Read Lezgi New Testament – ЦӀийи Икьрар Эфесвийриз 4 Bible Online

Эфесвийриз 4 - Lezgi New Testament – ЦӀийи Икьрар bible

Эфесвийриз 4

¹Ребби себеб яз къазаматда авай за квез минетзава: куьн Аллагьди эвернавайбур яз хьайила, куь везифадиз лайих яз уьмуьр твах.

²Дамах гвачирбур ва умунбур хьухь, сад садав сабурдивди ва муьгьуьббатдивди эгечӀ.

³Ислягьвилин зунжурралди куь руьгьдин садвал мягькемарун патал, жедай кьван вири ая.

⁴Квез ганвай умуд сад тир хьиз, Руьгьни сад я, Беденни.

⁵Ребби сад, иман сад, цик акахьун къачун сад,

⁶Аллагь — виридан Буба — сад я. Ам виридан винел ала ва вири Вичин гъилик кваз вирина кардик ква.

⁷Месигьди чун паталди тайинарнавай уьлчмедалди чакай гьар садаз берекат ганва.

⁸Гьавиляй лугьунни авунва: «Хкаж хьана Ам кьакьандиз, гуьгъуьнал алаз тухуз есирар, инсанриз савкьватар гана» .

⁹«Хкаж хьана» лугьуни Ам виликдай агъуз, чилел эвичӀунилай гъейри мад затӀни къалурзавач.

¹⁰И ЭвичӀайди, Вичелди вири алем ацӀурун патал, цаварилайни виниз хкаж хьайи гьа Гьам я.

¹¹Аллагьдиз талукьбур къуллугъ авунин кардиз гьазур хьун патал, чун вири иманда ва Аллагьдин Хва кьатӀунин карда садвилив агакьдай кьван чӀавалди, чун руьгьдин акьулбалугъвилив агакьдалди, Виче тамамвилин ацӀайвал авай Месигьдиз ухшар яз чӀехи жедалди, чна Месигьдин Беден арадал гъун патал, Аллагьди садбурукай илчияр, муькуьбурукай пайгъамбарар, масадбурукай Шад Хабардикай муштулухар гудайбур, бязибурукайни инсанар хуьдай чубанар ва муаллимар авуна.

¹⁴Гьа чӀавуз чакай инсанар рекьелай алудзавай амалдар тапархъанрин къурбандар ийизвай жуьреба-жуьре чирвилерин лепейрал ян гузвай ва гарари тухузвай гъвечӀи аялар жедач.

¹⁵Амма муьгьуьббатдивди гьакъикъат лугьуз, вири крара Кьил яз авай Месигьдин къилих къалуриз, чун чӀехи жеда.

¹⁶Гьам себеб яз вири Беден сад хьанва ва вири алакъайралди мягькем хьанва ва адан вири паяри гьар сада вичин кӀвалах ийизва. Гьа икӀ вири Беден чӀехи жезва ва муьгьуьббатда арадал къвезва.

¹⁷Гьавиляй Реббидин ТӀварцӀелай за малумарзава ва тагькимзава: фикирар ичӀи тир мажусияр хьиз уьмуьр тухун акъвазара,

¹⁸абурун къанажагъ мичӀи я. Абурун рикӀерин баятвал себеб яз арадал атанвай къенепатан буьркьуьвиляй абур Аллагьди гузвай уьмуьрдикай чара авунва.

¹⁹Гьар жуьредин айиб квадарна, абуру явавилиз кьил язава, тухвал течиз гьар са чиркинвиле гьатзава.

²⁰Амма квез Месигь акӀ чир хьанач.

²¹Квез Адакай ван тахьана авач ва квез, Адан терефдар хьайибуруз, гьакъикъат чирна, гьикӀ лагьайтӀа гьакъикъат Исада ава.

²²Алцурарзавай гьевесар себеб яз члаф жезвай куь куьгьне тӀулдиз хас уьмуьрдин виликан къайдадикай куьне кьил къакъуддайвал квез чирна.

²³Куь фикиррин тӀул цӀийи ая,

²⁴Аллагьдин къилих — гьакъикъи гьахъ-михьивал ва паквал къалурзавай цӀийи тӀул алукӀ.

²⁵Гьавиляй къуй квекай гьар сада таб гадаррай ва вичин мукьув гвайбуруз авайвал лугьурай, вучиз лагьайтӀа чун вири са Бедендин паяр я.

²⁶Хъиле аваз, гунагь мийир, куь хъел рагъ акӀидалди квек тамир.

²⁷Куь уьмуьрда иблисдиз чка гумир.

²⁸Ни чуьнуьхиз хьанатӀа, мад ада чуьнуьх тахъвурай, къуй ада кӀвал-югъ патал герек затӀар вичин зегьметдалди гъилиз гъурай ва муьгьтежвиле авайбурухъ галаз пайрай.

²⁹Са жуьрединни чӀуру гафар лугьумир, анжах несигьат патал хийир авай гафар лагь, яб гузвайбуруз нуьсрет гъидайвал ая.

³⁰Хиласвилин югъ патал квел муьгьуьр хьиз гьалчнавай Аллагьдин Пак Руьгь пашман ийимир.

³¹Руьгьда авай гьар жуьредин туькьуьлвиликай, хъилекай, гъазабдикай, гьарайдикай, намусдик хкуьрдай гафарикай ва гьар жуьредин писвиликай хилас хьухь.

³²Сад садахъ галаз къени хьухь, сада садахъ рикӀ кузвайди къалура, Аллагьди куь гунагьрилай Месигьдалди гъил къахчурвал, сада садалай гъил къахчу.