Read Lezgi New Testament – ЦӀийи Икьрар ГалатӀвийриз 5 Bible Online

ГалатӀвийриз 5 - Lezgi New Testament – ЦӀийи Икьрар bible

ГалатӀвийриз 5

¹Чун азад инсанар хьун патал Иса Месигьди чун лукӀвиляй акъудна. Гьавиляй, мягькем хьухь ва мад лукӀвилин викӀиник куь хев кутамир.

²За, Павела, квез лугьузва: куьн суьннет авуртӀа, Месигьди квез гьич са хийирни гудач.

³За мад гъилера квез тестикьарзава: суьннет авунвай гьар са касди Къанундин вири шартӀарал амал авун герек я.

⁴Квез Къанундалди гьахъ-михьивилиз акъудиз кӀанзаватӀа, чир хьухь: куьн Месигьдивай къакъатна, Аллагьдин берекатдивай яргъал хьанва.

⁵Амма чна Руьгьдин куьмекдалди Аллагьдин вилик имандалди куьн гьахъ-михьи хьуник умуд кутазва.

⁶Иса Месигьдиз инсан суьннет авунвайди ва я тавунвайди хьун метлеб авай кар туш, метлеб авайди кӀанивилелди таъсирзавай иман я.

⁷Куьн дуьз рекье авай. Гьакъикъатдин рекье хьуниз квез ни манийвална?

⁸Ам куьн дуьз рекье Турди туш.

⁹Са тӀимил кьван гъварци вири тини хкажда.

¹⁰Гьар вуч ятӀани, Реббидихъ галаз санал чна кьиле тухвай уьмуьрди чун чӀалахъарзава: чи арада фикирдин чаравал жедач. Гъулгъула твазвайбур, яд рагъуларзавайбур, вужар хьайитӀани, чпин жазайрив агакьда.

¹¹Стхаяр-вахар, за, эвелан хьиз, суьннет авун таблигъзаватӀа, бес гила вучиз зи геле къекъвезва? А чӀавуз мад хашуниз ягъун кӀвачик галкӀизвай къван тушир эхир!

¹²Куьн чӀуру рекье тваз алахъзавайбуру къуй чпин гьинаг кӀандатӀани атӀурай!

¹³Стхаяр-вахар, квез азадвилиз эвернава. Анжах и азадвиликай чӀуру крар паталди менфят къачумир, куь гунагькар тӀулдиз, нефсиниз къуллугъ ийимир, аксина, сада садаз кӀанивилелди къуллугъ ая.

¹⁴Вучиз лагьайтӀа вири Къанундин мана-метлеб са эмирда ганва: «Жув хьиз жуван мукьув гвайдини кӀан хьухь!».

¹⁵Куьне сада-сад жакьвазватӀа, игьтият хуьх, куьне сада-сад тергда!

¹⁶Гьавиляй, за лугьузва: Руьгьди къалурзавайвал уьмуьр кьиле твах, а чӀавуз куьне куь гунагькар тӀулдин нефсиниз яб гудач.

¹⁷Гунагькар тӀулдиз Руьгьдиз акси тир ва Руьгьдизни гунагькар тӀулдиз акси тир затӀар кӀанзава. Абур датӀана сад-садаз акси акъваззава. Нетижада куьне квез кӀандайвал гьерекат ийизвач.

¹⁸Амма куьн Руьгьдин регьбервилик кваз хьайитӀа, куьн Къанундин регьбервилик жедач.

¹⁹Гунагькар тӀулдин крар малум я. Ибур явавал, чиркинвал, ягь тахьун,

²⁰бутпересвал, суьгьуьрчивал, душманвал, гьуьжетунар, шак, хъел акатун, жува жув къалурун, араяр чӀурун,

²¹пехилвал, сархушвал, кеф чӀугун ва ибуруз ухшар амалар я. Мад гъилера за квез малумарзава: ихьтин крарал машгъулбуру Аллагьдин Пачагьлугъ ирс яз къачудач.

²²Руьгьдин майва ихьтинди я: кӀанивал, шадвал, саламатвал, сабур, регьимвал, хъсанвал, вафа,

²³хъуьтуьлвал, нефсинал гъалиб хьун. Къанунда ихьтин крариз акси са затӀни авач.

²⁴Иса Месигьдиз талукьбуру чпин беденрин чӀуру темягьрихъ ва гьашервилерихъ галаз санал хашуниз акъуднай.

²⁵Руьгьди чаз уьмуьр ганватӀа, ша чна Руьгьдин регьбервилик кваз ам кьиле тухун.

²⁶Машгьурвал кӀани ксар тежен, сада-садаз хъел гъин тийин, сада-садал пехилвал тийин!