Read Lezgi New Testament – ЦӀийи Икьрар ФилипӀвийриз 1 Bible Online

ФилипӀвийриз 1 - Lezgi New Testament – ЦӀийи Икьрар bible

ФилипӀвийриз 1

¹Иса Месигьдин лукӀар тир Павеланни ТӀиматӀеян патай. ФилипӀра авай, чеб Иса Месигьдиз талукь вирибуруз, абурун чӀехибур ва шемасарни кваз.

²Аллагьдин, чи Бубадин ва Ребби Иса Месигьдин патай берекат ва саламатвал хьурай квез.

³Куьн рикӀел алаз ийизвай гьар са дуьада за датӀана куь виридан гьакъиндай зи Аллагьдиз шукурзава. За и дуьаяр шадвилелди ийизва,

⁵вучиз лагьайтӀа куьне сифте йикъалай къедалди, Шад Хабардикай муштулухар гуз, захъ галаз и кӀвалахда иштиракзава.

⁶Куь арада и хъсан кардик кьил кутур Аллагьди а кар Иса Месигь хкведай югъ алукьдалди эхирдал кьван ийидайдахъ зун агъунва.

⁷Квекай икӀ фикирун заз кутугнава, вучиз лагьайтӀа куьн зи рикӀе ава. Зун исятда бухавра авайла, гьакӀни за Шад Хабар хуьдайла ва тестикьардайла, куьнени вирида захъ галаз Аллагьдин берекат пайзава.

⁸Зун Иса Месигьдин муьгьуьббатдалди квехъ виридахъ цӀигел я. И кардин шагьид Аллагь я.

⁹Куь муьгьуьббат мад ва мад чӀехи хьун патал ва нетижада чирвилерив ацӀун патални фагьумдин жигьетдай дерин хьун патал за дуьа ийизва.

¹⁰Гьа чӀавуз куьн паталди вуч хъсан ятӀа куьне тайинарда, Месигь хкведай юкъуз куьн михьи ва рехне квачиз жеда,

¹¹куьне гьахъ-михьивилин майва гъида. А майва, Аллагьдал баркалла гъун ва Адан тарифун паталди, Иса Месигьдин куьмекдалди гъидайди я.

¹²Заз квез чир хьана кӀанзава хьи, стхаяр-вахар, зи кьилел атай кьван вири крари Шад Хабардикай муштулухар гунин карда агалкьунарни хьуниз куьмекна.

¹³Гила пачагьдин вири къаравулриз ва амай вирибуруз зун Иса Месигь патал къазаматда авайди чизва.

¹⁴Зун къазаматда тун себеб яз, гзаф стхаяр-вахар Реббидихъ ийизвай имандал кӀеви хьанва ва абуру мадни викӀегьдиз ва кичӀе тушиз Аллагьдин Гафуникай хабар гузва.

¹⁵Бязибуру пехилвиляйни бягьс чӀугун паталай Месигьдикай хабар гузва лагьай чӀал дугъри я. Амма муькуьбуру хъсан ниятар аваз хабар гузва.

¹⁶Михьи ниятар авайбуру, зун Шад Хабар хуьн патал ина тунвайди кьатӀуз, муьгьуьббатдал амал ийизва.

¹⁷Гьа са чӀавуз чӀуру ниятар авайбуру Месигьдикай, са чпин менфят кӀанз, рикӀ гвачиз, заз ина, къазаматда, мадни гзаф четинвилер хьунин мурад аваз, хабар гузва.

¹⁸Мад вучда кьван? Абурухъ тапан ва я дуьз ниятар аватӀани, кьилинди ам я хьи, абуру Месигь машгьурзава, ва зун и кардал шад я. За зи шадвал атӀудач.

¹⁹Вучиз лагьайтӀа, заз чизва хьи, икӀ авуни куь дуьаяр себеб яз ва Иса Месигьдин Руьгьдин куьмекдалди зун азад хъувуниз рехъ гуда.

²⁰За вилив хуьзва ва кӀевелай умудзава хьи, зун са куьникайни жуваз регъуь жедай гьалдиз къведач. Амма, датӀана хьиз, гилани зун, Месигь зи беденда машгьур хьун патал, кӀевиз акъвазда ва викӀегь жеда. И кар зи уьмуьрдин ва я ажалдин куьмекдалди — гьикӀ хьайитӀани — заз сад я.

²¹Вучиз лагьайтӀа, зун паталди уьмуьр — им Месигь я, ажални — хийир я.

²²Заз жувал чан аламукьна кӀанзаватӀа, им зун паталди майваяр галай кӀвалах жеда лагьай чӀал я. Гьа икӀ, вуч хкядатӀа, заз чизвач.

²³Зун кьве ниятдин арада кьве рикӀин жезва: заз и уьмуьрдай хъфиз ва Месигьдихъ галаз санал жез кӀанзава, гьа им, лагьайтӀа, виридалайни хъсан я.

²⁴Амма зал чан аламукьун квез гзаф герек я.

²⁵Зун и кардин чӀалахъ я. Гьавиляй заз чизва хьи, куь шадвал имандалди артух хьун патал ва куьн иманда мадни вилик фин патал, ва зун мад квехъ галаз жедай чӀавуз квехъ, Иса Месигьди зи куьмекдалди авур крарал дамахардай багьнаяр гзаф хьун патал, за уьмуьр тухуда ва квехъ галаз амукьда.

²⁷Вуч хьайитӀани, Иса Месигьдин Шад Хабардиз лайих яз уьмуьр твах. Зун атайла, куьн акуртӀани ва я зав квекай анжах ванер агакьайтӀани, заз чир жеда хьи, куьне ян гузвач ва куьне садвиле аваз уьмуьр тухузва, куьн къуьн къуьне туна Шад Хабардал бине кьунвай имандал кӀевиз акъвазнава,

²⁸ва квез душманрикай кичӀе туш. Ида а кардикай лугьузва хьи, абур телеф жеда, амма куьн хилас жеда — им Аллагьдилай къведай кар я.

²⁹Квез Иса Месигь себеб яз ганвай гьуьрмет хьиз неинки Месигьдихъ иман авун, гьакӀни Адан паталай азабар чӀугун гана.

³⁰Зал виликдай ацалтай хьтин ва, квез чизвайвал, за исятда эхзавай хьтин гьа са четинвилер квелни гьалтзава.