Read Lezgi New Testament – ЦӀийи Икьрар ГалатӀвийриз 3 Bible Online

ГалатӀвийриз 3 - Lezgi New Testament – ЦӀийи Икьрар bible

ГалатӀвийриз 3

¹Ахмакь галатӀвияр! Вилерикай Иса Месигь хашуниз чӀугунвай гьал карагзавайтӀани, куьн ни икӀ тӀилисимда тунва?

²Зи са суалдиз жаваб це: Руьгь куьне Къанун вилив хуьналди къачунани, я тахьайтӀа Шад Хабардикай квез ван хьайидал иман гъуналди къачунани?

³Мегер куьн гьакьван ахмакь яни? Руьгьдилай эгечӀна, гила квез куь ниятрив куь къуватдалди агакьиз кӀанзавани?

⁴Икьван азиятар куьне нагьахъ чӀугунани? Икьван крар нагьахъ хьун мумкин туш!

⁵Руьгь квез гайи, куь арада аламатдин крар кьиле тухузвай Аллагьди и крар куьне Къанун кьиле тухузва лугьуз ва я Шад Хабардикай квез ван хьайидал куьне иман гъана лугьуз кьиле тухузвани мегер?

⁶Ибрагьим рикӀел хкваш — адакай кхьенва хьи, ада «Аллагьдихъ иман авуна — им адан гьахъ-михьивал яз кьабулна».

⁷Гила гъавурда акьукь, имандал атанвайбур Ибрагьиман веледар я!

⁸Каламда виликамаз Аллагьди, имандиз килигна, маса халкьар гьахъ-михьивилиз акъуддайди хабар гана ва Ибрагьимаз «Вири халкьари ви куьмекдалди хийир-дуьа къачуда» — лагьана, Шад Хабар малумарнай.

⁹Гьавиляй имандал атанвайбуру иман гваз уьмуьр тухузвай Ибрагьимахъ галаз санал хийир-дуьа къачузва.

¹⁰Къанун вилив хуьн ният авайбур вири лянетдик ква. Вучиз лагьайтӀа кхьенва: «Къанунда кхьенвай вири затӀар кьилиз акъуд тийизвайбуруз лянетрай!».

¹¹Малум я хьи, Къанун кьиле тухуналди, садни Аллагьдин вилик гьахъ-михьивилиз акъудзавач, вучиз лагьайтӀа «Гьахъ-михьи касди имандалди уьмуьр тухуда».

¹²Къанунди имандал бине кьунвач, вучиз лагьайтӀа кхьенва: «Къанундин эмирри чеб кьилиз акъудзавайбуруз уьмуьр гузва».

¹³Иса Месигьди чун Къанундин лянетдикай хиласна. Чи эвезда Ам вич лянетдик акатна. Гьа и кардикай икӀ кхьенва: «Таракай куьрсарнавай гьар са касдал лянет ала». Маса халкьаривайни, Иса Месигь арада аваз, Ибрагьимаз гайи хийир-дуьа къачуз хьурай ва чнани чаз хиве кьунвай Руьгь имандалди къачурай лагьана, Ада вичел лянет къачуна, чун хиласна.

¹⁵Стхаяр-вахар, за квез инсанрин гьар йикъан уьмуьрдай мисал гъида: гьатта инсандин лазим тир къайдада тестикьарнавай весини дегишардай ва я адак алаваяр кутадай ихтияр садазни авач.

¹⁶Аллагьди анжах Ибрагьимаз ва адан эвледдиз хиве кьунар ганвай. Аллагьди, гзаф инсанрикай рахазвай хьиз, «ва адан эвледриз» ваъ, са инсандикай рахана, «ва ви эвледдиз» лугьузва. Амни Иса Месигь я.

¹⁷Гьа идалди заз лугьуз кӀанзава: Аллагьди виликамаз тестикь авунвай Икьрар адалай кьуд вишни къанни цӀуд йис алатайла атай Къанундивай къуватдай вегьиз жедач ва идалди Ибрагьимаз гайи гаф кьилиз акъуд тавуна таз жедач.

¹⁸Вучиз лагьайтӀа, ирс Къанундилай аслу тиртӀа, ада мад хиве кьунрал бине эцигдачир. Амма ам Аллагьди Ибрагьимаз, са нямет хьиз, савкьват хиве кьунин рекьелди гана.

¹⁹Бес Къанун куьз герек я? Къанун Икьрар чӀурайбуруз чпик тахсир квайди чир хьун паталди алава хъувунай. Ам Аллагьди ирс хиве кьунвай кас — Ибрагьиман несилдай тир Инсан къведалди къуватда амукьна кӀанзавай. Къанун малаикрин куьмекдалди, са арачидин гъилелди агакьарнай.

²⁰Сада кьилди гьерекатзаватӀа, адаз арачи герек туш. Аллагь сад я!

²¹АкӀ хьайила, Къанун Аллагьдин хиве кьунриз акси яни? Гьелбетда, ваъ! Чаз ганвай Къанундивай уьмуьр гуз хьанайтӀа, гьахъ-михьивал Къанун кьиле тухунилай аслу жедай.

²²Амма Каламди вири каинат гунагьрин есир тирди малумарна: Иса Месигьдиз иман гъунал хиве кьур затӀар анжах иманийриз гурай лагьана.

²³Амма и иман къведайдалай вилик чун Къанундин гьукумдик квай, гележегда иман пайда жедалди чун есир яз кьунвай.

²⁴Яни Къанун чаз Месигь къведалди фидай рехъ къалурдай тербия гудайди хьана, чун имандал атана, гьахъ-михьивилиз акъудун паталди.

²⁵Амма имандал атайдалай кьулухъ чаз тербия гудайди герек амач.

²⁶Куьн вири Иса Месигьдал гъайи иманда Аллагьдин веледар я.

²⁷Иса Месигьдал иман гъана цик акахьун къачур куьн вири адаз ухшар хьана.

²⁸Гила мад чувуддинни муькуьдан, лукӀранни азад инсандин, итимдинни папан арада тафават амач, Иса Месигьдихъ галаз алакъада авай куьн вири сад хьанва.

²⁹Куьн Иса Месигьдиз талукь ятӀа, Ибрагьиман несилдикай я ва Аллагьди савкьватар хиве кьунвайбурун ирссагьибар я.