Read Lezgi New Testament – ЦӀийи Икьрар ГалатӀвийриз 4 Bible Online

ГалатӀвийриз 4 - Lezgi New Testament – ЦӀийи Икьрар bible

ГалатӀвийриз 4

¹За мад лугьузва: ирссагьиб гьар са куьнин иеси хьайитӀани, аял тир чӀавуз лукӀралай чара яз жедач.

²Ам бубади вахтуналди тайинарай гъилибанрин ва тербиядаррин гъилик жеда.

³Чунни гьакӀ имандин рекьел татанмаз и дуьньядал агъавалзавай руьгьдин къуватрин лукӀар тир.

⁴Амма, тайин авунвай вахт атана агакьайла, Аллагьди папа ханвай, Къанундиз муьтӀуьгъ тир Вичин Хва ракъурна,

⁵Къанундиз муьтӀуьгъ тир чун маса къачун ва веледвилиз кьабулун паталди.

⁶Куьн Аллагьдин веледар я. Гьавиляй Аллагьди Вичин Хцин «Абба! Буба чан!» лугьузвай Руьгь чи рикӀера туна.

⁷Гьавиляй вун мад лукӀ туш, велед я. Велед ятӀа, гьакӀни Аллагьди вун ирссагьиб яз тайин авунва.

⁸Сифтедай, Аллагь чин тийидай чӀавуз, куьн гьакъикъатда чеб аллагьар тушир затӀарин лукӀар тир.

⁹Амма гила квез Аллагь чизва, дуьз лагьайтӀа, Аллагьдиз куьн чизва. ГьакӀ хьайила, вучиз бес куьн мад диндиз талукь зайиф ва куьлуь кьатӀунрал элкъвена хквезва? Квез цӀийи кьилелай гьабурун лукӀар хъижез кӀанзавани?

¹⁰Куьне гьатта тайин тир йикъарал, варцарал, вахтарал ва йикъарал амалзава!

¹¹Заз кичӀезва за квел чӀугур зегьметар гьавая физ.

¹²Стхаяр-вахар, за квез минетзава, зун хьиз хьухь, вучиз лагьайтӀа, зунни куьн хьиз хьанва. Куьне заз гьахъ галачир гьич са карни авунач.

¹³Квез чизвайвал, зун сад лагьай гъилера куь патав атунин, за квев Шад Хабар агакьарунин себеб жуван сагъламвал зайиф хьун тир.

¹⁴Зун авай гьал, зи бедендин зайифвал куьн паталди са синагъ тиртӀани, куьн заз пис тамашнач, куьне зун яргъаларнач. Куьне зун Аллагьдин са малаик хьиз, Иса Месигь кьабулдай хьиз кьабулна.

¹⁵Гила гьинва куь виликан а бахтаварвал? Зун чӀалахъ я, виликан вахтара и кар мумкин тиртӀа, куьн куь вилерни акъудна заз гуниз гьазур тир.

¹⁶Гила, квез гьакъикъат ачухарна лугьуз, зун куь душман хьанвани?

¹⁷Гьа инсанар куьн чпин патахъ ялиз алахъзава, амма абурун ниятар чӀурубур я. Абуруз куьн чавай къакъудиз, чпин пад хуьзвайбур ийиз кӀанзава.

¹⁸И кардикай зарар авач, абур чпин михьи ниятрал, анжах зун куь патав гвай береда ваъ, даима акъвазиз хьайитӀа.

¹⁹Зи веледар, Иса Месигьдин къаматди квез эсер ийидалди, куьн паталди за саки цӀийи кьилелай аял хадайла чӀугвадай хьтин тӀалар чӀугвазва.

²⁰Агь, исятда заз куь юкьва жез ва квехъ галаз маса жуьре рахаз кӀанзава. Куьне зун гзаф мягьтеларзава.

²¹Эй, Къанундиз муьтӀуьгъ хьана уьмуьрь тухуз кӀанзавайбур, мегер куьн Къанундин гъавурда акьазвачни?

²²Ибрагьимаз кьве хва хьайиди, сад къаравушди, садни азад тир папа ханвайди кхьенва.

²³Къаравушди хайиди адетдин къайдадалди, азад папа хайиди Аллагьди гайи гафуниз килигна дуьньядал атанвай.

²⁴И гьикаяда дерин мана ава. Вучиз лагьайтӀа, и кьве папа кьве Икьрардин лишан гузва. Сад Синай дагъдай я, ада лукӀар хьун паталди аялар хазва. Ам Гьежер[1] я.

²⁵Гьежера Арабистанда авай Синай дагъ къалурзава, гьакӀни ам алай девирдин Ярусалимдиз ухшар я. Вучиз лагьайтӀа, Ярусалим вичин веледрихъ галаз санал лукӀвиле ава.

²⁶Амма цаварин Ярусалим азад я, ва ам чи диде я.

²⁷Каламда икӀ лагьанва: «Хвеши хьухь, эй бегьер тегъидай, аялар авачир паб! Шадвал ая, гьарая, аял ханвачир ва аял хаз тежезвай паб! Вучиз лагьайтӀа гадарнавай папаз гъуьл авай папалай пара аялар жеда» .

²⁸Куьнни, стхаяр-вахар, Исакь хьиз Аллагьди гаф гуналди дуьньядиз атанвайбур я.

²⁹Амма а чӀавуз адетдин къайдада ханвай кас Руьгьдин къуватдалди ханвай касдин геле гьикӀ къекъвезвайтӀа, гилани гьакӀ я.

³⁰И кардикай Каламда вуч кхьенва? «Къаравушни адан хва чукура. Вучиз лагьайтӀа, къаравушдин хва азад папан хцихъ галаз санал ирссагьиб хьун герек туш».

³¹Гьавиляй, стхаяр-вахар, чун къаравушдин ваъ, азад папан веледар я!