Read Lezgi New Testament – ЦӀийи Икьрар Эфесвийриз 6 Bible Online

Эфесвийриз 6 - Lezgi New Testament – ЦӀийи Икьрар bible

Эфесвийриз 6

¹Аялар, Реббидихъ иман ийиз куь диде-бубайрин чӀалаз килиг, гьа икӀ дуьз жеда.

²«Бубадизни дидедиз гьуьрмет ая» — им сифтегьан тагьким я, вичихъ ихьтин хиве кьун галай:

³«Чилел ви уьмуьр яргъиди хьун патал ва ваз а чилел хъсан хьун патал».

⁴Бубаяр, куь аялрик хкуьрна хъел гъимир, амма абуруз Реббидин тербетдив ва несигьатдив кьадайвал тербия це.

⁵ЛукӀар, и чилел куь иесийриз гьуьрметдивди ва рикӀик зурзун кваз, михьи рикӀелди, куьн Месигьдиз муьтӀуьгъ жедайвал, муьтӀуьгъ хьухь.

⁶И кар гьакӀ къалурун патал, анжах абур квев регьимвилелди эгечӀун патал ваъ, руьгьдалди Аллагьдин къаст кьилиз акъудзавай Месигьдин лукӀари хьиз ая.

⁷Куьне инсанриз ваъ, Реббидиз гьикӀ къуллугъдайтӀа, гьакӀ рикӀ алаз къуллугъ ая.

⁸Реббиди гьар са хъсан кардай, ам ни — лукӀра ва я азад касди — авуртӀани, савкьват гудайди рикӀел хуьх.

⁹Куьнни, иесияр, куь лукӀарив гьа саягъда эгечӀа. Абуруз гьелягьар кьун акъвазара. Цаварал гьабурун ва куь винел иесивалзавай Ребби алайди ва Ада садни муькуьдалай вине кьан тийизвайди рикӀел хуьх.

¹⁰Эхирки, Реббидилай аслу яз, Адан къудратдалди ва къуватдалди мягькем жез хьухь.

¹¹Квевай иблисдин фендигарвилерин хура акъвазиз жедайвал, квез Аллагьди ганвай вири яракьарни женгинин парталар жувал алукӀа.

¹²Вучиз лагьайтӀа чна инсанрин аксина ваъ, гьакимрин, гьукумрин, и мичӀивилин дуьньядин эмиррин ва цаварин кӀаник квай чӀуру руьгьерин аксина женг чӀугвазва.

¹³Гьавиляй писвили гьужумдай юкъуз абурун хура квевай акъваз жедайвал ва куьн, вири гьужумар алудна, дурум авайбур жедайвал, Аллагьдин вири яракьар къачу.

¹⁴Гьакъикъат хьиз чӀул юкьва туна, гьахъ-михьивал кьеркь хьиз алукӀна, кӀвачерал Аллагьдихъ галаз туькӀвенвайдакай Шад Хабар гуниз гьазурвал алукӀна, кӀевиз акъваз.

¹⁶Ибурулай виридалай гъейри, имандин къалхан къачу, адалди квевай шийирдин кузвай хьелер туьхуьриз жеда.

¹⁷Хиласвилин ракьун-кӀукӀ алукӀ ва Руьгьдин тур — Аллагьдин Гаф яхъ.

¹⁸Гьар са чӀавуз Руьгьдин куьмекдалди гьар жуьредин тӀалабунралди ва минетралди дуьаяр ая. И кар патал уях хьухь ва вири Аллагьдиз талукьбурун гьакъиндай ийизвай дуьада дегиш тахьана дурум гваз хьухь.

¹⁹Зун рахазвайла, заз лазим тир гафар гун патал ва завай Шад Хабардин сирдин гъавурда викӀегьдаказ тваз хьун патал, зи гьакъиндайни дуьа ая.

²⁰Лап и зунжурра аватӀани, зун Шад Хабардин векил я. Завай адакай викӀегьдиз, лазим тир саягъда муштулухар гуз хьун патал, дуьаяр ая.

²¹Квез зи крарикай чир жедайвал, чи играми стха ва Реббидиз вафа тир къуллугъзавай Туьхика квез вири ахъайда.

²²Чун авай гьаларикай квез чир хьун патал ва куьн кӀубан авун патал, за ам куь патав ракъурни ийизва.

²³Къуй квез, стхаяр, Аллагь Бубадин ва Ребби Иса Месигьдин патай саламатвал, муьгьуьббат ва иман хьурай.

²⁴Ребби Иса Месигь эхир авачир кьван кӀанзавай вирибурухъ берекат хьурай.