

ГалатӀвийриз 1

¹Инсанри хкягъ тавунвай ва инсандин куьмек галачиз, анжах Иса Месигьди ва Ам кьейидалай кьулухъ Адал чан хканвай Аллагь Бубади илчи яз тайинарнавай Павелан

²ва захъ галаз авай вири стхайрин ва вахарин патай. ГалатӀда авай иманийрин кӀватӀалриз.

³Аллагьдин, чи Бубадин, ва Ребби Иса Месигьдин патай берекат ва саламатвал хьурай квез.

⁴Чи Аллагь Бубадин ихтиярдалди Иса Месигьди чи гунагьар михьун ва чун алай девирдин напаквилерикай азад авун паталди Вич къурбанд авуна.

⁵Аллагьдиз эбеди яз шукур хьурай! Амин.

⁶Маса са Шад Хабардин паталай Иса Месигьдин берекатдалди квез эверай Аллагь куьне икьван фад рикӀелай алудунал зун мягьтел я.

⁷Гьакъикъатда маса Шад Хабар авайди туш! Амма, куьн чӀуру рекье тваз, Иса Месигьдин Шад Хабар чӀуриз алахъзавайбур ава.

⁸ЯтӀани я чна, я тахьайтӀа цаварилай атай са малаикди хьайитӀани, чна квез ракъурнавай Шад Хабардиз акси са затӀ Шад Хабар хьиз халкьдин арада чукӀурайтӀа, къуй адаз лянет хьурай!

⁹За эвелдай лагьай гафар мад тикрарзава: ни квез куьне кьабулнавай Шад Хабардиз акси са затӀ таблигъиз хьайитӀа, къуй адаз лянет хьурай!

¹⁰Гила за нин разивал къачун герек я: инсанрин ва я Аллагьдин? Белки зун инсанриз хуш атун паталди алахъзава? Инсанар рази авун паталди алахъзавайтӀа, зун Иса Месигьдин лукӀ жедачир.

¹¹Стхаяр-вахар, квез чир хьурай, за квез гъанвай Шад Хабар инсанрин патай туш.

¹²За Ам инсанривай кьабулнач ва Адан гъавурда зун инсанри тунач. Адан мана заз Иса Месигьди ачухарна.

¹³Чувудрин диндихъ галаз алакъада авай чӀавуз за гьихьтин уьмуьр кьиле тухузвайтӀа квез ван хьана. Зун Аллагьдин иманийрин кӀватӀалдиз акси тир ва ам чукӀуриз алахъзавай.

¹⁴За чувудрин диндиз къуллугъзавай чӀавуз зун жуван юлдашрилай парабурулай вилик квай. Чи чӀехи бубайрин адетар хуьнин кардал зун рикӀин сидкьидай алахъзавай.

¹⁵Амма гьеле дидедин къене амаз, заз Вичин берекатдалди Вичиз къуллугъиз эверай Аллагьди зун хкяна,

¹⁶Адакай чувудар туширбуруз Шад Хабар гун патал Вичин Хва заз малумар авунал Аллагь рази хьайила, за гьасятда инсанрихъ галаз меслятнач.

¹⁷Зун Ярусалимдиз, залай вилик илчи хьайибурун патав ваъ, Арабистандиз фена, ахпа мад Шам шегьердиз хтана.

¹⁸Ахпа, пуд йис алатайдалай кьулухъ, Кифадихъ галаз таниш хьун патал зун Ярусалимдиз фена ва цӀувад юкъуз адан патав амукьна.

¹⁹Муькуь илчийрикай заз садни акунач. Тек са Реббидин стха Якьуб акуна.

²⁰За квез кхьенвай гафар тапарар туширди за Аллагьдин вилик тестикьарзава.

²¹Ахпа зун Суьриядиз ва Киликатдиз фена.

²²Ягьудатда авай иманийрин кӀватӀалриз а чӀавуз зун гьеле, чинай акуна, чизвачир.

²³Абурув анжах ихьтин ванер агакьзавай: «Виликан вахтара чи геле къекъвей касди, вичи тергиз алахъай имандикай гила вичи муштулухар гузва».

²⁴Гьа икӀ, абуру заз килигна Аллагьдиз баркалла ийизвай.