Read Lezgi New Testament – ЦӀийи Икьрар Эфесвийриз 5 Bible Online

Эфесвийриз 5 - Lezgi New Testament – ЦӀийи Икьрар bible

Эфесвийриз 5

¹Аллагьдин рикӀ алай веледар хьана, Адалай чешне къачу.

²Месигьдиз чун кӀан хьайивал ва Вичи Вич чи паталай Аллагьдиз савкьват ва къурбанд яз, хуш атир яз гайивал, куьне муьгьуьббатда аваз уьмуьр твах.

³Куь арада гьич са дуьшуьшдани явавилин ва я гьар жуьредин чиркинвилин ва я мискьивилин гьич гелни тахьун лазим я — ибур Аллагьдиз талукьбуруз кутуг тавур крар я.

⁴Куь рахунра са жуьрединни айиб гафар, кьуру лагълагъар ва я кьацӀай зарафатар тахьун лазим я. Аллагьдиз шукур ийиз хьайитӀа хъсан я.

⁵Чир хьухь: я явавал ийизвайдаз, я рехне квайдаз, я азгъундаз — им бутперес тир мисал я — Месигьдинни Аллагьдин Пачагьлугъда ирс жедач.

⁶Винидихъ лагьанвай гафариз акси яз экъечӀиз, садани куьн алцурар тавурай, вучиз лагьайтӀа муьтӀуьгъ тахьайбурал Аллагьдин хъел аватда.

⁷Ахьтин ксарихъ галаз са уртахвални жемир.

⁸Са мус ятӀани куьн мичӀивиле авай, амма гила, куьн Реббидихъ ийизвай иманда авайла, квекай экв хьанва. Экуьнин аялри хьиз уьмуьр твах.

⁹Экуьнин майва лагьайтӀа — им гьар жуьредин дугъривал, гьахъ-михьивал ва гьакъикъат я.

¹⁰Аллагьдиз вуч хуш ятӀа, чириз алахъа.

¹¹МичӀивилин хийир авачир крара иштиракмир, акси яз, а крар винел акъуд.

¹²Ахьтин ксар чинеба квел алахънаватӀа, гьатта лугьузни регъуь я.

¹³Вири чинебан крар экуьнал ашкара жеда.

¹⁴Чеб аквадайвал авунвай кьван виридакай экв жезва, гьавиляй лугьунни ийизва: «Ахварай ават, ксанвайди! Кьенвайди яз чан хъша — Месигьди вун экуь ийида».

¹⁵Гьа икӀ, килиг гьа, ийидай кар мукъаятдиз ая, ахмакьри хьиз ваъ, камал авайбуру хьиз ая.

¹⁶Вахтунин къадир хьухь, вучиз лагьайтӀа и йикъара писвилер гзаф ава.

¹⁷Кьиле гар авайбур жемир, Аллагьдин къаст вуч ятӀа кьатӀуз алахъ.

¹⁸Руфун ацӀудалди чехир хъвамир, ида явавилихъ тухуда. Амма Руьгьдалди ацӀуз хьухь.

¹⁹Забурдин чӀаларалди, тарифдин манийралди ва руьгьани лугьунралди сада садаз несигьатар це. Манияр лагь ва куь рикӀера Реббидин тариф ая.

²⁰Чи Ребби Иса Месигьдин ТӀварцӀин хатурдай датӀана ва вири крарай Аллагь Бубадиз шукур ая.

²¹Месигьдикай кичӀе яз сад садаз табий хьухь.

²²Куьн, папар, Реббидиз хьиз, куь гъуьлериз табий хьухь.

²³ГьикӀ лагьайтӀа, Месигь иманийрин кӀватӀалдин — Вичин Бедендин Кьил ва Хиласкар тирвал, гъуьлни вичин папан кьил я.

²⁴Иманийрин кӀватӀал Месигьдиз табий жезвайвал, папарни вири крара чпин гъуьлериз табий хьун лазим я.

²⁵Квез, гъуьлер, Месигьдиз Вичин иманийрин кӀватӀал кӀан хьайивал, куь папарни гьакӀ кӀан хьухь. Ада Вичи Вичин чан иманийрин кӀватӀал пак авун патал эцигна. Ада цик акахьун къачуналди ва и чӀавуз лугьудай гафарин куьмекдалди ам михьна,

²⁷ам Вичин вилик я леке, я са нукьсан ва я гьахьтин маса лишан квачир баркалла алай кӀватӀал яз эцигиз жедайвал, ам пакди ва рехне квачирди жедайвал авуна.

²⁸Гьа саягъда гъуьлеризни чпин папар, чпин хсуси беден хьиз, кӀан хьун лазим я. Вичин паб кӀанзавайдаз вични кӀанзава.

²⁹ГьикӀ лагьайтӀа вичин беден такӀандай кас авач, амма гьар сада вичин бедендиз тӀуьн гузва ва адан къайгъу чӀугвазва. Гьа саягъда Месигьдини иманийрин кӀватӀалдин къайгъу чӀугвазва,

³⁰вучиз лагьайтӀа чун Адан Бедендин паяр я.

³¹«Ингье вучиз итимди, бубани диде туна, папахъ галаз уьмуьр тухузватӀа ва ам адахъ галаз са чандиз элкъвезватӀа».

³²И гафара чӀехи гьакъикъат чуьнуьх хьанва, ва за квез лугьузва: абур Месигьдинни иманийрин кӀватӀалдин алакъайриз талукь я.

³³Са гафуналди, квекай лугьун хьайитӀа, къуй гьар са гъуьлуьз, вичиз вич хьиз, вичин пабни кӀан хьурай, ва папани вичин гъуьлуьз гьуьрмет авурай.