Read Lezgi New Testament – ЦӀийи Икьрар Эфесвийриз 1 Bible Online

Эфесвийриз 1 - Lezgi New Testament – ЦӀийи Икьрар bible

Эфесвийриз 1

¹Аллагьдин къастуналди хкянавай Иса Месигьдин илчи Павелан патай. Эфесда Аллагьдиз талукьбуруз, Иса Месигьдихъ ийизвай иман ва вафа гваз уьмуьр тухузвайбуруз.

²Чи Буба Аллагьдин ва Ребби Иса Месигьдин патай берекатар ва саламатвал хьурай квез.

³Аллагьдиз, чи Ребби Иса Месигьдин Бубадиз, шукур хьурай. Ада Иса Месигьдиз талукь тир чаз цаварин вири руьгьани нуьсретар гана.

⁴ГьикӀ лагьайтӀа, чун муьгьуьббатда уьмуьр тухуз, чакай Аллагьдиз талукьбур ва Адан вилик рехне квачирбур хьун патал, гьеле дуьнья халкьдалди вилик Аллагьди чун Иса Месигьдалди хкяна.

⁵Вичин къени мураддив ва къастунив кьурвал, Иса Месигьдин хатурдай Ада чакай Вичи веледвилиз кьабулнавай аялар хьун виликамаз тайинарна.

⁶Гьа икӀ Ада чаз Вичиз кӀани Месигьдалди гайи берекатдай чна Адаз шукур ийизва.

⁷Месигьдин Ивидалди тахсиррихъ гайи эвез ва тахсиррилай гъил къахчун, Аллагьдин сергьят авачир берекатдив кьурвал, чав Месигьдилай агакьна.

⁸А берекат Аллагьди жумартдаказ гьар жуьредин камалдалди ва кьатӀунралди чаз гана.

⁹Месигьди авур кӀвалахралди Аллагьди чаз Вичин къастунин сир ачухна. И кар Ада Вичин къени́ мураддалди авуна.

¹⁰ИкӀ Ада цаварал ва чилел алай кьван вири затӀар Месигьдин гьукумдик тайин вахтунда сад жедайвал авуна.

¹¹Чна, Месигьдик умуд кутур сифтегьанбуру, Аллагьдин тариф авуниз къуллугъун патал, чакай, Месигьдиз талукь тирбур яз, ирссагьибар хьанва. Дуьньяда вири крар Вичин къастунив ва Вичин мурадрив кьурвал ийизвай Аллагьдин ниятди виликамаз гьа икӀ тайинар авунва.

¹³Квез хиласвал гъизвай Шад Хабардин — гьакъикъатдин Гафунин ван хьана ва Месигьдихъ иман авуна, Адахъ ийизвай иманда квелни хиве кьунвай Пак Руьгьдин муьгьуьр гьалчна.

¹⁴Пак Руьгь гележегда чаз жеда лагьана хиве кьунвай затӀарин ва Адаз талукьбурун гунагьрилай гъил къахчунин замин я. Ша чна Адан тариф ийин.

¹⁵Гьавиляй зани, Ребби Исадихъ куь имандикай ва Аллагьдиз талукьбуруз куь патай авай муьгьуьббатдикай ван хьанваз,

¹⁶куьн дуьайра рикӀел хкиз, куь гьакъиндай Аллагьдиз шукур авун акъвазарзавач.

¹⁷Чи Иса Месигьдин Аллагьди, баркалла алай Бубади, квез Ам мадни хъсан кьатӀуз жедайвал, квез камалдин ва керематдин Руьгьдикай пай гун патал, за дуьа ийизва.

¹⁸Аллагьди куь рикӀин вилер экуь авун патални за дуьа ийизва: Ада квез вичихъди эвер ганвай умуд вуч затӀ ятӀа, Аллагьдиз талукьбуруз ирс яз гудай баркалладин девлет гьикьван зурбади ятӀа,

¹⁹чак, Адан зурба къуватдин таъсирдик кваз имандал алайбурук, квай Адан кьадар авачир къудратни гьихьтинди ятӀа квез акурай.

²⁰Аллагьди и къуватдалди Месигьдизни таъсирар авуна: Аллагьди Адал чан хкана ва цавара, гьар жуьредин гьакимрилай, гьукумрилай, къуватрилай ва агъавилерилай вине, неинки и асирда, гьакӀни гележегдани рикӀел гъиз жедай гьар са тӀварцӀелайни вине Ам Вичин эрчӀи гъилихъай ацукьарна.

²²Аллагьди вирибур Месигьдин кӀвачерик муьтӀуьгъарна, Адан гьукумдик кутуна, Ам иманийрин кӀватӀалдин кьил яз эцигна.

²³А кӀватӀал Адан Беден я, вири крара вири АцӀурзавайдан ацӀайвал я.