Read Lezgi New Testament – ЦӀийи Икьрар ГалатӀвийриз 2 Bible Online

ГалатӀвийриз 2 - Lezgi New Testament – ЦӀийи Икьрар bible

ГалатӀвийриз 2

¹ЦӀукьуд йис алатайдалай кьулухъ зун Барнабани галаз мад Ярусалимдиз фена. Чна чахъ галаз ТӀитӀни тухванай.

²Аллагьдин патай зун аниз фин герек я лагьана хабар атанвай. За чувудар туширбурун арада чукӀурзавай Шад Хабардин мана-метлеб вилик-кьилик квай ксариз абурухъ галаз кьиле фейи кьилдин ихтилатрин вахтунда ачухарна, гьакӀ-гьавайда жуван вахт акъуд тавун патал.

³Абуру зи патав гвай ТӀитӀ, чувудрикай туширди хьуниз килиг тавуна, суьннет авуниз мажбурнач.

⁴И месэла чи арадиз атана гьахьнавай тапан стхайри къарагъарнай. Абур, чун Иса Месигьда аваз арадал атанвай азадвиликай малуматар кӀватӀун ва цӀийи кьилелай чун лукӀар хьтинбур авун паталди, чинеба чи арадиз гьахьнай.

⁵Амма, квез Шад Хабардин гьакъикъи мана хуьн патал, чун са легьзедани абурун таъсирдик акатнач, абуруз муьтӀуьгъ хьанач.

⁶Вилик-кьилик квай ксарикай лагьайтӀа, абуру за гайи Хабардилай гъейри маса са затӀни тӀалабнач. А ксар идалай вилик вужар тиртӀани гила зун паталди абур вири сад я, вучиз лагьайтӀа, Аллагьди инсанрин арада тафават твазвач.

⁷Аксина, абуруз акуна хьи, чувудрив Шад Хабар агакьарун Петрудин хиве тунвай хьиз, муькуьбурун арада Шад Хабар чукӀурунин кӀвалахни зи хиве тунва.

⁸Чувудрин арада илчи хьун патал Петрудик гьерекат кутур Аллагьди, муькуьбурун арада таблигъат тухун патал, заз къуват гана.

⁹КӀватӀалдин дестекар тир Якьубани, Кифадини яни Петрудини, Ягьяди, заз ганвай илчивилин алакьун акуна, чна санал кӀвалах авунин лишан яз, зазни Барнабадиз гъил яргъи авуна ва чун маса халкьарин, абур чебни чувудрин патав финал рази хьана.

¹⁰Абуру чавай анжах кесибар рикӀелай алуд тавун, абуруз куьмекар гун тавакъу авунай, ва и кар за чӀехи гьевесдалди кьиле тухузва.

¹¹Амма Кифа АнтӀиахдиз атай чӀавуз, адак тахсир хьуниз килигна, зун адаз ачухдиз акси экъечӀна.

¹²Вучиз лагьайтӀа, Якьубан патавай иманияр тир са бязи чувудар къведалди ада маса халкьарикай тир иманийрихъ галаз санал фу незвай, амма гьа итимар атайдалай кьулухъ абурукай кичӀе тирвиляй, ада маса миллетрин иманийрихъ галаз яваш-яваш алакъаяр атӀана.

¹³Адахъ галаз санал маса чувудрини кьве чин алай амалар авуна. Абурун кьве чин алай амалри гьатта Барнабани дуьз рекьелай алудна.

¹⁴Абур Шад Хабардин дуьз рекьелай алатнаваз акурла, за виридан вилик Кифадиз лагьана: «Вун чувуд яз, вуна чувудди хьиз ваъ, маса халкьари хьиз уьмуьр тухузватӀа, бес вучиз вуна а халкьарив чувудрив хьиз уьмуьр тухуз тазва?».

¹⁵Чун чувудар яз дуьньядал атанва, «гунагькар мажусияр» яз ваъ.

¹⁶Амма чаз чизва хьи, инсан Къанундал амал авуналди ваъ, анжах Иса Месигьдал иман гъуналди гьахъ-михьивилиз акъатзава. Гьавиляй Къанундал амал авуналди ваъ, Месигьдал гъанвай имандалди гьахъ-михьивилиз акъатун патал чнани Иса Месигьдал иман гъана. Вучиз лагьайтӀа, Къанундал амал авуналди гьич са касни гьахъ-михьивилиз акъудзавайди туш.

¹⁷Чаз Иса Месигьдин куьмекдалди гьахъ-михьивилиз акъудиз кӀанзавай чӀавуз чун жувни гунагькарар жезватӀа, им Иса Месигь гунагьриз лукӀвал ийизвайди я лагьай чӀал яни? Гьелбетда, ваъ!

¹⁸За виликдай чукӀурайди гуьгъуьнай эциг хъувуртӀа, за жува жув Къанун чӀурзавайди хьиз къалурзава.

¹⁹Къанунди заз кьиникьдин къарар акъудна ва зунни Аллагьдин рекье уьмуьр тухун патал кьена, ахпа зун Къанундин гьукумдикай азад хьана. Иса Месигьдихъ галаз санал зунни хашуниз чӀугуна.

²⁰Гила уьмуьр тухузвайди зун туш, зи чанда уьмуьр тухузвайди Иса Месигь я. Зи уьмуьр, зун кӀан хьана, Вич къурбанд авур Аллагьдин Хцел иман гъана, Гьадаз ибадат авуникай ибарат я.

²¹Аллагьдин берекат за кьулухъ элкъуьрзавач. Гьахъ-михьивал Къанундал амал авуналди къачуз хьанайтӀа, им акӀ лагьай чӀал жедай хьи, Иса Месигь нагьахъ кьенва.